രാസലഹരി കേസില് ‘തൊപ്പി’ എന്ന പേരില് അറിയപ്പെടുന്ന നിഹാദിന്റെ മുന്കൂര് ജാമ്യാപേക്ഷ തീര്പ്പാക്കി. എറണാകുളം പ്രിന്സിപ്പല് സെഷന്സ് കോടതിയുടേതാണ് നടപടി.
കേസില് നിലവില് നിഹാദ് പ്രതിയല്ലെന്ന് പാലാരിവട്ടം പൊലീസ് അറിയിച്ചു.
നിഹാദ് ഉള്പ്പടെ ആറ് പേര്ക്കെതിരെയും കേസെടുത്തിട്ടില്ലെന്നും പൊലീസ് പറഞ്ഞു. പൊലീസ് റിപ്പോര്ട്ടിന്റെ അടിസ്ഥാനത്തിലാണ് മുന്കൂര് ജാമ്യാപേക്ഷ തീര്പ്പാക്കിയത്. തമ്മനത്തെ താമസ സ്ഥലത്തുനിന്ന് രാസലഹരി പിടിച്ചെടുത്തതിന് പിന്നാലെ യൂട്യൂബര് തൊപ്പി എന്ന നിഹാദ് ഒളിവിലായിരുന്നു. പൊലീസ് കേസെടുത്തതിന് പിന്നാലെയാണ് നിഹാദ് ഒളിവില് പോയത്.
കൊച്ചി തമ്മനത്ത് നിന്നും നവംബർ 15ന് രണ്ട് യുവാക്കളെ രാസലഹരിയുമായി പിടികൂടിയിരുന്നു. ഇതിന്റെ അന്വേഷണത്തില് തൊപ്പിയുടെ ഡ്രൈവറായ ജാബിർ ആണ് യുവാക്കള്ക്ക് എംഡിഎംഎ എത്തിച്ച് കൊടുത്തതെന്ന് കണ്ടെത്തുകയായിരുന്നു. തുടർന്ന് താൻ സെലിബ്രറ്റി ആയതിനാല് തനിക്കെതിരേയും കേസ് എടുക്കുമോയെന്ന് ഭയന്നാണ് നിഹാദ് ഒളിവില് പോയത്. പിന്നാലെ ജാമ്യ ഹർജി ഫയല് ചെയ്യുകയുമായിരുന്നു.
തുടർന്ന് വിഷയത്തില് ഡിസംബർ നാലിനുള്ളില് റിപ്പോർട്ട് സമർപ്പിക്കാൻ കോടതി പാലാരിവട്ടം പൊലീസിനോട് നിർദ്ദേശിക്കുകയായിരുന്നു. നിഹാദിനൊപ്പം സുഹൃത്തുക്കളായ മൂന്ന് യുവതികളും മുന്കൂര് ജാമ്യം തേടിയിരുന്നു.
