അടിസ്ഥാന സൗകര്യങ്ങള് ഇല്ലാത്ത കിനാലൂരില് എയിംസ് അനുവദിക്കാത്തതിന്റെ പേരില് കേന്ദ്രത്തെ പഴിക്കുന്ന സംസ്ഥാന സര്ക്കാര് ആരോഗ്യ മേഖലക്ക് കഴിഞ്ഞ അഞ്ച് വര്ഷത്തിനിടെ കേന്ദ്രം നല്കിയ 5000 കോടിയുടെ സാമ്പത്തിക സഹായം ജനങ്ങളില് നിന്നും മറച്ചുവച്ചു.4137.38 കോടി രൂപയാണ് കേന്ദ്രം 2021-2025 വര്ഷങ്ങളിലായി കേരളത്തിന് നല്കിയത്.
കൂടാതെ പ്രധാനമന്ത്രി ആയുഷ്മാന് ഭാരത് ഹെല്ത്ത് ഇന്ഫ്രാസ്ട്രക്ചര് മിഷന് പ്രകാരം 2024-25 വര്ഷം മാത്രം 53.22 കോടിയും നല്കി. പക്ഷേ കേന്ദ്രസഹായം മറച്ചുവച്ച് വികസന പദ്ധതിയുടെ ഉത്തരവാദിത്വം മുഴുവന് ഏറ്റെടുക്കാനാണ് സംസ്ഥാന സര്ക്കാര് ശ്രമിച്ചത്.
എയിംസ് അനുവദിക്കുന്നതിന് 200 ഏക്കറില് കുറയാത്ത അടിസ്ഥാനസൗകര്യങ്ങളുള്ള നാല് സ്ഥലങ്ങള് നിര്ദേശിക്കാനാണ് കേന്ദ്ര ആരോഗ്യ, കുടുംബക്ഷേമ മന്ത്രാലയം സംസ്ഥാന സര്ക്കാരിനോട് ആവശ്യപ്പെട്ടിരുന്നത്. എന്നാല് കേവലം 151.58 ഏക്കര് മാത്രം വിസ്തൃതിയുള്ള സ്ഥലമാണ് കിനാലൂരില് എയിംസിനായി ഇടതുസര്ക്കാര് ചൂണ്ടിക്കാട്ടിയത്. ഇത് വ്യവസ്ഥകള്ക്ക് വിരുദ്ധമായതിനാലാണ് കേന്ദ്രസര്ക്കാര് പദ്ധതി നിരസിച്ചത്.
കോട്ടയം ജില്ലയിലെ വെള്ളൂര് ന്യൂസ് പ്രിന്റ് ഫാക്ടറിയുടെ 200 ഏക്കര് സ്ഥലം എയിംസിനായി കണ്ടെത്തി നല്കണമെന്ന് ആവശ്യപ്പെട്ട് ഗ്രേറ്റര് പിറവം ഡവലപ്മെന്റ് ഫോറം ഹൈക്കോടതിയില് ഹര്ജി സമര്പ്പിച്ചിരുന്നു. ഇതേത്തുടര്ന്ന് കേന്ദ്ര സര്ക്കാര് കോടതിയില് നല്കിയ സത്യവാങ്മൂലത്തിലാണ് 5000 കോടി ധനസഹായം 2001-2026 കാലയളവില് കേരളത്തിന് നല്കിയെന്നു വ്യക്തമാക്കിയത്.
സംസ്ഥാനത്തെ ആലപ്പുഴ, തിരുവനന്തപുരം, കോഴിക്കോട് മെഡിക്കല് കോളജുകളില് സൂപ്പര് സ്പെഷാലിറ്റി ബ്ലോക്കുകള് നിര്മിച്ച് നിലവാരം ഉയര്ത്താന് കേന്ദ്രസര്ക്കാര് പണം അനുവദിച്ച കാര്യവും ഇടതുസര്ക്കാര് മറച്ചുവച്ചു. ഒപ്പം ശ്രീചിത്ര ഇന്സ്റ്റിറ്റിയൂട്ട് ഓഫ് മെഡിക്കല് സയന്സ് ആന്ഡ് ടെക്നോളജിയുടെ വികസനവും കേന്ദ്രസഹായത്തോടെ നടത്തി. ഇവിടുത്തെ ഐസിയുവില് 170 ബെഡുകള് കൂടുതലായി അനുവദിച്ചു. ഒപ്പം എട്ട് ഓപ്പറേഷന് തീയറ്ററുകളും പുതുതായി നിര്മിച്ചതായി കേന്ദ്രത്തിന്റെ സത്യവാങ്മൂലത്തില് പറയുന്നു.
കേന്ദ്ര മാനദണ്ഡങ്ങള് അനുസരിച്ചുള്ള സൗകര്യങ്ങള് ഉള്ള സ്ഥലമാണ് എയിംസ് അനുവദിക്കാന് ആവശ്യം. കുറഞ്ഞത് 200 ഏക്കര് സ്ഥലം പദ്ധതിക്ക് ആവശ്യമാണ്. ഫോര് വേ കണക്റ്റിവിറ്റി, ശുദ്ധജല ലഭ്യത, വൈദ്യുതി, നഗര സാമീപ്യം, മെഡിക്കല് കോളജുകളുടെ അഭാവം എന്നിവയാണ് മറ്റു പ്രധാന മാനദണ്ഡങ്ങള്.
