കർണാടകയില് രാഷ്ട്രീയ എതിരാളികളെ അപ്രതീക്ഷിത തന്ത്രങ്ങളിലൂടെ വീഴ്ത്തുന്നതില് കോണ്ഗ്രസിന്റെ മുൻനിര പോരാളിയായ ഡി.കെ.ശിവകുമാർ വീണ്ടും തന്റെ മിടുക്ക് തെളിയിച്ചിരിക്കുകയാണ്. അടുത്തിടെ നടന്ന എം.എല്.സി (നിയമസഭാ കൗണ്സില്) തിരഞ്ഞെടുപ്പില് അഞ്ച് കോണ്ഗ്രസ് സ്ഥാനാർത്ഥികളെയും വൻ ഭൂരിപക്ഷത്തില് വിജയിപ്പിച്ചുകൊണ്ട് അദ്ദേഹം കോണ്ഗ്രസിന്റെ ‘ചാണക്യൻ’ എന്ന തന്റെ ഖ്യാതി ഉറപ്പിച്ചിരിക്കുകയാണ്.
ചുരുങ്ങിയ വോട്ടുകള് മാത്രം ലഭിക്കുമെന്ന് കരുതിയിരുന്ന അഞ്ചാമത്തെ സ്ഥാനാർത്ഥി വിനയ് കാർത്തിക് കോണ്ഗ്രസ് നിരയില് ഏറ്റവും ഉയർന്ന ഭൂരിപക്ഷത്തോടെയാണ് വിജയിച്ചത്.
കർണാടക മുഖ്യമന്ത്രിയായി ചുമതലയേറ്റ ശേഷമുള്ള ശിവകുമാറിന്റെ ആദ്യത്തെ വലിയ രാഷ്ട്രീയ പരീക്ഷണം കൂടിയായിരുന്നു ഇത്. തിരഞ്ഞെടുപ്പ് നടന്ന ഏഴ് സീറ്റുകളില് അഞ്ചെണ്ണവും കോണ്ഗ്രസ് സ്വന്തമാക്കി. കേന്ദ്രമന്ത്രി എച്ച്.ഡി. കുമാരസ്വാമിക്ക് വലിയൊരു രാഷ്ട്രീയ പ്രഹരമേല്പ്പിച്ചുകൊണ്ട്, ബി.ജെ.പി – ജെ.ഡി.എസ് സഖ്യത്തിലെ 11 എം.എല്.എമാരെക്കൊണ്ട് കോണ്ഗ്രസിന് അനുകൂലമായി വോട്ട് ചെയ്യിക്കാൻ കഴിഞ്ഞ രണ്ടാഴ്ചയ്ക്കുള്ളില് ശിവകുമാറിന് സാധിച്ചു.
അപ്രതീക്ഷിത ക്രോസ് വോട്ടിംഗിലൂടെ കോണ്ഗ്രസിന് വൻ വിജയം
സ്വന്തം എം.എല്.എമാരെ ഒന്നിപ്പിച്ചു നിർത്താനും പാർട്ടി ശക്തി തെളിയിക്കാനുമായിരുന്നു ജെ.ഡി.എസ് തങ്ങളുടെ സ്ഥാനാർത്ഥിയായ ഗോവിന്ദ് രാജുവിനെ മത്സരരംഗത്തിറക്കിയത്. നിയമസഭയിലെ അംഗബലം അനുസരിച്ച് സ്വതന്ത്രരുടെയും പുറത്താക്കപ്പെട്ട ബി.ജെ.പി അംഗങ്ങളുടെയും പിന്തുണയോടെ കോണ്ഗ്രസിന് പരമാവധി 140 വോട്ടുകള് വരെയായിരുന്നു പ്രതീക്ഷിച്ചിരുന്നത്. എന്നാല് ഫലം വന്നപ്പോള് കോണ്ഗ്രസ് സ്ഥാനാർത്ഥികള്ക്ക് ആകെ 151 വോട്ടുകള് ലഭിച്ചു. ബി.ജെ.പിയില് നിന്നും ജെ.ഡി.എസില് നിന്നും വലിയ രീതിയില് ക്രോസ് വോട്ടിംഗ് നടന്നു എന്നാണ് ഇത് വ്യക്തമാക്കുന്നത്. ബി.ജെ.പിയുടെ നാല് വോട്ടുകള് അധികം ലഭിച്ചിട്ടും ജെ.ഡി.എസ് സ്ഥാനാർത്ഥിക്ക് വെറും 14 വോട്ടുകള് മാത്രമാണ് നേടാനായത്. വോട്ടുകള് നഷ്ടപ്പെടാതിരിക്കാൻ ഡി.കെ. ശിവകുമാറിന്റെ അടുത്ത അനുയായിയായ വിനയ് കാർത്തികിനെ അഞ്ചാമനായി നിർത്തിയത് കൃത്യമായ ഒരു തന്ത്രമായിരുന്നു. ഈ ഫലം വരാനിരിക്കുന്ന 2028-ലെ പൊതുതിരഞ്ഞെടുപ്പിന്റെ സൂചനയാണെന്ന് മുതിർന്ന കോണ്ഗ്രസ് നേതാവ് വി.എസ് ഉഗ്രപ്പ അഭിപ്രായപ്പെട്ടു. ബി.ജെ.പിയും ജെ.ഡി.എസും ഈ അപ്രതീക്ഷിത നീക്കത്തില് ഞെട്ടിപ്പോയെന്നും, ബി.ജെ.പി എപ്പോഴും വീമ്പു പറയുന്ന പാർട്ടി അച്ചടക്കം എവിടെപ്പോയെന്നും അദ്ദേഹം ചോദിച്ചു.
ക്രോസ് വോട്ടിംഗില് ഉലഞ്ഞ് ബി.ജെ.പിയും ജെ.ഡി.എസും
തിരഞ്ഞെടുപ്പില് അപാകതകള് സംഭവിച്ചതായി പ്രതിപക്ഷ നേതാവ് ആർ. അശോക സമ്മതിച്ചു. മൂന്ന് ബി.ജെ.പി എം.എല്.എമാർ കൂറുമാറി വോട്ട് ചെയ്തതായാണ് പാർട്ടി വിലയിരുത്തുന്നത്. തങ്ങളെ ചതിച്ചവർ ആരാണെന്ന് ഉടൻ കണ്ടെത്തുമെന്നും അവർക്കെതിരെ കർശന നടപടിയുണ്ടാകുമെന്നും അദ്ദേഹം വ്യക്തമാക്കി. ജെ.ഡി.എസിന് തങ്ങളുടെ എം.എ.എമാർക്കിടയിലെ ഭിന്നതയാണ് ഈ ഫലം കാണിക്കുന്നത്. ഡി.കെ. ശിവകുമാറിന്റെ കൃത്യമായ രാഷ്ട്രീയ തന്ത്രമാണ് എതിർപാളയത്തിലെ വോട്ടുകള് ചോർത്താൻ കാരണമായതെന്ന് കോണ്ഗ്രസ് വൃത്തങ്ങള് വ്യക്തമാക്കുന്നു. നിയമസഭയില് കോണ്ഗ്രസിന് വ്യക്തമായ ഭൂരിപക്ഷമുണ്ടായിരുന്നിട്ടും 151 വോട്ടുകള് ലഭിച്ചത് പ്രതിപക്ഷ സഖ്യത്തിലെ അസംതൃപ്തിയാണ് പുറത്തുകൊണ്ടുവരുന്നത്.
വരാനിരിക്കുന്ന തിരഞ്ഞെടുപ്പുകള്ക്കുള്ള കൃത്യമായ മുന്നറിയിപ്പ്
കോണ്ഗ്രസ് സർക്കാരിന്റെ ജനക്ഷേമ പദ്ധതികള്ക്കുള്ള ജനപ്രതിനിധികളുടെ അംഗീകാരമാണ് ഈ വിജയമെന്ന് കോണ്ഗ്രസ് ജനറല് സെക്രട്ടറി രണ്ദീപ് സിംഗ് സുർജേവാല പറഞ്ഞു. സംസ്ഥാനത്ത് നടപ്പിലാക്കിയ അഞ്ച് പ്രധാന ഗ്യാരന്റി പദ്ധതികള് നിർത്തലാക്കാനാണ് ബി.ജെ.പിയും ജെ.ഡി.എസും ശ്രമിച്ചതെന്നും എന്നാല് അവരുടെ സ്വന്തം എം.എ.എമാർക്ക് പോലും കോണ്ഗ്രസ് സർക്കാരിന്റെ നയങ്ങളിലാണ് വിശ്വാസമെന്നും അദ്ദേഹം കൂട്ടിച്ചേർത്തു. അതേസമയം, പാർട്ടി നിർദ്ദേശം ലംഘിച്ച് വോട്ട് ചെയ്ത എസ്.ടി. സോമശേഖർ, എ. ശിവറാം ഹെബ്ബാർ ഉള്പ്പെടെയുള്ള നേതാക്കള് തങ്ങള് മനസ്സാക്ഷി വോട്ടാണ് രേഖപ്പെടുത്തിയതെന്നാണ് പ്രതികരിച്ചത്. ബി.ജെ.പി സംസ്ഥാന നേതൃത്വത്തിന്റെ പരാജയമാണ് ഈ ഫലമെന്ന് കോണ്ഗ്രസ് നേതാക്കള് പരിഹസിച്ചു. ഈ തിരിച്ചടിയെ തുടർന്ന് ബി.ജെ.പിയും ജെ.ഡി.എസും തങ്ങളുടെ പാർട്ടിക്കുള്ളിലെ ചോർച്ച കണ്ടെത്താനായി അടിയന്തര അവലോകന യോഗങ്ങള് വിളിച്ചുചേർത്തിരിക്കുകയാണ്.
