മദ്യലഹരിയില് അമിതവേഗത്തില് കാറോടിച്ച് അപകടമുണ്ടാക്കി യുവാവ്. അപകടത്തില് നിന്ന്മോന്സ് ജോസഫ് എംഎല്എ (Mons Joseph MLA) രക്ഷപ്പെട്ടത് തലനാരിഴയ്ക്ക്. ഞായറാഴ്ച രാവിലെയായിരുന്നു സംഭവം. കാറോടിച്ചിരുന്ന യുവാവ് മദ്യലഹരിയിലായിരുന്നുവെന്നാണ് ലഭിക്കുന്ന വിവരം.
രാവിലെ അറുനൂറ്റിമംഗലത്തായിരുന്നു സംഭവം.മുളക്കുളം ഭാഗത്തുനിന്ന് പാഞ്ഞെത്തിയ കാര് റോഡരികില് നാട്ടുകാരുമായി സംസാരിച്ചു നില്ക്കുകയായിരുന്ന മോന്സ് ജോസഫ് എംഎല്എ നേരെയാണ് വന്നത്. ഒപ്പമുള്ളവര് മോൻസിനെ പിടിച്ച് മാറ്റിയതിനാലാണ് വന്അപകടം ഒഴിവായത്.
കാറിന്റെ മുന്വശം റോഡില് ഇറക്കിയിട്ടിരുന്ന മണ്ണില് ഇടിച്ചതോടെയാണ് വാഹനം നിന്നത്. തുടര്ന്ന് പിന്നോട്ടെടുത്ത കാര് നാട്ടുകാരായ രണ്ടുപേരുടെ ദേഹത്തും തട്ടി. നാട്ടുകാര് കാര് തടഞ്ഞ് ഡോര് തുറന്നതോടെ ഡ്രൈവറായ യുവാവ് മദ്യലഹരിയിലാണെന്നു മനസ്സിലായി.
നാട്ടുകാരില് പലര്ക്കും പരിചയമുള്ള ആളായിരുന്നു യുവാവ്. സംഭവത്തില് പരാതിയില്ലെന്ന് എംഎല്എ പറഞ്ഞു. വെള്ളൂര് പൊലീസും സ്ഥലത്ത് എത്തിയിരുന്നു.
