നിയമസഭാ തെരഞ്ഞെടുപ്പിലെ എല്ഡിഎഫിന്റെ കനത്ത പരാജയത്തിന് പിന്നാലെ, എന്സിപിയുടെ (NCP) സിറ്റിങ് സീറ്റായ എലത്തൂരിലെ തോല്വിയില് വീഴ്ച സമ്മതിച്ച് മുന് മന്ത്രി എ.കെ. ശശീന്ദ്രന്. എലത്തൂരിലെ സ്ഥാനാര്ത്ഥി നിര്ണ്ണയത്തില് പാളിച്ച പറ്റിയിട്ടുണ്ടെന്നും അത് പരാജയത്തിന്റെ പ്രധാന കാരണങ്ങളിലൊന്നാണെന്നും അദ്ദേഹം പരസ്യമായി തുറന്നുപറഞ്ഞു. തെരഞ്ഞെടുപ്പ് ഫലം വിലയിരുത്താന് ചേര്ന്ന എന്സിപി കോഴിക്കോട് ജില്ലാ എക്സിക്യൂട്ടീവ് കമ്മിറ്റി യോഗത്തില് തനിക്കെതിരെ ഉയര്ന്ന രൂക്ഷവിമര്ശനങ്ങള് പൂര്ണ്ണമായി ഉള്ക്കൊള്ളുന്നുവെന്നും തെറ്റുകള് തിരുത്തി മുന്നോട്ട് പോകുമെന്നും അദ്ദേഹം വ്യക്തമാക്കി.
സംസ്ഥാനത്തുണ്ടായ എല്ഡിഎഫിന്റെ വന് പരാജയത്തില് മുഖ്യമന്ത്രി പിണറായി വിജയനെയോ സിപിഎം സംസ്ഥാന സെക്രട്ടറി എം.വി. ഗോവിന്ദനെയോ മാത്രം കുറ്റപ്പെടുത്താന് സാധിക്കില്ലെന്ന നിലപാടാണ് ശശീന്ദ്രന് സ്വീകരിച്ചത്. എലത്തൂരിലെ പരാജയത്തില് തനിക്കും കൃത്യമായ വീഴ്ച സംഭവിച്ചിട്ടുണ്ട്. മുന്നണിയിലെ ഏറ്റവും വലിയ കക്ഷിയായ സിപിഎം ഈ പരാജയത്തെ അതീവ ഗൗരവത്തോടെയാണ് വിലയിരുത്തുന്നത്. എലത്തൂരില് അടിയന്തിരമായി തിരുത്തേണ്ട ചില കാര്യങ്ങള് അനിവാര്യമായ സമയത്ത് തിരുത്താന് സാധിച്ചില്ല. ഈ പരാജയത്തിന്റെ കുറ്റം മുഴുവന് ഒരാളിലേക്ക് മാത്രം ചാരിവെച്ച് രക്ഷപ്പെടുന്നത് നല്ല ഏര്പ്പാടല്ലെന്നും അദ്ദേഹം കൂട്ടിച്ചേര്ത്തു.
സ്ഥാനാര്ത്ഥി നിര്ണയവുമായി ബന്ധപ്പെട്ട് മാധ്യമങ്ങളില് തുടര്ച്ചയായി വന്ന വിവാദ വാര്ത്തകള് വോട്ടര്മാരെ വലിയ രീതിയില് സ്വാധീനിച്ചിട്ടുണ്ടാകാമെന്നും, എന്നാല് പാര്ട്ടിയില് പ്രതിസന്ധികളുണ്ടെങ്കിലും എന്സിപി പിളരില്ലെന്നും ശശീന്ദ്രന് വ്യക്തമാക്കി.എലത്തൂരില് ഒരു ഘട്ടത്തിലും തോല്ക്കുമെന്ന് കരുതിയിരുന്നില്ലെന്നും സംസ്ഥാനത്തുണ്ടായ ശക്തമായ എല്ഡിഎഫ് വിരുദ്ധ തരംഗത്തില് പിടിച്ചുനില്ക്കാന് സാധിച്ചില്ലെന്നുമാണ് ശശീന്ദ്രന്റെ വിലയിരുത്തല്. ഇത്രയും വലിയൊരു തിരിച്ചടി മുന്കൂട്ടി മനസ്സിലാക്കാന് മുന്നണിയിലെ ഒരു കമ്മിറ്റികള്ക്കും സാധിച്ചില്ല.
എന്നാല്, എ.കെ. ശശീന്ദ്രന് വാശിപിടിച്ച് ഈ സീറ്റില് വീണ്ടും മത്സരിച്ചതാണ് എലത്തൂരിലെ ചരിത്രപരമായ തോല്വിക്ക് കാരണമെന്നാണ് ജില്ലാ കമ്മിറ്റിയിലെ ഭൂരിപക്ഷത്തിന്റെ നിലപാട്. മണ്ഡലത്തില് പുതിയൊരു സ്ഥാനാര്ത്ഥിയെ മത്സരിപ്പിക്കണമെന്ന് ആവശ്യപ്പെട്ട് ജില്ലാ കമ്മിറ്റി നേരത്തെ പ്രമേയം അവതരിപ്പിച്ചിരുന്നതുമാണ്.അതേസമയം, തെരഞ്ഞെടുപ്പ് തോല്വിക്ക് പിന്നാലെ കേരളത്തിലെ എന്സിപിയില് ഭിന്നത രൂക്ഷമായിരിക്കുകയാണ്. ദേശീയ തലത്തിലെ രാഷ്ട്രീയ മാറ്റങ്ങളുടെ പശ്ചാത്തലത്തില് എന്ഡിഎ (NDA) മുന്നണിയില് തുടരണമെന്ന പി.സി. ചാക്കോ വിഭാഗത്തിന്റെ നിലപാടിനെതിരെ ശക്തമായ പ്രതിഷേധമാണ് പാര്ട്ടിയിലുള്ളത്.
എന്ഡിഎ വിട്ട് പുതിയ സംസ്ഥാന പാര്ട്ടി രൂപീകരിച്ച് മുന്നോട്ട് പോകണമെന്നാണ് എ.കെ. ശശീന്ദ്രന് അനുകൂലികളുടെ നിലപാട്. പാര്ട്ടിയുടെ ഭാവി പരിപാടികള് ചര്ച്ച ചെയ്യാന് ചേരുന്ന കോഴിക്കോട് ജില്ലാ കമ്മിറ്റി യോഗം ശശീന്ദ്രന് അനുകൂലികളുടെ ഈ നിലപാടിന് പൂര്ണ്ണ പിന്തുണ പ്രഖ്യാപിക്കുമെന്നാണ് സൂചനകള്. തോല്വിയുടെ പശ്ചാത്തലത്തില് എന്സിപിക്കുള്ളില് ഉടലെടുത്ത ഈ രാഷ്ട്രീയ തര്ക്കങ്ങള് വരും ദിവസങ്ങളില് കൂടുതല് കടുക്കുമെന്ന് ഉറപ്പാണ്.
