ദക്ഷിണ കൊറിയയില് ലാൻഡിങ്ങിനിടെ വിമാനം റണ്വേയില് നിന്ന് തെന്നിമാറി സുരക്ഷാവേലിയിലിടിച്ച് അപകടം. ബാങ്കോക്കില് നിന്ന് 181 പേരുമായി സഞ്ചരിച്ച ജെജു എയർ വിമാനമാണ് ദക്ഷിണ കൊറിയയിലെ മുവാൻ രാജ്യാന്തര വിമാനത്താവളത്തില് ലാൻഡിങ്ങിനിടെ അപകടത്തില്പ്പെട്ടത്.ഇതുവരെ 85 പേരുടെ മരണം സ്ഥിരീകരിച്ചതായി വാർത്താ ഏജൻസികള് റിപ്പോർട്ട് ചെയ്തു.
രക്ഷാപ്രവർത്തനം നടന്നുവരികയാണ്.175 യാത്രക്കാരും ആറ് ജീവനക്കാരുമാണ് വിമാനത്തില് ഉണ്ടായിരുന്നത്. അപകടത്തില്പ്പെട്ട വിമാനത്തിന്റെ ചിത്രങ്ങള് പ്രാദേശിക മാധ്യമങ്ങള് പങ്കുവെച്ചിട്ടുണ്ട്. പ്രാദേശിക സമയം രാവിലെ 09.07-നായിരുന്നു അപകടം.
തായ്ലൻഡിലെ ബാങ്കോക്കില് നിന്ന് പുറപ്പെട്ട വിമാനം തെക്കുപടിഞ്ഞാറൻ തീരദേശ വിമാനത്താവളമായ മുവാനില് ലാൻഡ് ചെയ്യാൻ ശ്രമിക്കുന്നതിനിടെയായിരുന്നു അപകടം. റണ്വേയില് നിന്ന് തെന്നിമാറിയ വിമാനം സുരക്ഷാവേലിയില് ഇടിച്ച് കത്തിയമരുകയായിരുന്നു. വിമാനത്തിലെ 175 യാത്രക്കാരില് 173 പേർ ദക്ഷിണ കൊറിയൻ പൗരൻമാരും രണ്ടുപേർ തായ്ലൻഡ് സ്വദേശികളുമാണെന്ന് അധികൃതർ അറിയിച്ചു.
