റീ എഡിറ്റിംഗ് ചെയ്ത മോഹൻലാല് ചിത്രം എമ്ബുരാൻ ഇന്ന് തിയേറ്ററുകളില് എത്താനിരിക്കെ സിനിമയുമായി ബന്ധപ്പെട്ട് പുതിയ വിവാദം.സിനിമയില് അണക്കെട്ടിനെക്കുറിച്ച് പരാമർശിക്കുന്ന രംഗങ്ങള് ഒഴിവാക്കണമെന്ന് ആവശ്യപ്പെട്ട് തമിഴ്നാട്ടിലെ ഒരുവിഭാഗം കർഷകർ രംഗത്തെത്തിയിരിക്കുകയാണ്. സിനിമയില് സാങ്കല്പ്പിക പേരിലാണ് അണക്കെട്ട്. ഇത് മുല്ലപ്പെരിയാറിനെ ഉദ്ദേശിച്ചുള്ളതാണെന്നും ഇത് ഒഴിവാക്കിയില്ലെങ്കില് പ്രതിഷേധം കടുപ്പിക്കുമെന്നും പെരിയാർ വൈഗ ഇറിഗേഷൻ ഫാർമേഴ്സ് അസോസിയേഷനാണ് മുന്നറിയിപ്പ് നല്കിയത്.
തമിഴ്നാട് കമ്ബത്തെ ഗോകുലം ചിറ്റ്സ് ശാഖയ്ക്ക് മുന്നില് നാളെ ഉപരോധ സമരം നടത്തുമെന്ന് കോ ഓർഡിനേറ്റർ അൻവർ ബാലസിങ്കം പറഞ്ഞു.’മുല്ലപ്പെരിയാർ അണക്കെട്ടിനെക്കുറിച്ച് അനാവശ്യമായി പരാമർശിക്കുന്നത് രണ്ട് സംസ്ഥാനങ്ങള് തമ്മിലെ ബന്ധം തകർക്കാൻ ശ്രമിക്കലാണ്. നെടുമ്ബള്ളി ഡാം എന്നാണ് സിനിമയില് പറയുന്നത്. അണക്കെട്ടിന് അപകടമുണ്ടായാല് കേരളം വെള്ളത്തിനടിയിലാകുമെന്ന് സിനിമയില് പറയുന്നു. തടയണകള് ഉപയോഗ ശൂന്യമാണെന്നുമുള്ള സംഭാഷണങ്ങള് സിനിമയിലുണ്ട്. ഇവ മ്യൂട്ട് ചെയ്യണം’- ബാലസിങ്കം ആവശ്യപ്പെട്ടു.
അതേസമയം, വിവാദങ്ങള്ക്ക് പിന്നാലെ റീ എഡിറ്റ് ചെയ്ത എമ്ബുരാന്റെ പുതിയ പതിപ്പ് ഇന്ന് തിയേറ്ററുകളിലെത്തും. ചിത്രത്തിന്റെ റീ സെൻസറിംഗ് ഞായറാഴ്ച പൂർത്തിയായിരുന്നു. എഡിറ്റിംഗും മാസ്റ്ററിംഗും പൂർത്തിയാക്കാൻ വൈകിയതാണ് ചിത്രം തിയേറ്ററുകളിലെത്തുന്നത് വൈകാൻ കാരണം. ഹൈദരാബാദില് നടൻ നാഗാർജുനയുടെ ഉടമസ്ഥതയിലുള്ള അന്നപൂർണ സ്റ്റുഡിയോയിലാണ് മാസ്റ്ററിംഗ് ജോലികള് നടന്നത്. പുതിയ പതിപ്പ് ഇന്ന് ഉച്ചയ്ക്ക് ശേഷം തിയേറ്ററുകളില് എത്തുമെന്നാണ് വിവരം. രാവിലെയുള്ള ഷോകളില് പഴയ പതിപ്പ് ആയിരിക്കും പ്രദർശിപ്പിക്കുക.
