ടിക്കറ്റ് നിരക്ക് വര്‍ദ്ധിപ്പിച്ച്‌ എയര്‍ ഇന്ത്യ: യാത്രക്കാര്‍ക്ക് വൻ തിരിച്ചടി; വിശദാംശങ്ങൾ വായിക്കാം

ഇതുവരെ ആഭ്യന്തര സർവീസുകളില്‍ ഒരേ നിരക്കിലായിരുന്നു സർചാർജ് ഈടാക്കിയിരുന്നതെങ്കില്‍ ഇനി മുതല്‍ യാത്രയുടെ ദൂരത്തിന് അനുസരിച്ചായിരിക്കും തുക നിശ്ചയിക്കുക. പുതുക്കിയ നിരക്കുകള്‍ പ്രകാരം 500 കിലോമീറ്റർ വരെയുള്ള ഹ്രസ്വദൂര യാത്രകള്‍ക്ക് 299 രൂപയാണ് അധികമായി നല്‍കേണ്ടി വരിക. 501 മുതല്‍ 1,000 കിലോമീറ്റർ വരെയുള്ള ദൂരത്തിന് 399 രൂപയും, 1,001 മുതല്‍ 1,500 കിലോമീറ്റർ വരെയുള്ള യാത്രകള്‍ക്ക് 549 രൂപയും സർചാർജ് ഇനത്തില്‍ ഈടാക്കും.

1,501 കിലോമീറ്റർ മുതല്‍ 2,000 കിലോമീറ്റർ വരെയുള്ള ദീർഘദൂര ആഭ്യന്തര, സർവീസുകള്‍ക്ക് 749 രൂപയാണ് വർദ്ധനവ്. 2,000 കിലോമീറ്ററിന് മുകളിലുള്ള യാത്രകള്‍ക്കാണ് ഏറ്റവും ഉയർന്ന സർചാർജ് നല്‍കേണ്ടത്. ഇതിനായി യാത്രക്കാർ ടിക്കറ്റ് നിരക്കിന് പുറമെ 899 രൂപ അധികമായി നല്‍കണം. ഓരോ സെക്ടറിനും സർചാർജ് ബാധകമാണ്. അതായത് ഡല്‍ഹിയില്‍ നിന്ന് മുംബയ് വഴി ബംഗളൂരുവിലേക്ക് പോകുന്ന ഒരു കണക്ഷൻ ഫ്‌ളൈറ്റില്‍ രണ്ട് സെക്ടറുകള്‍ ഉള്ളതിനാല്‍ രണ്ട് തവണ സർചാർജ് നല്‍കേണ്ടി വരും.

അന്താരാഷ്ട്ര യാത്രകള്‍ക്കുള്ള സർചാർജിലും വലിയ മാറ്റങ്ങളാണ് വരുത്തിയിരിക്കുന്നത്. ഒരു ഡോളറിന് 93 രൂപ എന്ന നിരക്കില്‍ കണക്കാക്കിയാല്‍, സാർക് രാജ്യങ്ങളിലേക്കുള്ള യാത്രകള്‍ക്ക് ഇനി 24 ഡോളർ ഏകദേശം 2,232 രൂപ അധികം നല്‍കണം. ഗള്‍ഫ് രാജ്യങ്ങള്‍ ഉള്‍പ്പെടുന്ന മിഡില്‍ ഈസ്റ്റ് റൂട്ടുകളില്‍ 4,650 രൂപയും, സിംഗപ്പൂരിലേക്ക് 5,580 രുപയുമാണ് സർചാർജ് വർദ്ധിപ്പിച്ചത്.

ചൈന, തെക്കുകിഴക്കൻ ഏഷ്യൻ രാജ്യങ്ങള്‍ എന്നിവിടങ്ങളിലേക്ക് 9,300 രൂപയും ആഫ്രിക്കൻ രാജ്യങ്ങളിലേക്ക് ഏകദേശം 12,090 രൂപയുമാണ് യാത്രക്കാർ അധികമായി നല്‍കേണ്ടി വരിക. ദീർഘദൂര റൂട്ടുകളായ യൂറോപ്പ്, യുകെ എന്നിവിടങ്ങളിലേക്ക് ഏകദേശം 19,065 രൂപയാണ് സർചാർജ്. ഏറ്റവും ഉയർന്ന തുക ഈടാക്കുന്നത് അമേരിക്ക, ഓസ്‌ട്രേലിയ തുടങ്ങിയ രാജ്യങ്ങളിലേക്കുള്ള യാത്രകള്‍ക്കാണ്. ഇവിടെ ഒരാള്‍ക്ക് ഒരു സെക്ടറില്‍ ഏകദേശം 26,040 വരെ അധിക ബാധ്യതയുണ്ടാകും. വരും ദിവസങ്ങളില്‍ മറ്റ് വിമാനക്കമ്പനികളും സമാനമായ രീതിയില്‍ നിരക്ക് വർദ്ധിപ്പിക്കാൻ സാധ്യതയുണ്ട്.