ലൈംഗികാതിക്രമ കേസിലെ പരാതിക്കാരിയായ അതിജീവിതയുടെ പേര് വിവരങ്ങള് വെളിപ്പെടുത്തിയ കേസില് യുവാവിനെ പൊലീസ് അറസ്റ്റ് ചെയ്തു.കൊല്ലം കൊട്ടാരക്കര കാട്ടാമ്പിള്ളി മണ്ണൂർ സ്വർദേശി ജിനു കുഞ്ഞുമോൻ (ജിനു കെ കോശി – 39) ആണ് പിടിയിലായത്.
തൻ്റെ യൂട്യൂബ്, ഫെയ്സ്ബുക്ക് അക്കൗണ്ടുകള് വഴി എറണാകുളം നോർത്ത് വനിതാ പൊലീസ് സ്റ്റേഷനില് രജിസ്റ്റർ ചെയ്ത ലൈംഗിക പീഡന കേസിലെ പരാതിക്കാരിയുടെ പേര് വിവരങ്ങള് വെളിപ്പെടുത്തിയെന്നാണ് കേസ്.
ജിനുവിനെതിരെ കൊച്ചി സിറ്റി സൈബർ ക്രൈം പോലീസ് സ്റ്റേഷനില് കേസ്സ് രജിസ്റ്റർ ചെയ്തിരുന്നു. കൊച്ചി സിറ്റി പോലീസ് കമ്മീഷണർ കാളിരാജ് മഹേഷ് കുമാറിൻ്റെ നിർദേശപ്രകാരം കൊച്ചി സിറ്റി ഡിസിപി അശ്വതി ജിജിയും സൈബർ പോലീസ് സ്റ്റേഷൻ എസിപി അനില്കുമാറിന്റെയും മേല്നോട്ടത്തില് പ്രത്യേക അന്വേഷണ സംഘത്തെ രൂപീകരിച്ചിരുന്നു. പിന്നീട് പ്രതി കൊല്ലത്തുണ്ടെന്ന് മനസിലാക്കിയ പൊലീസ്, കൊല്ലത്ത് നിന്നാണ് ഇയാളെ അറസ്റ്റ് ചെയ്തത്.
ഇൻസ്പെക്ടർ ഷെമീർഷാൻ, സീനിയർ സിവില് പൊലീസ് ഓഫീസർമാരായ അനീഷ് കെ ആർ, അജിത്ത് രാജ്, അരുൻ ആർ, അജിത്ത് ബാലചന്ദ്രരൻ, സിവില് പൊലീസ് ഓഫീസർ ആല്ഫിറ്റ് എന്നിവർ അടങ്ങിയ കൊച്ചി സിറ്റി സൈബർ പോലീസ് സംഘമാണ് പ്രതിയെ പിടികൂടിയത്. അറസ്റ്റ് രേഖപ്പെടുത്തിയ ശേഷം പ്രതിയോ കോടതിയില് ഹാജരാക്കി.
