തിരഞ്ഞെടുപ്പ് പ്രവചനങ്ങളുടെ ലോകത്ത് പ്രത്യേകം ശ്രദ്ധിക്കുന്ന പേരാണ് സി. പി. റാഷിദ്. കഴിഞ്ഞ ഏതാനും വർഷങ്ങളായി ഇന്ത്യയിലെ വിവിധ നിയമസഭാ തിരഞ്ഞെടുപ്പുകളില് കൃത്യതയാർന്ന പ്രവചനങ്ങളിലൂടെ ശ്രദ്ധ നേടിയ റാഷിദ്, കേരള നിയമസഭാ തിരഞ്ഞെടുപ്പിനുള്ള തന്റെ വിലയിരുത്തലുകള് പുറത്തുവിട്ടതോടെ രാഷ്ട്രീയ വേദികളില് വലിയ ചർച്ചകള്ക്ക് തുടക്കമായി.
ഇത്തവണത്തെ കേരള പ്രവചനം
റാഷിദിന്റെ പുതിയ കണക്കുകള് പ്രകാരം, യുണൈറ്റഡ് ഡെമോക്രാറ്റിക് ഫ്രണ്ട് (യുഡിഎഫ്) ഇത്തവണ ഭൂരിപക്ഷത്തോടെ അധികാരത്തിലെത്തുമെന്നാണ് സൂചന. യുഡിഎഫിന് 91 മുതല് 102 വരെ സീറ്റുകളും 41.5% മുതല് 45% വരെ വോട്ടുശതമാനവും ലഭിക്കുമെന്നാണ് പ്രവചനം.
ഭരണകക്ഷിയായ ലെഫ്റ്റ് ഡെമോക്രാറ്റിക് ഫ്രണ്ട് (എല്ഡിഎഫ്) 38 മുതല് 48 വരെ സീറ്റുകളില് ഒതുങ്ങുമെന്നാണ് പ്രവചനം. വോട്ടുശതമാനം 36.5% മുതല് 39.5% വരെയാകാമെന്നും റാഷിദ് പറയുന്നു.
നാഷണല് ഡെമോക്രാറ്റിക് അലയൻസ് (എൻഡിഎ) 1 മുതല് 3 സീറ്റുകള് വരെ നേടെന്നും 14% മുതല് 17% വരെ വോട്ടുശതമാനം നേടെന്നും കണക്കാക്കുന്നു.
പ്രവചനങ്ങളുടെ വിശ്വാസ്യത
റാഷിദിന്റെ പ്രവചനങ്ങള് ചർച്ചയാകുന്നത് അദ്ദേഹത്തിന്റെ മുൻകാല കൃത്യതയാലാണ്. ഏകദേശം 17 തിരഞ്ഞെടുപ്പുകളില് നടത്തിയ പ്രവചനങ്ങളില് ഭൂരിഭാഗവും യാഥാർത്ഥ്യത്തോട് വളരെ അടുത്തതായിരുന്നു. അതുകൊണ്ടുതന്നെ ‘പ്രവചന സിംഹം’ എന്ന വിശേഷണം അദ്ദേഹം നേടിയിട്ടുണ്ട്.
2020ലെ ഡല്ഹി നിയമസഭാ തിരഞ്ഞെടുപ്പില് ആം ആദ്മി പാർട്ടി 62 മുതല് 65 വരെ സീറ്റുകള് നേടെന്നും ഭാരതീയ ജനത പാർട്ടി 5 മുതല് 8 വരെ സീറ്റുകള് നേടെന്നും അദ്ദേഹം പ്രവചിച്ചിരുന്നു. ഫലം വന്നപ്പോള് ആം ആദ്മി പാർട്ടി 62 സീറ്റുകളും ബിജെപി 8 സീറ്റുകളും നേടി. കോണ്ഗ്രസിന് പൂജ്യം സീറ്റുകള് മാത്രമായിരുന്നു ലഭിച്ചത്-റാഷിദ് സൂചനയായി പറഞ്ഞ ‘കൂപ്പുകൈ’ പ്രവചനം കൃത്യമായി ശരിവച്ചു.
2021ലെ കേരള നിയമസഭാ തിരഞ്ഞെടുപ്പില് എല്ഡിഎഫ് 96 മുതല് 104 വരെ സീറ്റുകളും യുഡിഎഫ് 35 മുതല് 43 വരെ സീറ്റുകളും നേടുമെന്ന് അദ്ദേഹം പ്രവചിച്ചു. യഥാർത്ഥ ഫലം എല്ഡിഎഫ് 99, യുഡിഎഫ് 41 എന്നതായിരുന്നു. ഇത് അദ്ദേഹത്തിന്റെ വിശ്വാസ്യതയെ കൂടുതല് ഉറപ്പിച്ചു.
പുതുപ്പള്ളി ‘ഞെട്ടിക്കല്’
2023ലെ പുതുപ്പള്ളി ഉപതിരഞ്ഞെടുപ്പിലാണ് റാഷിദ് വീണ്ടും ശ്രദ്ധ നേടിയത്. യുഡിഎഫിന് 57% മുതല് 62.5% വരെ വോട്ടും എല്ഡിഎഫിന് 31% മുതല് 36% വരെ വോട്ടും ലഭിക്കുമെന്നായിരുന്നു പ്രവചനം. കൂടാതെ ചാണ്ടി ഉമ്മൻ 31,500 മുതല് 39,000 വരെ വോട്ടിന്റെ ഭൂരിപക്ഷത്തില് വിജയിക്കുമെന്നും അദ്ദേഹം വ്യക്തമാക്കി.
ഫലം വന്നപ്പോള് ചാണ്ടി ഉമ്മൻ 61.38% വോട്ടും 37,719 വോട്ടിന്റെ ഭൂരിപക്ഷവും നേടി വിജയിച്ചു. റാഷിദിന്റെ കണക്കുകള് അതിശയിപ്പിക്കുന്ന വിധത്തില് കൃത്യമായിരുന്നു. ഈ പ്രവചനത്തോടെ അദ്ദേഹത്തിന്റെ വിശ്വാസ്യത കേരള രാഷ്ട്രീയത്തില് വലിയ ചർച്ചയായി.
മറ്റു സംസ്ഥാനങ്ങളിലെ കൃത്യത
കേരളത്തിനു പുറത്തും റാഷിദിന്റെ പ്രവചനങ്ങള് ശ്രദ്ധേയമായിരുന്നു. 2023ലെ കർണാടക നിയമസഭാ തിരഞ്ഞെടുപ്പില് കോണ്ഗ്രസ് 129 മുതല് 142 വരെ സീറ്റുകള് നേടുമെന്ന് അദ്ദേഹം പ്രവചിച്ചു. യഥാർത്ഥ ഫലം 135 സീറ്റുകളായിരുന്നു.
അതുപോലെ തെലങ്കാന നിയമസഭാ തിരഞ്ഞെടുപ്പില് കോണ്ഗ്രസ് 63 മുതല് 72 വരെ സീറ്റുകള് നേടുമെന്ന് പ്രവചിച്ചപ്പോള് ഫലം 64 ആയി. രാജസ്ഥാൻ നിയമസഭാ തിരഞ്ഞെടുപ്പില് ഭാരതീയ ജനത പാർട്ടി 119 മുതല് 131 വരെ സീറ്റുകള് നേടുമെന്ന് പറഞ്ഞപ്പോള് യഥാർത്ഥ ഫലം 115 ആയിരുന്നു-വ്യത്യാസം കുറഞ്ഞതായിരുന്നു.
എന്താണ് റാഷിദിന്റെ പ്രത്യേകത?
പരമ്പരാഗത പ്രീപോള് സർവേകളെയും എക്സിറ്റ് പോളുകളെയും അപേക്ഷിച്ച് റാഷിദിന്റെ സമീപനം വ്യത്യസ്തമാണ്. സമൂഹമാധ്യമങ്ങളില് നിന്നുള്ള പ്രവണതകള്, പ്രാദേശിക രാഷ്ട്രീയ ഘടകങ്ങള്, സ്ഥാനാർഥികളുടെ വ്യക്തിഗത സ്വാധീനം, വോട്ടർ മനോഭാവം എന്നിവയെ സമന്വയിപ്പിച്ചാണ് അദ്ദേഹം പ്രവചനങ്ങള് തയ്യാറാക്കുന്നത്. വലിയ ഡാറ്റാസെറ്റുകളേക്കാള് ഗ്രൗണ്ട് റിയാലിറ്റിക്ക് അദ്ദേഹം നല്കുന്ന പ്രാധാന്യമാണ് കൃത്യതയ്ക്ക് കാരണമെന്നാണ് വിലയിരുത്തല്.
രാഷ്ട്രീയ പ്രാധാന്യം
ഇത്തവണത്തെ പ്രവചനങ്ങള് ശരിയായാല് കേരളത്തില് രാഷ്ട്രീയ അധികാരമാറ്റത്തിന് സാധ്യത ഉയരും. 2021ല് തുടർച്ചയായി അധികാരത്തിലെത്തിയ എല്ഡിഎഫിന് പിന്നാലെ യുഡിഎഫ് തിരിച്ചുവരവ് നടത്തും. ഇത് സംസ്ഥാന രാഷ്ട്രീയത്തില് വലിയ മാറ്റങ്ങള്ക്ക് വഴിവെക്കും.
അതേസമയം എൻഡിഎയുടെ വോട്ടുശതമാനം ഉയരുന്ന പ്രവണത ശ്രദ്ധേയമാണ്. സീറ്റുകള് കുറവായാലും വോട്ടുശതമാനത്തില് വർധനവ് ഭാവിയില് വലിയ രാഷ്ട്രീയ മാറ്റങ്ങള്ക്ക് അടിത്തറയാകാമെന്നാണ് വിലയിരുത്തല്.
രണ്ടായിരത്തി ഒന്നിന് ശേഷം ഇടത് പക്ഷത്തേക്ക് ചേർന്നിരുന്ന ന്യൂനപക്ഷ വോട്ടുകളില് വ്യക്തമായ ‘റിവേഴ്സ് സ്വീപ്’ പ്രകടമായി. ഒരിക്കല് ഉറച്ച പിന്തുണയായി നിലകൊണ്ടിരുന്ന ഈ വോട്ടുബാങ്ക് ക്രമേണ അകന്ന് പോകുന്ന പ്രവണതയാണ് ചൂണ്ടിക്കാണിക്കുന്നത്.
അതോടൊപ്പം സ്വജനപക്ഷപാതത്തിന്റെ ആരോപണങ്ങള് കൂടുതല് ശക്തമായി ഉയർന്നതും ശ്രദ്ധേയമായി. അധികാരത്തിലെ തീരുമാനങ്ങളില് പാർട്ടിക്കാരെയും അടുത്ത വൃത്തത്തെയും മുൻതൂക്കം നല്കുന്നുവെന്ന വിമർശനം വ്യാപകമായി ഉയർന്നു. ഇത് ഇടത് അടിസ്ഥാന വോട്ടർമാരെയും അനുഭാവികളെയും ഒരുപോലെ നിരാശപ്പെടുത്തുന്ന ഘടകമായി മാറി.
രാഷ്ട്രീയ നിലപാടുകളിലെ തുടർച്ചയായ അസ്ഥിരതയും വലിയ തിരിച്ചടിയായി. വിവിധ വിഷയങ്ങളില് വ്യക്തമായ ദിശയില്ലാത്ത സമീപനം, ഇടത് രാഷ്ട്രീയ ബോധമുള്ള സമൂഹവിഭാഗങ്ങളില് അസ്വസ്ഥതയും അവിശ്വാസവും സൃഷ്ടിച്ചു. ആശയപരമായ ഉറച്ച നിലപാട് പ്രതീക്ഷിച്ച വോട്ടർമാർക്ക് ഇത് നിരാശയായി.
ഇതിനൊപ്പം തന്നെ മുഖ്യമന്ത്രിയുടെ വ്യക്തിഗത ജനപ്രീതിയിലും ശ്രദ്ധേയമായ ഇടിവ് രേഖപ്പെടുത്തി. ഒരിക്കല് ശക്തമായ പിന്തുണ നേടിയിരുന്ന നേതൃച്ഛായയില് സമാനതകളില്ലാത്ത കുറവാണ് ഇപ്പോള് കാണപ്പെടുന്നതെന്നാണ് വിലയിരുത്തല്. ഈ ഘടകങ്ങള് എല്ലാം കൂടി ഇടത് രാഷ്ട്രീയത്തിന് മുന്നില് പുതിയ വെല്ലുവിളികള് ഉയർത്തുന്നുവെന്നതാണ് പൊതുവായ നിരീക്ഷണം.
