13 വർഷമായി കോമയില്ക്കഴിയുന്ന മുപ്പത്തിയൊന്നുകാരൻ ഹരീഷ് റാണയ്ക്ക് ദയാവധത്തിന് സുപ്രിംകോടതി അനുമതി. ദയാവധം നിയമവിധേയമാക്കിയതിന് ശേഷമുള്ള ആദ്യ വിധിയാണിത്.ഘട്ടം ഘട്ടമായി ചികിത്സ അവസാനിപ്പിക്കാമെന്ന് സുപ്രിംകോടതി വ്യക്തമാക്കി.
ഹരീഷ് റാണയുടെ ജീവന് രക്ഷാ ചികിത്സ പിന്വലിക്കാന് അനുവദിക്കണമെന്ന ഹര്ജിയിലാണ് സുപ്രീംകോടതിയുടെ നിര്ണായക വിധി. ഹരീഷ് റാണയുടെ മാതാപിതാക്കളായിരുന്നു സുപ്രീംകോടതിയെ സമീപിച്ചത്.2013-ല് ചണ്ഡീഗഡിലെ പഠനത്തിനിടെ കെട്ടിടത്തിന് മുകളില് നിന്ന് വീണാണ് ഹരീഷിന് തലയ്ക്ക് ഗുരുതരമായി പരിക്കേറ്റത്.
മകന്റെ ദുരിതം കാണാൻ വയ്യെന്നും സാമ്പത്തികമായി തകർന്നുവെന്നും ചൂണ്ടിക്കാട്ടിയാണ് മാതാപിതാക്കള് ദയാവധത്തിന് അനുമതി തേടിയത്. മെഡിക്കല് ബോർഡിന്റെ റിപ്പോർട്ട് പരിശോധിച്ച ശേഷമാണ് സുപ്രീംകോടതി ദയാവധത്തിന് അനുമതി നല്കിയത്. ആരോഗ്യനിലയില് കാര്യമായ പുരോഗതി ഉണ്ടായെന്ന് റിപ്പോർട്ടില് പരാമർശിച്ചിട്ടില്ല.
