കേരളത്തിന്റെ രാഷ്ട്രീയ ഗോദയില് വരാനിരിക്കുന്ന നിയമസഭാ തിരഞ്ഞെടുപ്പ് ഒരു ‘താരപ്പോരാട്ടത്തിന്’ വേദിയാകുമോ? സുരേഷ് ഗോപിയുടെ തൃശൂരിലെ വിജയത്തിന് പിന്നാലെ, സെലിബ്രിറ്റി പരിവേഷമുള്ള മുഖങ്ങളെ അണിനിരത്തി വോട്ട് ബാങ്ക് വിപുലീകരിക്കാനുള്ള നീക്കത്തിലാണ് മുന്നണികള്.ബിഗ് ബോസ് മലയാളം സീസണ് 4-ലൂടെ തരംഗമായി മാറിയ ഡോ. റോബിൻ രാധാകൃഷ്ണനും, ‘മാളികപ്പുറം, മാർക്കോ തുടങ്ങിയ ചിത്രങ്ങളിലൂടെ ശ്രദ്ധേയനായ ഉണ്ണി മുകുന്ദനും വരാനിരിക്കുന്ന നിയമസഭാ തിരഞ്ഞെടുപ്പില് ബിജെപി സ്ഥാനാർത്ഥികളായേക്കുമെന്ന് റിപ്പോർട്ട്.
സോഷ്യല് മീഡിയയില് വലിയ ആരാധകവൃന്ദമുള്ള റോബിൻ രാധാകൃഷ്ണനെ കൊല്ലം മണ്ഡലത്തില് മത്സരിപ്പിക്കാനാണ് ബിജെപി ആലോചിക്കുന്നത് എന്നാണ് പുറത്തുവരുന്ന വിവരം. ബിഗ് ബോസിന് മുൻപ് തന്നെ ‘ഡോക്ടർ മച്ചാൻ’ എന്ന പേരില് യുവാക്കള്ക്കിടയില് സ്വാധീനമുള്ള റോബിന്റെ ഇമേജ് വോട്ടാക്കി മാറ്റാൻ കഴിയുമെന്ന് പാർട്ടി നേതൃത്വം കണക്കുകൂട്ടുന്നു. തിരുവനന്തപുരം ജി.ജി ആശുപത്രിയില് മെഡിക്കല് ഓഫീസറായിരുന്ന റോബിൻ, ഇടക്കാലത്ത് സോഷ്യല് മീഡിയയില് വലിയ തരംഗം സൃഷ്ടിച്ചിരുന്നു.
കഴിഞ്ഞ കുറച്ചു കാലമായി ബിജെപി വേദികളിലും മറ്റും സജീവ സാന്നിധ്യമായ ഉണ്ണി മുകുന്ദൻ പാലക്കാട് മണ്ഡലത്തില് മത്സരിക്കുമെന്ന റിപ്പോർട്ടുകള്ക്ക് വലിയ രാഷ്ട്രീയ പ്രസക്തിയുണ്ട്. ഉണ്ണി മുകുന്ദന്റെ ജനപ്രീതിയും സാന്നിധ്യവും അവിടെ വിജയസാധ്യത വർദ്ധിപ്പിക്കുമെന്നാണ് പാർട്ടിയുടെ പ്രാഥമിക വിലയിരുത്തല്.
സുരേഷ് ഗോപി തൃശൂരില് നേടിയ ചരിത്രപരമായ വിജയത്തിന് പിന്നാലെ, കേരളത്തില് ജനപ്രിയ മുഖങ്ങളെ അണിനിരത്തി വോട്ട് വിഹിതം വർദ്ധിപ്പിക്കാനുള്ള നീക്കത്തിലാണ് ബിജെപി എന്നും റിപ്പോർട്ടുണ്ട്. സോഷ്യല് മീഡിയയില് ദശലക്ഷക്കണക്കിന് ഫോളോവേഴ്സുള്ള റോബിൻ രാധാകൃഷ്ണനെപ്പോലെയുള്ള താരങ്ങള് യുവവോട്ടർമാരെ ആകർഷിക്കാൻ സഹായിച്ചേക്കാം. പരമ്ബരാഗത രാഷ്ട്രീയ പാർട്ടികളില് നിന്ന് മാറി നില്ക്കുന്ന യുവാക്കളുടെ വോട്ടുകള് തങ്ങളിലേക്ക് എത്തിക്കാൻ ഇവർക്ക് സാധിക്കുമെന്നാണ് പാർട്ടികളുടെ പ്രതീക്ഷ.
തിരുവനന്തപുരം സ്വദേശിയായ റോബിൻ ഡോക്ടർ എന്ന നിലയിലും ഇൻഫ്ലുവൻസർ എന്ന നിലയിലുമാണ് ശ്രദ്ധേയനായത്. റോബിന്റെ ഭാര്യ ആരതി പൊടിയും സോഷ്യല് മീഡിയയ്ക്ക് പരിചിതമായ മുഖമാണ്.
എങ്കിലും, ഈ റിപ്പോർട്ടുകളോട് റോബിൻ രാധാകൃഷ്ണനോ ഉണ്ണി മുകുന്ദനോ ബിജെപി ഔദ്യോഗിക വക്താക്കളോ ഇതുവരെ പ്രതികരിച്ചിട്ടില്ല. സ്ഥാനാർത്ഥി പട്ടിക പുറത്തുവരുന്നതോടെ മാത്രമേ ഈ ‘താരപ്പോരാട്ടത്തില്’ എത്രത്തോളം സത്യമുണ്ടെന്ന് വ്യക്തമാകൂ.
ഇവിടെ ക്ലിക്ക് ചെയ്ത് ഞങ്ങളുടെ യൂട്യൂബ് ചാനൽ സബ്സ്ക്രൈബ് ചെയ്യുക
