ആദായനികുതി അടയ്ക്കാത്ത ക്രൈസ്തവ ജീവനക്കാരുടെ വിവരങ്ങള് തേടി ഉപജില്ലാ വിദ്യാഭ്യാസ ഓഫീസര് സര്ക്കാര്, എയ്ഡഡ്, അണ്എയ്ഡഡ് സ്കൂളുകളിലെ പ്രധാനാധ്യാപകര്ക്ക് കത്ത്. സര്ക്കാര് ശമ്ബളം വാങ്ങുന്ന ക്രിസ്തുമത വിശ്വാസികളായ ആദായനികുതി അടയ്ക്കാത്ത ജീവനക്കാരുണ്ടെങ്കില് റിപ്പോര്ട്ടാക്കി അത് രണ്ടുദിവസത്തിനുളളില് ഉപജില്ലാ വിദ്യാഭ്യാസ ഓഫീസില് ലഭ്യമാക്കണമെന്നാണ് ഉപജില്ലാ വിദ്യാഭ്യാസ ഓഫീസര് പ്രധാനാധ്യാപകര്ക്ക് അയച്ച കത്തില് പറയുന്നത്.
ജില്ലാ വിദ്യാഭ്യാസ ഓഫീസറുടെ നിര്ദേശപ്രകാരമായിരുന്നു ഉത്തരവ്. വിവരാവകാശ രേഖയ്ക്ക് മറുപടി നല്കാനായി വിവരങ്ങള് ശേഖരിക്കാനായിരുന്നു ഉത്തരവ്. സംഭവം വിവാദമായതോടെ വിദ്യാഭ്യാസ വകുപ്പ് ഉത്തരവ് പിന്വലിച്ചു. കോഴിക്കോട് സ്വദേശിയായ അബ്ദുള് കലാം കെ എന്നയാളാണ് ഇതുസംബന്ധിച്ച് വിവരാവകാശ നിയമപ്രകാരം വിവരങ്ങള് തേടിയത്.
‘കേരളത്തിലെ ക്രിസ്ത്യന് സഭകള്, ക്രിസ്തുമത വിശ്വാസികളായ തുടങ്ങിയവര് നടത്തുന്ന ധാരാളം എയ്ഡഡ് കോളേജുകള്, സ്കൂളുകള്, ആശുപത്രികള് എന്നിവിടങ്ങളില് സര്ക്കാര് ശമ്ബളം വാങ്ങി ജോലി ചെയ്യുന്ന ക്രിസ്തുമത വിശ്വാസികളായ ജീവനക്കാര് ഇന്കം ടാക്സ് നിയമങ്ങളും മറ്റ് സര്ക്കാര് നിയമങ്ങളും കാറ്റില് പറത്തി ഇന്കംടാക്സ് അടയ്ക്കാതെ മുങ്ങിനടക്കുകയാണ്. പതിനായിരം കോടി രൂപയിലേറെ ഇന്കം ടാക്സ് വെട്ടിപ്പ് നടത്തിയതായി കാണുന്നു. സര്ക്കാരിന്റെ സാമ്ബത്തിക ധനസ്ഥിതി പരിഗണിച്ച് ഈ തുക പിടിച്ചെടുത്ത് സര്ക്കാര് ഖജനാവിലേക്ക് മുതല്കൂട്ടേണ്ടത് ചീഫ് സെക്രട്ടറിയുടെ ഉത്തരവാദിത്തമാണ്.
ഇന്കം ടാക്സ് വെട്ടിപ്പ് നടത്തുന്ന മുഴുവന് ക്രിസ്ത്യാനികളായ ജീവനക്കാരെയും സര്വ്വീസില് നിന്ന് പിരിച്ചുവിട്ട് അവരുടെ ഡിസിആര്ജിയില് നിന്ന് തുക പിടിച്ചെടുത്ത് ഇന്കം ടാക്സ് ഡിപ്പാര്ട്ട്മെന്റിലേക്ക് അടയ്ക്കാന് ആവശ്യമായ നടപടികള് സ്വീകരിക്കണ’മെന്നാണ് അബ്ദുള് കലാം ഡയറക്ടര് ഓഫ് പബ്ലിക് ഇന്സ്ട്രക്ഷന് അയച്ച അപേക്ഷയില് പറയുന്നത്.
