സില്വർ ലൈൻ പദ്ധതിയില് തിരിച്ചടി. പദ്ധതി സംബന്ധിച്ച കേരള റെയില് ഡെവലപ്മെന്റ് കോർപ്പറേഷൻ സമർപ്പിച്ച ഡിപിആർ കേന്ദ്ര റെയില്വേ മന്ത്രാലയം തള്ളി.
ഡിപിആർ പുതുക്കി സമർപ്പിക്കാൻ മന്ത്രാലയം ആവശ്യപ്പെട്ടു. അതേസമയം സംസ്ഥാനത്തിന് സ്വന്തം നിലയ്ക്ക് പാത നിശ്ചയിക്കാൻ ആകില്ലെന്നും കേന്ദ്ര റെയില്വേ മന്ത്രാലയം അറിയിച്ചു.
റെയില്വേ മാനദണ്ഡപ്രകാരമാണ് ഡിപിആർ പുതുക്കി സമർപ്പിക്കാൻ മന്ത്രാലയം ആവശ്യപ്പെട്ടിരിക്കുന്നത്. റെയില്വേ മന്ത്രാലയം നടത്തിയ സാങ്കേതിക പരിശോധനയില് ന്യൂനതകള് കണ്ടെത്തിയതിന്റെ അടിസ്ഥാനത്തിലാണ് നടപടി. സില്വർ ലൈൻ പദ്ധതിയുടെ ട്രാക്ക് ബ്രോഡ്ഗേജ് സംവിധാനത്തില് ആയിരിക്കണമെന്നും നിലവിലുള്ള റെയില്വേ ട്രാക്കുമായി ഇന്റഗ്രേറ്റ് ചെയ്തു വേണം പദ്ധതിയുടെ ട്രാക്കുകള് വരാനെന്നും റെയില്വേ മന്ത്രാലയം അറിയിച്ചു.
സംസ്ഥാനത്തിന് സ്വന്തം നിലയ്ക്ക് പാത നിശ്ചയിക്കാൻ ആകില്ലെന്നും കേന്ദ്ര റെയില്വേ മന്ത്രാലയം അറിയിച്ചു. പാതകള് പരമാവധി റെയില്വേ ട്രാക്കിന് സമാന്തരമായിരിക്കണം. കോച്ചുകളില് കൂട്ടിമുട്ടല് ഒഴിവാക്കാൻ കവച് സേഫ്റ്റി സെക്യൂരിറ്റിക്ക് ആവശ്യമായ പ്രൊപ്പോസല് ഉള്പ്പെടുത്തണമെന്ന് നിർദേശം. പൂർണ്ണമായി പാരിസ്ഥിതിക അനുമതി പദ്ധതിക്ക് വേണം. നിർമ്മാണ ഘട്ടത്തിലും ജോലികള് പൂർത്തിയായതിനുശേഷവും പൂർണ്ണമായ ഡ്രൈനേജ് സംവിധാനം വേണമെന്നും നിർദേശത്തില് പറയുന്നു.
നിലവില് സമർപ്പിച്ച പദ്ധതി റിപ്പോർട്ട് തൃപ്തികരമല്ലെന്നും റെയില്വേ മന്ത്രാലയം അറിയിച്ചിട്ടുണ്ട്. കെ റെയില് നടപ്പാക്കുന്നതില് സാങ്കേതികവും പാരിസ്ഥിതികവുമായ ചില പ്രശ്നങ്ങള് ഉണ്ടെന്ന് റയില്വേ മന്ത്രി അശ്വിനി വൈഷ്ണവ് നേരത്തെ പറഞ്ഞിരുന്നു. ആ തടസങ്ങള് പരിഹരിച്ചു പുതിയ നിർദ്ദേശങ്ങള് മുന്നോട്ടുവയ്ക്കുകയാണെങ്കില് പദ്ധതി നടപ്പാക്കാൻ റെയില്വേ സന്നദ്ധമാണെന്ന് കേന്ദ്രമന്ത്രി വ്യക്തമാക്കിയിരുന്നു.
