അമിത വേഗതയ്ക്ക് തടഞ്ഞ് നിര്ത്തിയ കാറില് വിവാഹത്തിനായി പോകുന്ന വധുവിനെ കണ്ട് പിഴയ്ക്ക് പകരം ‘ലഡു വാങ്ങിയ’ പഞ്ചാബ് പോലീസ് സമൂഹ മാധ്യമ ഉപയോക്താക്കളുടെ ശ്രദ്ധനേടി.ആഞ്ചല് അറോറ എന്ന ഇൻസ്റ്റാഗ്രാം അക്കൌണ്ടില് നിന്നും പങ്കുവയ്ക്കപ്പെട്ട വീഡിയോയിലാണ് ഈ ദൃശ്യങ്ങളുള്ളത്.
വീഡിയോയുടെ തുടക്കത്തില് കൈയില് മൈലാഞ്ചി അണിഞ്ഞ് ഒരു വധു കാറിന്റെ പിന്നില് ഇരിക്കുന്നത് കാണാം. അവര് വിവാഹ വേദിയിലേക്കുള്ള യാത്രയിലായിരുന്നു. അമിത വേഗതയിലെത്തിയ കാറില് വിവാഹവേദിയിലേക്ക് പോകുന്ന വധുവാണെന്ന് തിരിച്ചറിഞ്ഞ പഞ്ചാബ് പോലീസ് അവരെ പോകാന് അനുവദിക്കുന്നു. ഇവരുടെ സംഭാഷണം സമൂഹ മാധ്യമ ഉപയോക്താക്കളെ ഏറെ ആകർഷിച്ചു.കാറില് വധുവിനെ കണ്ട് പോലീസ് ‘മധുരമുള്ള വായുമായി പോകൂ.’ എന്ന് തമാശ പറഞ്ഞു. ഒപ്പം അവളുടെ വിവാഹത്തിന് അനുഗ്രഹിക്കുകയും ആശംസകള് നേരുകയും ചെയ്തു.
ഇതോടെ വധു, ‘ലഡുവിന്റെ പെട്ടി തയ്യാറാണ്.’ എന്നാണ് മറുപടി പറയുന്നത്. ഇത് കാറിനുള്ളില് വലിയ ചിരി പടര്ത്തി. ആ ചിരി കാഴ്ചക്കാരിലേക്കും പടർന്നുവെന്ന് സമൂഹ മാധ്യമ ഉപയോക്താക്കളുടെ കുറിപ്പുകളില് വ്യക്തം. പിന്നാലെ പോലീസുകാര് കാറിന് പെറ്റി നല്കാതെ പോകാന് അനുവദിക്കുന്നു.
