നടി ലക്ഷ്മി പ്രിയയ്ക്കെതിരെ ഗുരുതര ആരോപണവുമായി അൻസിബ ഹസന്റെ സുഹൃത്തും ടെലിവിഷൻ പ്രോഗ്രാം പ്രൊഡ്യൂസറുമായ മിഥിലാജ് അബ്ദുള്. സിനിമാ മേഖലയിലെ ചില വ്യക്തികളെയും പെണ്കുട്ടികളെയും ലക്ഷ്യംവെച്ച് ദുബായ് കേന്ദ്രീകരിച്ച് പ്രവർത്തിക്കുന്ന മാഫിയാ സംഘത്തില് ലക്ഷ്മിപ്രിയയ്ക്ക് പങ്കുണ്ടെന്ന് അൻസിബക്ക് അറിയാമായിരുന്നുവെന്ന് മിഥിലാജ് ആരോപിച്ചു. മകളുടെ പേരില് നടത്തുന്ന സൊസൈറ്റിയുടെ മറവില് ലക്ഷ്മിപ്രിയ കള്ളപ്പണം വെളുപ്പിക്കല് നടത്തുന്നുവെന്ന് അൻസിബക്ക് വിവരം ലഭിച്ചതായും മിഥിലാജ് ഫെയ്സ്ബുക്ക് പോസ്റ്റില് കുറിച്ചു.
അൻസിബയ്ക്കെതിരെ ലക്ഷ്മിപ്രിയ ഹില്പാലസ് വനിതാ സെല്ലില് നല്കിയ പരാതിയുടെ പൂർണ്ണരൂപവും മിഥിലാജ് പുറത്തുവിട്ടു. വിവരാവകാശനിയമപ്രകാരം ലഭിച്ചതെന്ന് രേഖപ്പെടുത്തിയ പരാതിയുടെ പകർപ്പാണ് മിഥിലാജ് ഫെയ്സ്ബുക്കില് പങ്കുവെച്ചത്.
നേരത്തെ, ലക്ഷ്മിപ്രിയ ഒരു യൂട്യൂബ് ചാനലിന് നല്കിയ അഭിമുഖത്തിനെതിരെ അൻസിബ ഹസൻ പാലാരിവട്ടം പോലീസില് പരാതി നല്കിയിരുന്നു. സാമൂഹികമാധ്യമങ്ങളിലൂടെ വ്യാജവും അശ്ലീലവും നിറഞ്ഞതുമായ വീഡിയോ നിർമിച്ച് പ്രചരിപ്പിച്ച് സ്ത്രീത്വത്തെ അപമാനിച്ചെന്നായിരുന്നു പരാതി. ഈ അഭിമുഖത്തില് ലക്ഷ്മിപ്രിയ മിഥിലാജിനെക്കുറിച്ചും പരാമർശിച്ചിരുന്നു.
