കൈക്കൂലി കൊടുക്കാൻ വിസമ്മതിച്ച അച്ചായൻസ് ഗോൾഡിനെതിരെ പകപോക്കൽ തുടർന്ന് ഷാജു തുരുത്തൻ; പാലാ ഷോറൂമിലേക്കുള്ള പ്രവേശനം തടഞ്ഞ് ഓട പൊളിച്ചിട്ടത് നഗരസഭ ചെയർമാന്റെ പ്രത്യേക താല്പര്യം പ്രകാരം? വിശദാംശങ്ങളും വീഡിയോ ദൃശ്യങ്ങളും വാർത്തയോടൊപ്പം.

എല്ലാത്തിനും പിന്നിൽ കൈക്കൂലി കൊടുക്കാത്തതിലുള്ള പകയോ? ഏതാനും നാളുകളായി അച്ചായൻസ് ഗോൾഡ് എന്ന സ്ഥാപനത്തിനെതിരെ പകപോക്കൽ നടപടികളാണ് ഷാജു തുരുത്തൻ തുടരുന്നത്. വോളിബോൾ ടൂർണമെന്റിന്റെ സംഘാടന ചെലവുകളുടെ മറവിൽ രണ്ടുലക്ഷം രൂപ കൈക്കൂലി ആവശ്യപ്പെട്ടപ്പോൾ അത് കൊടുക്കാൻ വിസമ്മതിച്ചത് മൂലമാണ് തനിക്കെതിരെ ചെയർമാൻ ഇത്തരം പ്രതികാര നടപടികൾ കൈക്കൊള്ളുന്നതെന്ന് അച്ചായൻസ് ഗോൾഡ് ഉടമ ടോണി വർക്കി നേരത്തെ തന്നെ ആരോപണം ഉന്നയിച്ചിരുന്നു. ബോർഡ് കുത്തിക്കീറുകയും സ്ഥാപനത്തിലെ ജീവനക്കാരെ അസഭ്യം പറയുകയും ചെയ്തതു കൂടാതെ നഗരസഭയിലെയും മറ്റ് ഡിപ്പാർട്ട്മെന്റുകളിലെയും ജീവനക്കാരെ അയച്ചു നിരന്തരം പരിശോധനകൾ നടത്തി സ്ഥാപനത്തിന് തലവേദന ഉണ്ടാക്കുന്ന നിലപാടും ചെയർമാന്റെ ഭാഗത്തുനിന്ന് തുടർച്ചയായി ഉണ്ടാകുന്നുണ്ടെന്നാണ് അറിയാൻ കഴിയുന്നത്.

നഗരസഭയിലെ മാലിന്യ സംസ്കരണം ഉൾപ്പെടെ അവതാളത്തിൽ ആകുകയും കളക്ടറുടെ തലത്തിൽ ചെയർമാനും ഭരണസമിതിക്കും എതിരെ രൂക്ഷമായ വിമർശനങ്ങൾ ഉയരുകയും ചെയ്യുമ്പോഴും ഭരണനിർവഹണത്തിലും ജനക്ഷേമ പ്രവർത്തനത്തിലും ശ്രദ്ധിക്കാതെ രാഷ്ട്രീയ പകപോക്കലും അഴിമതിയും മാത്രം ലക്ഷ്യമിട്ടാണ് ഷാജു തുരുത്തന്റെ പ്രവർത്തനങ്ങൾ എന്ന് സംശയിക്കേണ്ടിയിരിക്കുന്ന രീതിയിലാണ് കാര്യങ്ങൾ. നഗരസഭ ഓഫീസിന് പിന്നിൽ കുന്നു കൂട്ടിയിട്ടിരിക്കുന്ന പ്ലാസ്റ്റിക് മാലിന്യങ്ങൾ ഉൾപ്പെടെ നീക്കുവാൻ ഒരു ശ്രമവും ഭരണകൂടത്തിന്റെ ഭാഗത്തുനിന്ന് ഉണ്ടായിട്ടില്ല. മഴ പെയ്യുമ്പോൾ ഈ മാലിന്യങ്ങൾ ഒഴുകി മീനച്ചിലാറ്റിൽ എത്തുകയാണ് ചെയ്യുന്നത്.

അനധികൃത വഴിയോര വാണിഭങ്ങൻ പാലായുടെ തെരുവുകൾ കീഴടക്കുമ്പോഴും വ്യാപാരി സമൂഹത്തിനുവേണ്ടി എന്തെങ്കിലും ചെയ്യുവാനും നഗര ഭരണകൂടത്തിന് കഴിയാറില്ല. അങ്ങനെയുള്ളപ്പോഴാണ് നിരവധി ആളുകൾക്ക് തൊഴിൽ കൊടുക്കുന്ന പ്രമുഖ സ്വർണ്ണ വ്യാപാര സ്ഥാപനത്തിനെതിരെ പകപോക്കൽ നടപടികളുമായി ചെയർമാൻ സ്ഥിരമായി പിന്നാലെ കൂടിയിരിക്കുന്നത്.