മുണ്ടക്കൈ ചൂരല്മല ഉരുള്പ്പൊട്ടല് ദുരന്തത്തില് കേന്ദ്ര സര്ക്കാരിന്റെ അവഗണന ആരോപിച്ച് നവംബര് 19ന് വയനാട് ജില്ലയില് ഹര്ത്താല് പ്രഖ്യാപിച്ച് യുഡിഎഫും എല്ഡിഎഫും. രാവിലെ ആറ് മുതല് വൈകിട്ട് ആറ് വരെയാണ് ഹര്ത്താല്.
ദേശീയ ദുരന്തമായി പ്രഖ്യാപിക്കാത്ത കേന്ദ്ര നടപടിയില് പ്രതിഷേധിച്ചാണ് ഹര്ത്താല്. അവശ്യ സര്വീസുകളെ ഹര്ത്താലില് നിന്ന് ഒഴിവാക്കിയിട്ടുണ്ട്. ഉരുള്പൊട്ടല് ദുരന്തത്തെ ദേശീയ ദുരന്തമായി പ്രഖ്യാപിക്കാന് കഴിയില്ലെന്ന കേന്ദ്രനിലപാടിനെതിരെ കോണ്ഗ്രസ് നേതാവ് പ്രിയങ്ക ഗാന്ധി രംഗത്തെത്തിയിരുന്നു. വയനാട്ടിലെ ജനങ്ങള് കൂടുതല് അര്ഹിക്കുന്നുണ്ടെന്നും പ്രിയങ്ക ഗാന്ധി പറഞ്ഞു.
പുനരധിവാസം വൈകുന്ന സാഹചര്യത്തില് ഇനിയും കൈയ്യും കെട്ടി നോക്കിയിരിക്കാന് സാധിക്കില്ലെന്ന് ടി സിദ്ധിഖ് എംഎല്എയും വ്യക്തമാക്കി. വിഷയത്തിൽ പ്രക്ഷോഭം ഘടിപ്പിക്കാൻ തന്നെയാണ് ഇടതു വലതുമുന്നണികളുടെ തീരുമാനം. എന്നാൽ സംയുക്ത പ്രതിഷേധം ഉണ്ടാകാനുള്ള സാധ്യതയും ഇല്ല. യുഡിഎഫ് ഒറ്റയ്ക്ക് പ്രതിഷേധിക്കുമെന്നാണ് പ്രതിപക്ഷ നേതാവ് വി ഡി സതീശൻ വ്യക്തമാക്കിയത്.
