കേരളത്തിലെ ദൃശ്യമാധ്യമ രംഗത്ത് പുതിയ തരംഗമാകാന് ലക്ഷ്യമിട്ട് പ്രവര്ത്തനമാരംഭിച്ച ‘ബിഗ് ടിവി മലയാളം’ (Big TV Malayalam) ചുറ്റുമുള്ള വിവാദങ്ങള്ക്ക് മറുപടിയുമായി മാനേജ്മെന്റ് രംഗത്ത്. ചാനലിന്റെ ലൈസന്സിനെക്കുറിച്ചും രാഷ്ട്രീയ ചായ്വുകളെക്കുറിച്ചും സോഷ്യല് മീഡിയയില് പ്രചരിക്കുന്ന വാര്ത്തകള്ക്ക് അക്കമിട്ട് മറുപടി നല്കിക്കൊണ്ട് ചെയര്മാനും മാനേജിംഗ് എഡിറ്ററുമായ അനില് അയിരൂര് പുറത്തുവിട്ട പ്രസ്താവന മാധ്യമലോകത്ത് വലിയ ചര്ച്ചയാവുകയാണ്.
വിമര്ശകര്ക്ക് മറുപടി; ‘നിങ്ങള് ഞങ്ങളുടെ പ്രൊമോട്ടര്മാര്’
തങ്ങള്ക്കെതിരെ നടക്കുന്ന സംഘടിതമായ സൈബര് ആക്രമണങ്ങളെ വളരെ വ്യത്യസ്തമായ രീതിയിലാണ് അനില് അയിരൂര് നേരിടുന്നത്. വിമര്ശകര്ക്കെതിരെ നിയമനടപടിക്ക് പകരം അവരോട് നന്ദി പറയുന്ന നിലപാടാണ് അദ്ദേഹം സ്വീകരിച്ചത്. പോസിറ്റീവ് ആയാലും നെഗറ്റീവ് ആയാലും ഓരോ പരാമര്ശവും ചാനലിന്റെ റീച്ച് വര്ദ്ധിപ്പിക്കാന് സഹായിക്കുന്നുവെന്ന് അദ്ദേഹം ചൂണ്ടിക്കാട്ടുന്നു.ഓണ്ലൈനില് വിമര്ശിക്കുന്നവര്ക്ക് എതിരെ കേസെടുക്കില്ലെന്നും, മറിച്ച് അവരെ ചാനലിന്റെ സൗജന്യ പ്രൊമോട്ടര്മാരായി കാണുന്നുവെന്നും അദ്ദേഹം പരിഹസിച്ചു.
അനില് ഐരൂര് വ്യക്തമാക്കുന്ന 8 പ്രധാന നിലപാടുകള്
- സംപ്രേക്ഷണ ലൈസന്സ് ലഭിക്കില്ലെന്ന പ്രചരണങ്ങള് തെറ്റാണെന്നും ബിഗ് ടിവി പൂര്ണ്ണമായും ലൈസന്സുള്ള ചാനലാണെന്നും അദ്ദേഹം സ്ഥിരീകരിച്ചു.
- ഏതെങ്കിലും രാഷ്ട്രീയ പാര്ട്ടിയുടെയോ പ്രത്യയശാസ്ത്രത്തിന്റെയോ പിന്തുണ തങ്ങള്ക്കില്ല. ബിസിനസ് പങ്കാളിയുടെ മൂലധനവും സ്വന്തം അധ്വാനവുമാണ് ചാനലിന് പിന്നില്.
- എഡിറ്റോറിയല് നയങ്ങളില് പുറത്തുനിന്നുള്ള ഒരു ശക്തിക്കും ഇടപെടാന് കഴിയില്ല.
- ഓഫീസുകള് തുറക്കുന്നതും അടയ്ക്കുന്നതും പൂര്ണ്ണമായും ബിസിനസ്സ് തീരുമാനങ്ങളാണ്. അതില് പുറത്തുനിന്നുള്ളവരുടെ അഭിപ്രായത്തിന് പ്രസക്തിയില്ല.
- മുന്നൂറിലധികം പേര്ക്കും അവരുടെ കുടുംബങ്ങള്ക്കും ബിഗ് ടിവി ഉപജീവനമാര്ഗ്ഗമാണ്.മേഖലയിലെ ഏറ്റവും ഉയര്ന്ന ശമ്പളമാണ് ജീവനക്കാര്ക്ക് നല്കുന്നത്.
- സത്യസന്ധവും പക്ഷപാതരഹിതവുമായ മാധ്യമപ്രവര്ത്തനം തുടരും.
- മറ്റേതെങ്കിലും ചാനലിനെ അനുകരിക്കാനല്ല, പുതിയൊരു തരംഗമാകാനാണ് ബിഗ് ടിവി ലക്ഷ്യമിടുന്നത്.
മാധ്യമരംഗത്തെ ‘ബിഗ്’ മാറ്റം
2026 ഫെബ്രുവരിയില് പ്രവര്ത്തനം ആരംഭിച്ച ബിഗ് ടിവി മലയാളം, അത്യാധുനിക സാങ്കേതിക വിദ്യയും വ്യത്യസ്തമായ അവതരണ ശൈലിയുമാണ് വാഗ്ദാനം ചെയ്യുന്നത്. ഫ്ളവേഴ്സ് ടിവി, ട്വന്റിഫോര്, റിപ്പോര്ട്ടര് ടിവി തുടങ്ങിയ മുന്നിര ചാനലുകളില് നിര്ണ്ണായക പദവികള് വഹിച്ചിട്ടുള്ള അനില് അയിരൂരിന്റെ നേതൃത്വം ചാനലിന് വലിയ പ്രതീക്ഷ നല്കുന്നുണ്ട്.മലയാളി, തെലുങ്ക് പ്രേക്ഷകര്ക്ക് പ്രൊഫഷണലായ വാര്ത്തകള് എത്തിക്കുമെന്ന ഉറപ്പോടെ മുന്നോട്ട് പോകുന്ന ബിഗ് ടിവി, വരും ദിവസങ്ങളില് കേരളത്തിലെ റേറ്റിംഗ് പോരാട്ടത്തില് എവിടെ നില്ക്കുമെന്ന് മാധ്യമലോകം ഉറ്റുനോക്കുന്നു.
ബിഗ് ടിവിക്കെതിരെ ഉയര്ന്ന ചില ആരോപണങ്ങൾ:
ബിഗ് ടിവി എന്ന വാര്ത്താ ചാനല് വലിയ പ്രതിസന്ധികളിലൂടെയാണ് കടന്നുപോകുന്നത് എന്നാണ് ചില ഓണ്ലൈന് പോര്ട്ടലുകളില് വന്ന റിപ്പോര്ട്ടുകളുടെ സൂചന. വലിയ അവകാശവാദങ്ങളുമായി പ്രവര്ത്തനം തുടങ്ങിയ ചാനല്, മറ്റൊരു ചാനലിന്റെ പകര്പ്പാണെന്ന (copycat) വിമര്ശനം നേരിട്ടു. ഇത് ചാനലിന്റെ ബ്രാന്ഡിംഗിനെയും മാര്ക്കറ്റിംഗിനെയും മോശമായി ബാധിച്ചു.പ്രവര്ത്തനമാരംഭിച്ച് മൂന്ന് മാസത്തിനുള്ളില് തന്നെ ഗുരുതരമായ സാമ്പത്തിക പ്രതിസന്ധി ഉടലെടുത്തു. ഇതിന്റെ ഭാഗമായി കാസര്കോട് ഉള്പ്പെടെയുള്ള അപ്രധാന ബ്യൂറോകള് അടച്ചുപൂട്ടാന് മാനേജ്മെന്റ് തീരുമാനിച്ചു.ക്യാമറകള് വാടകയ്ക്ക് നല്കിയ കമ്പനിക്ക് കുടിശ്ശിക വരുത്തിയതിനെ തുടര്ന്ന് സോണിയുടെ 10 ക്യാമറകള് അവര് തിരിച്ചെടുത്തു. ഇത് വാര്ത്താ ശേഖരണത്തെ പ്രതിസന്ധിയിലാക്കി. ചാനലിന്റെ അന്വേഷണ വിഭാഗം (Investigation team) സാമ്പത്തിക ബാധ്യത ഭയന്ന് ഉപേക്ഷിച്ചു. അന്വേഷണ വിഭാഗം തലവനായി നിയമിച്ച റിപ്പോര്ട്ടറെ ഡെസ്കിലേക്ക് തിരിച്ചുവിളിച്ചു.: ചാനല് ഏതുസമയവും പൂട്ടിയേക്കാമെന്ന ഭയത്താല് മുതിര്ന്ന മാധ്യമപ്രവര്ത്തകര് ഉള്പ്പെടെയുള്ളവര് മറ്റു സ്ഥാപനങ്ങളിലേക്ക് മാറാന് ശ്രമിക്കുന്നു. സുജയ പാര്വതിയെ എഡിറ്ററായി നിയമിച്ചതുമായി ബന്ധപ്പെട്ട് ഒരു വിഭാഗം ജീവനക്കാര്ക്ക് അതൃപ്തിയുണ്ട്. നിലവില് ഉയര്ന്ന ശമ്പളം വാങ്ങുന്നവര്ക്ക് മറ്റൊരു സ്ഥാപനത്തില് അതേ പാക്കേജ് ലഭിക്കാത്തത് അവരെ ആശയക്കുഴപ്പത്തിലാക്കുന്നുണ്ട്. എങ്കിലും ശമ്പളം മുടങ്ങുന്നതിന് മുന്പ് പുതിയ ഇടം കണ്ടെത്താനുള്ള നെട്ടോട്ടത്തിലാണ് ഭൂരിഭാഗം പേരും. ഇതൊക്കെയാണ് ബിഗ് ടിവിക്ക് എതിരായ മുഖ്യ പ്രചാരണങ്ങള്. ഇവയ്ക്കാണ് ഇന്ന് അനില് അയിരൂര് മറുപടി നല്കിയത്
