കെപിസിസി അധ്യക്ഷൻ: ആന്റോ ആന്റണിയുടെ പേര് ഇന്നുതന്നെ പ്രഖ്യാപിക്കുമെന്ന് സൂചന; പ്രഖ്യാപനം വന്നാൽ നിയുക്ത പ്രസിഡന്റ് ആദ്യം എത്തുക പുതുപ്പള്ളിയിൽ ഉമ്മൻചാണ്ടിയുടെ കല്ലറയിൽ എന്നും റിപ്പോർട്ടുകൾ; തയ്യാറെടുപ്പുകൾ ഇങ്ങനെ

പിസി ജോർജ് എന്നും ശത്രുപക്ഷത്ത് നിർത്തിയിട്ടുള്ള നേതാവാണ് ആന്റോ ആൻറണി. 2014ലും 19ലും 24ലും ആന്റോയെ പത്തനംതിട്ടയിൽ പരാജയപ്പെടുത്തുമെന്ന് പിസി ജോർജ് പ്രഖ്യാപിച്ചിട്ടുണ്ടായിരുന്നു എങ്കിലും ജോർജിന്റെ തട്ടകമായ പൂഞ്ഞാറിൽ അടക്കം വൻഭൂരിപക്ഷം നേടിയാണ് ആന്റോ വിജയിച്ചത്. 2014ൽ പൂഞ്ഞാറിൽ തെരഞ്ഞെടുപ്പ് പ്രചാരണത്തിനിടെ ജോർജിന്റെ അനുയായികളും കോൺഗ്രസ് പ്രവർത്തകരും തമ്മിൽ പലവട്ടം സംഘർഷം ഉണ്ടാവുകയും ഫലപ്രഖ്യാപനത്തിനുശേഷം കോൺഗ്രസ്, യൂത്ത് കോൺഗ്രസ് പ്രവർത്തകർ ഈരാറ്റുപേട്ട ടൗണിൽ ഇട്ട് ഷോൺ ജോർജിനെ മർദ്ദിക്കുകയും ചെയ്ത സംഭവങ്ങൾ ഉണ്ടായിട്ടുണ്ട്. ഇങ്ങനെ വേണ്ടിവന്നാൽ വാടാ പോടാ രാഷ്ട്രീയം കൈകാര്യം ചെയ്യാൻ ഉൾപ്പെടെ അറിയാവുന്ന നേതാവാണ് കെപിസിസി പദവിയിലേക്ക് എത്തുമെന്ന് കരുതപ്പെടുന്നത്.

ആദ്യമെത്തുക ഉമ്മൻചാണ്ടിയുടെ കല്ലറയിലേക്ക്

കെപിസിസി അധ്യക്ഷനായി നിയമനം ഉണ്ടായാൽ ഉടൻ ആന്റോ ആന്റണി ഉമ്മൻചാണ്ടിയുടെ കല്ലറ സന്ദർശിക്കുമെന്നാണ് ഇപ്പോൾ അറിയാൻ കഴിയുന്നത്. ഇതിനുള്ള മുന്നൊരുക്കങ്ങൾ പൂർത്തിയായിട്ടുണ്ട്. ഇതിനായി മുൻ നിശ്ചയിച്ച പരിപാടികൾ ഒഴിവാക്കി ചാണ്ടി ഉമ്മൻ എംഎൽഎ പുതുപ്പള്ളിയിൽ തന്നെ ക്യാമ്പ് ചെയ്യുന്നുണ്ട്. ക്രൈസ്തവഴതാത്പര്യവും മധ്യതിരിവിതാംകൂറിലെ കോൺഗ്രസ് സാധ്യതകളും മുൻനിർത്തിയാണ് ആന്റോ ആന്റണിയുടെ പേരിലേക്ക് ഹൈക്കമാൻഡ് എത്തിയതെന്നാണ് സൂചന.