തദ്ദേശ തെരഞ്ഞെടുപ്പ് സീറ്റ് വിഭജനം: കോട്ടയം ജില്ലയിൽ ഇരുമുന്നണികൾക്കും തലവേദനയായി കേരള കോൺഗ്രസുകൾ; മാണിയും ജോസഫും വിലപേശുന്നത് തല മറന്ന് എണ്ണ തേക്കല്ലോ?

കഴിഞ്ഞ തവണത്തെ സീറ്റ് വിഭജനം:

• സി.പി.എം : 9
• മാണി ഗ്രൂപ്പ് : 9
• സി.പി.ഐ : 4

വല്യേട്ടൻ കളിയ്‌ക്ക് നിന്ന് കൊടുക്കരുത്; മാണി ഗ്രൂപ്പിന് പത്ത് സീറ്റ് നല്‍കുന്നതില്‍ എതിർപ്പ്

സിപിഎമ്മിനേക്കാൾ ഒരു സീറ്റിൽ അധികം മത്സരിക്കാനുള്ള മാണി ഗ്രൂപ്പിൻറെ നീക്കമാണ് സിപിഎമ്മിലെ ഒരു വിഭാഗത്തെ പ്രകോപിപ്പിച്ചത്. കോട്ടയം ജില്ലയിൽ മാണിക്കാരുടെ വല്യേട്ടൻ കളിക്ക് നിന്നു കൊടുക്കേണ്ടതില്ല എന്ന നിലപാടിലാണ് അവർ. പൊതുസ്വതന്ത്രനെ അവതരിപ്പിച്ച് സീറ്റുകൾ ഒപ്പത്തിനൊപ്പം ആക്കാം എന്ന ധാരണയോട് സിപിഐ കൂടി അനുകൂലമായി പ്രതികരിച്ചതോടെ മാണി ഗ്രൂപ്പ് വെട്ടിലായിട്ടുണ്ട്.

യുഡിഎഫിലും തലവേദന കേരള കോൺഗ്രസ്

സ്ഥാനാർത്ഥികളെ കണ്ടെത്താൻ നെട്ടോട്ടം ഓടുമ്പോഴും അത് സീറ്റുകൾ വിട്ടുകൊടുക്കില്ല എന്ന നിലപാടാണ് യുഡിഎഫിലും ജോസഫ് ഗ്രൂപ്പ് സ്വീകരിച്ചിരിക്കുന്നത്. കഴിഞ്ഞതവണ എട്ട് സീറ്റിൽ മത്സരിച്ച് രണ്ടിടത്ത് മാത്രം വിജയിച്ച ജോസഫ് ഗ്രൂപ്പിൽ നിന്നും കുറഞ്ഞത് മൂന്നു സീറ്റ് എങ്കിലും ഏറ്റെടുക്കാനാണ് കോൺഗ്രസ് തീരുമാനം. എന്നാൽ വിട്ടുവീഴ്ചയില്ല എന്ന നിലപാടിലുറച്ച് ജോസഫ് ഗ്രൂപ്പ് മുന്നോട്ടുപോകുമ്പോൾ അത് മുന്നണിക്ക് തലവേദനയാകുന്നു. വിജയ് സാധ്യതയും സ്വന്തം കഴിവും പരിഗണിക്കാതെ കുറെ നേതാക്കൾക്ക് സീറ്റ് കൊടുക്കുക എന്ന നിലപാടുമായി ജോസഫ് ഗ്രൂപ്പ് മുന്നോട്ടു പോകുമ്പോൾ അത് അംഗീകരിക്കാൻ കഴിയില്ല എന്ന് കടുത്ത തീരുമാനവും ആയിട്ടാണ് കോൺഗ്രസ് നിലയുറപ്പിക്കുന്നത്. ജില്ലയിൽ ഇത്തവണ ഒരു സീറ്റ് എങ്കിലും ലഭിച്ചേ മതിയാകൂ എന്ന് കടുത്ത നിലപാടിൽ ലീഗും മുന്നോട്ടു പോകുന്നു. ലീഗിനെ അനുനയിപ്പിക്കുവാൻ ഈരാറ്റുപേട്ട നഗരസഭയിൽ കൂടുതൽ സീറ്റ് അനുവദിക്കാനാണ് കോൺഗ്രസ് നീക്കം.