2012-ല് പുറത്തിറങ്ങിയ ലാല് ജോസ് ചിത്രം ഡയമണ്ട് നെക്ലെയ്സിലൂടെ വെള്ളിത്തിരയില് അരങ്ങേറിയ നടിയാണ് അനുശ്രീ. കൊല്ലം ജില്ലയിലെ പത്തനാപുരം സ്വദേശിയായ അവർ നാട്ടുകാർക്കും പ്രിയങ്കരിയാണ്. വീട്ടിലെത്തിയാല് സിനിമാ താരത്തിന്റെ അലങ്കാരങ്ങളൊന്നുമില്ലാതെ നാട്ടുകാർക്കൊപ്പം ആഘോഷങ്ങളില് അനുശ്രീയുമുണ്ടാകും. വീടിന് അടുത്തുള്ള ക്ഷേത്രത്തിലെ ഉത്സവത്തിന് നിലത്തിരുന്ന് കാഴ്ച്ചകള് കാണുന്ന അനുശ്രീയുടെ ചിത്രങ്ങള് അടുത്തിടെ ശ്രദ്ധ നേടിയിരുന്നു.
ഇപ്പോഴിതാ ഒരു മുണ്ടുടുത്ത് റോഡരികില് നിന്നും ചായ കുടിക്കുന്ന ചിത്രങ്ങളാണ് താരം സോഷ്യല് മീഡിയയില് പങ്കുവെച്ചിരിക്കുന്നത്. കാവി നിറത്തിലുള്ള മുണ്ടിനൊപ്പം കറുപ്പ് നിറത്തിലുള്ള ക്രോപ്പ് ടോപ്പാണ് താരം ധരിച്ചിരിക്കുന്നത്. ഇതില് നിറയെ പ്രിന്റുകള് കാണാം.മഴ പെയ്തുതോർന്ന ശേഷം പകർത്തിയ ചിത്രങ്ങളാണിത്. അനുശ്രീയുടെ നനഞ്ഞ മുടിയും നനഞ്ഞുകിടക്കുന്ന റോഡുകളും ചിത്രത്തെ കൂടുതല് മനോഹരമാക്കുന്നു. കൊല്ലൂർ മൂകാംബിക ക്ഷേത്രത്തിന് അടുത്തുനിന്നാണ് ഈ ചിത്രങ്ങള് പകർത്തിയിരിക്കുന്നത്.
