പ്രിയപ്പെട്ടവരുടെ പിറന്നാള് മറന്നുപോയി പിന്നീട് ആശംസകള് അറിയിക്കേണ്ടി വന്ന അനുഭവം പലർക്കും ഉണ്ടായിട്ടുണ്ടാകും.അത്തരക്കാർ ഇനി വിഷമിക്കേണ്ട. നിങ്ങളുടെ കോണ്ടാക്റ്റിലുള്ളവരുടെ ജന്മദിനം സ്വയം ഓർമ്മിപ്പിച്ച്, ഒറ്റ ടാപ്പില് തന്നെ ആശംസകള് അയയ്ക്കാൻ സഹായിക്കുന്ന പുതിയ ഫീച്ചറുമായാണ് വാട്സ്ആപ്പ് എത്താനൊരുങ്ങുന്നത്.
ഉപയോക്താക്കള്ക്കായി ‘ബർത്ത്ഡേ നോട്ടിഫിക്കേഷൻ’ ഫീച്ചറാണ് കമ്പനി പരീക്ഷണഘട്ടത്തില് വികസിപ്പിക്കുന്നത്.വാട്സ്ആപ്പ് ഫീച്ചർ ട്രാക്കറായ വാബീറ്റാഇൻഫോ പുറത്തുവിട്ട വിവരങ്ങള് പ്രകാരം, ആൻഡ്രോയിഡിനായുള്ള ബീറ്റ പതിപ്പിലാണ് ഈ സംവിധാനത്തിന്റെ സൂചനകള് കണ്ടെത്തിയത്. ഭാവിയിലെ അപ്ഡേറ്റിലൂടെ ഇത് എല്ലാ ഉപയോക്താക്കള്ക്കും ലഭ്യമാകുമെന്നാണ് പ്രതീക്ഷ.
‘ബർത്ത്ഡേയ്സ്’ എന്ന പ്രത്യേക വിഭാഗം
പുതിയ ഫീച്ചറിന്റെ ഭാഗമായി ‘ബർത്ത്ഡേയ്സ്’ എന്ന പേരില് പ്രത്യേക വിഭാഗം വാട്സ്ആപ്പില് അവതരിപ്പിക്കാനാണ് പദ്ധതി. ഉപയോക്താവിന്റെ കോണ്ടാക്ട് ലിസ്റ്റിലുള്ളവരുടെ വരാനിരിക്കുന്ന ജന്മദിനങ്ങള് ഈ വിഭാഗത്തില് ഒരുമിച്ച് പ്രദർശിപ്പിക്കും. ഇതിലൂടെ പിറന്നാള് ഓർക്കാൻ കലണ്ടറുകളെയോ മറ്റ് റിമൈൻഡർ ആപ്പുകളെയോ ആശ്രയിക്കേണ്ട സാഹചര്യം കുറയും.
നോട്ടിഫിക്കേഷൻ ലഭിക്കും, ആശംസകള് അയയ്ക്കാം
ഒരു കോണ്ടാക്ടിന്റെ ജന്മദിനം എത്തുമ്പോള് വാട്സ്ആപ്പ് ഇൻ-ആപ്പ് നോട്ടിഫിക്കേഷൻ അയച്ച് ഉപയോക്താവിനെ ഓർമ്മിപ്പിക്കും. നോട്ടിഫിക്കേഷനില് ടാപ്പ് ചെയ്താല് നേരിട്ട് ആ വ്യക്തിയുടെ ചാറ്റിലേക്ക് പ്രവേശിക്കാനും ഉടൻ തന്നെ ജന്മദിനാശംസകള് അയയ്ക്കാനും സാധിക്കും. ഉപയോക്തൃ അനുഭവം കൂടുതല് ലളിതവും സൗകര്യപ്രദവുമാക്കുക എന്നതാണ് ഈ ഫീച്ചറിലൂടെ കമ്പനിയുടെ ലക്ഷ്യം.
എല്ലാ കോണ്ടാക്ടുകള്ക്കും ലഭിക്കില്ല
എന്നാല് ഈ സംവിധാനം എല്ലാ കോണ്ടാക്ടുകള്ക്കും ബാധകമാകില്ല. ബന്ധപ്പെട്ട വ്യക്തി തന്റെ ജനനത്തീയതി വാട്സ്ആപ്പില് നല്കിയിട്ടുണ്ടെങ്കില് മാത്രമേ അവരുടെ ജന്മദിനം ‘ബർത്ത്ഡേയ്സ്’ വിഭാഗത്തില് കാണിക്കുകയോ നോട്ടിഫിക്കേഷൻ ലഭിക്കുകയോ ചെയ്യൂ.
ജനനത്തീയതി എവിടെ നിന്നാണ്?
നിലവില് അമേരിക്കയിലെ ചില സംസ്ഥാനങ്ങളില് പ്രായപരിശോധനാ നിയമങ്ങളുടെ ഭാഗമായി ഉപയോക്താക്കളില് നിന്ന് വാട്സ്ആപ്പ് ജനനത്തീയതി ശേഖരിക്കുന്നുണ്ട്. ഈ വിവരങ്ങളാണ് പുതിയ ഫീച്ചറിന് അടിസ്ഥാനമാകാൻ സാധ്യതയുള്ളതെന്നാണ് റിപ്പോർട്ട്. മറ്റ് രാജ്യങ്ങളില് ഇത്തരമൊരു നിർബന്ധിത വിവരശേഖരണം നിലവിലില്ലാത്തതിനാല്, ഉപയോക്താക്കള് സ്വമേധയാ ജനനത്തീയതി ചേർത്താല് മാത്രമേ ഈ സൗകര്യം കൂടുതല് വ്യാപകമായി പ്രയോജനപ്പെടുത്താൻ കഴിയൂ.
സ്വകാര്യതയെക്കുറിച്ചും ചർച്ച
ഫീച്ചറുമായി ബന്ധപ്പെട്ട സ്വകാര്യതാ ക്രമീകരണങ്ങളില് ഇപ്പോഴും വ്യക്തതയില്ല. ജനനത്തീയതി ആരെല്ലാം കാണണം, ആരില് നിന്ന് മറച്ചുവയ്ക്കണം തുടങ്ങിയ നിയന്ത്രണങ്ങള് നിലവിലെ പരീക്ഷണ പതിപ്പില് ഉള്പ്പെടുത്തിയിട്ടില്ലെന്നാണ് റിപ്പോർട്ടുകള്. അന്തിമ പതിപ്പില് ഇത്തരം സ്വകാര്യതാ ഓപ്ഷനുകള് ഉള്പ്പെടുത്തുമോയെന്ന കാര്യത്തില് കമ്പനി ഇതുവരെ ഔദ്യോഗിക വിശദീകരണം നല്കിയിട്ടില്ല.
ഇപ്പോള് പരീക്ഷണ ഘട്ടത്തില് മാത്രം
ആൻഡ്രോയിഡിനായുള്ള വാട്സ് ആപ്പ് ബീറ്റാ 2.26.27.3 പതിപ്പിലാണ് ഈ ഫീച്ചറിന്റെ സൂചനകള് കണ്ടെത്തിയത്. എന്നാല് ഇത് ഇപ്പോഴും വികസനഘട്ടത്തിലായതിനാല് ബീറ്റ ഉപയോക്താക്കള്ക്ക് പോലും ലഭ്യമല്ല. ഔദ്യോഗിക പ്രഖ്യാപനമോ റിലീസ് തീയതിയോ കമ്പനി പുറത്തുവിട്ടിട്ടില്ല.
പിറന്നാള് മറന്നുപോകുന്നവർക്കുള്ള ഒരു ചെറിയ റിമൈൻഡർ മാത്രമല്ല, പ്രിയപ്പെട്ടവരുമായി ബന്ധം കൂടുതല് സജീവമാക്കുന്ന സൗകര്യമായും ഈ ഫീച്ചർ മാറുമെന്നാണ് വിലയിരുത്തല്. എന്നാല് സ്വകാര്യതാ ക്രമീകരണങ്ങള് ഉള്പ്പെടെയുള്ള അന്തിമ രൂപം എന്തായിരിക്കുമെന്നത് വാട്സ്ആപ്പിന്റെ ഔദ്യോഗിക പ്രഖ്യാപനത്തോടെ മാത്രമേ വ്യക്തമാകൂ.
