കേരളത്തിലെ തദ്ദേശസ്വയംഭരണ തെരഞ്ഞെടുപ്പില് മുഴുവൻ വാർഡുകളിലും സ്ഥാനാർഥികളെ നിർത്തുമെന്ന ബിജെപിയുടെ വലിയ ലക്ഷ്യം പരാജയപ്പെട്ടു. നാല് ജില്ലകളിലായി ഏകദേശം എണ്ണായിരത്തോളം വാർഡുകളില് പാർട്ടിക്ക് സ്ഥാനാർഥികളെ നിർത്താനായില്ലെന്ന് നോമിനേഷൻ പൂർത്തിയായതോടെ വ്യക്തമായി. കണ്ണൂർ, മലപ്പുറം, കോഴിക്കോട്, എറണാകുളം ജില്ലകളിലാണ് ഏറ്റവും വലിയ തിരിച്ചടി നേരിട്ടത്, പ്രത്യേകിച്ച് മലപ്പുറത്തും കണ്ണൂരിലും സ്ഥാനാർഥികളുടെ എണ്ണം ഗണ്യമായി കുറഞ്ഞു.
2020-ലെ തെരഞ്ഞെടുപ്പിനെ അപേക്ഷിച്ച് ഇത്തവണ 100 ശതമാനം വാർഡുകളിലും മത്സരിക്കുമെന്നായിരുന്നു ബിജെപി പ്രഖ്യാപിച്ചത്. എന്നാല് പാർട്ടി സംസ്ഥാന നേതൃയോഗത്തില് 90 ശതമാനം വാർഡുകളിലും സ്ഥാനാർഥികളെ നിർത്തിയെന്ന് അവകാശപ്പെട്ടിരുന്നത് നോമിനേഷൻ പിൻവലിക്കല് കഴിഞ്ഞപ്പോള് തെറ്റാണെന്ന് തെളിഞ്ഞു. ചിലയിടങ്ങളില് നാമനിർദേശ പത്രിക തള്ളപ്പെടുകയും പിന്തുണക്കാരില്ലാതെ പത്രിക സമർപ്പിക്കാൻ പോലും കഴിയാതെ വരികയും ചെയ്തു.എന്നിരുന്നാലും ഇത് ബിജെപി ഇതുവരെ മത്സരിച്ച തദ്ദേശ തെരഞ്ഞെടുപ്പുകളില് ഏറ്റവും കൂടുതല് സ്ഥാനാർഥികളെ നിർത്തിയ തവണയാണെന്ന് സംസ്ഥാന ജനറല് സെക്രട്ടറി എം.ടി. രമേശ് അവകാശപ്പെട്ടു.
നേരിട്ടും സഖ്യകക്ഷികള് വഴിയും സ്വതന്ത്രരായും ചേർത്താല് 98 ശതമാനം വാർഡുകളിലും എൻഡിഎ സാന്നിധ്യമുണ്ടെന്നാണ് പാർട്ടിയുടെ വാദം. മുസ്ലിം ഭൂരിപക്ഷ മേഖലകളിലും കമ്മ്യൂണിസ്റ്റ് സ്വാധീനമുള്ള ചില പ്രദേശങ്ങളിലും സ്ഥാനാർഥി കണ്ടെത്താൻ കഴിയാത്ത പ്രശ്നം തുടരുന്നതായി നേതാക്കള് സമ്മതിക്കുന്നു.
