വടുതല കർഷക റോഡിലെ വാടക വീട്ടില് കുടുംബാംഗങ്ങളായ അഞ്ചു പേർ മരിച്ച നിലയില് കണ്ടെത്തിയതില് അന്വേഷണം ഊർജ്ജിതമാക്കി പൊലീസ്.മക്കള്ക്ക് വിഷം നല്കിയ ശേഷം ശ്രീകുമാരിയും അശ്വതിയും തൂങ്ങിമരിക്കുകയും ചെയ്തുവെന്നാണ് പൊലീസ് നിഗമനം.
കുട്ടികള്ക്ക് നല്കിയ വിഷപദാർഥം ഓണ്ലൈനില് ഓർഡർ ചെയ്ത് വരുത്തുകയായിരുന്നുവെന്നാണ് പൊലീസിന്റെ സംശയം. ഇവരുടെ ഫോണുകള് പരിശോധനയ്ക്കായി എടുത്തിട്ടുണ്ട്. അഞ്ച് പേരുടേയും മൃതദേഹങ്ങള് പച്ചാളം വൈദ്യുതി ശ്മശാനത്തില് സംസ്കാരം നടത്തി.
തിരുവനന്തപുരം വിളപ്പില്ശാല കാരോട് കനകവിഹാറില് സുരേന്ദ്രൻ നായരുടെ ഭാര്യ ശ്രീകുമാരി (59), മകള് അശ്വതി എസ്. നായർ (36), മക്കളായ കാർണിവൻ (14), കീർത്തിവൻ (അഞ്ച്), അക്ഷിത (രണ്ട്) എന്നിവരെയായിരുന്നു ശനിയാ ഴ്ച രാവിലെ വടുതലയിലെ വാടകവീട്ടില് മരിച്ച നിലയില് കണ്ടെത്തിയത്.
ആന്തരികാവയവങ്ങളുടെ രാസപരിശോധനാ റിപ്പോർട്ട് വന്നാല് മാത്രമേ മരണകാരണം വ്യക്തമാകൂ. വടുതലയില് വാടകയ്ക്ക് താമസം ആരംഭിച്ചതു മുതല് കുടുംബം ഭക്ഷണവും വെള്ളവും മറ്റും ഓണ്ലൈനിലൂടെയാണ് വാങ്ങിയിരുന്നത്. പുറത്തുപോകുന്ന പതിവില്ലാത്ത സാഹചര്യത്തിലാണ് ഓണ്ലൈനിലൂടെയാകും വിഷപദാർഥവും വാങ്ങിയതെന്ന സംശയം തോന്നിയത്. മൂന്ന് കുപ്പി വിഷപദാർഥമാണ് വാങ്ങിയത്. ഇതില് രണ്ടെണ്ണമാണ് ഉപയോഗിച്ചത്. തുറക്കാത്ത കുപ്പിയും മൂന്ന് ഒഴിഞ്ഞ ജ്യൂസ് ബോട്ടിലുകളും മറ്റും കണ്ടെടുത്തിട്ടുണ്ട്. ഇവർ തിരുവനന്തപുരത്ത് വാടകയ്ക്ക് നല്കിയ വീട്ടില് കുറച്ചു നാള് മുമ്പ് പോയിരുന്നതായും പറയുന്നു. സംഭവത്തില് വിശദമായ അന്വേഷണം നടത്തുന്നുണ്ട് പൊലീസ്.
മരണ വിവരമറിഞ്ഞ് ഇവരുടെ ബന്ധുക്കള് കൊച്ചിയിലെത്തിയിരുന്നു. തിരുവനന്തപുരത്തേയ്ക്ക് മൃതദേഹം കൊണ്ടുപോകാനുള്ള ബുദ്ധിമുട്ടും സാമ്പത്തിക പ്രതിസന്ധിയും അറിയിച്ചതോടെ മേയർ വി കെ മിനിമോള്, കൗണ്സിലർ ആല്ബർട്ട് അമ്പലത്തിങ്കല് എന്നിവരുടെ നേതൃത്വത്തില് പച്ചാളം ശ്മശാനത്തില് സംസ്കാരം നടത്തിയത്. വൈകീട്ട് ആറു മണിയോടെയാണ് സംസ്കാരം നടന്നത്.
രണ്ട് മാസം മുമ്പാണ് അശ്വതിയും കുട്ടികളും അമ്മയും മൂത്തമകന്റെ ചികിത്സാർഥം വടുതലയില് വീട് വാടകയ്ക്കെടുത്തത്. വീട്ടില് ആളനക്കം കാണാത്തതിനെത്തുടർന്ന് ശനിയാഴ്ച രാവിലെ വീട്ടുടമയുടെ സഹോദരന്റെ മകൻ വന്ന് നോക്കിയപ്പോഴാണ് മരണ വിവരം പുറത്തു വരുന്നത്. കരള്രോഗ ബാധിതനായിരുന്ന അശ്വതിയുടെ ഭർത്താവ് അക്ഷത് ഏഴ് മാസം മുമ്പ് ആത്മഹത്യ ചെയ്തിരുന്നു. ഈ ആഘാതത്തെ തുടർന്ന് കുടുംബത്തില് തർക്കങ്ങളും പ്രശ്നങ്ങളും ഉണ്ടായി. പൊലീസിന് ലഭിച്ച ആത്മഹത്യാക്കുറിപ്പിലും കുടുംബ പ്രശ്നങ്ങള് സൂചിപ്പിച്ചിട്ടുണ്ട്.
