ഇന്ത്യക്കാരെ സംബന്ധിച്ചടത്തോളം നമ്മുടെ അറിവില് പോത്തിനെ വാഹനമാക്കിയിരിക്കുന്നത് മരണദൂതനായ കാലനാണ്. എന്നാല് ബ്രസീലിന്റെ വടക്കേ അറ്റത്തുള്ള മറാജോയില് പോലീസ് ഉദ്യോഗസ്ഥർ പട്രോള് കാറുകള്ക്കോ കുതിരകള്ക്കോ പകരം ഏഷ്യൻ വാട്ടർ ബഫലോകളുടെ (പോത്ത്) പുറത്താണ് യാത്ര ചെയ്യുന്നത്. ഉദ്യോഗസ്ഥർ പോത്തിന് പുറത്ത് സഞ്ചരിക്കുന്നത് എന്തുകൊണ്ടാണെന്ന് അടുത്തിടെ വന്ന ഒരു റോയിട്ടേഴ്സ് പോസ്റ്റ് വലിയ ആകാംഷ ഉണർത്തി.ഇവിടെയാണ് ആമസോണ് നദി അറ്റ്ലാന്റിക് സമുദ്രത്തെ ചുംബിക്കുന്നത്. ഏകദേശം സ്വിറ്റ്സർലൻഡിന്റെ വലുപ്പമുള്ള ഈ പ്രദേശം ലോകത്തിലെ ഏറ്റവും അസാധാരണമായ നിയമ നിർവ്വഹണ സംവിധാനങ്ങളിലൊന്ന് വികസിപ്പിച്ചെടുത്തിരിക്കുന്നു.
പോത്തുകള് മറാജോയുടെ ഭാഗമായതെങ്ങനെ ?
ഇന്ത്യയിലും തെക്കുകിഴക്കൻ ഏഷ്യയിലുമാണ് കൂടുതല് കണ്ടുവരുന്നതെങ്കിലും ഏഷ്യൻ വാട്ടർ ബഫലോകള് ഒരു നൂറ്റാണ്ടിലേറെയായി മറാജോയില് തഴച്ചുവളർന്നു. അവയുടെ കൃത്യമായ ഉത്ഭവം ഇപ്പോഴും തർക്കവിഷയമാണ്-ചില കഥകള് ഒരു കപ്പലപകടത്തെക്കുറിച്ച് പറയുന്നു, മറ്റുചിലർ പറയുന്നത് അവ ഫ്രഞ്ച് ഗയാനയില് നിന്നുള്ള സഞ്ചാരികളോടൊപ്പം എത്തിയെന്നാണ്. എന്നാല് ഇന്ന് തർക്കമില്ലാത്ത ഒരു കാര്യമുണ്ട്: അവയുടെ ആധിപത്യം. 5,00,000-ത്തിലധികം പോത്തുകളാണ് നിലവില് ദ്വീപില് ചുറ്റിത്തിരിയുന്നത്, ഇത് മനുഷ്യവാസികളേക്കാള് കൂടുതലാണ്.
മറാജോയില് മാസങ്ങളോളം കനത്ത മഴ ലഭിക്കാറുണ്ട്, ഇത് റോഡുകളെ ആഴത്തിലുള്ള ചതുപ്പുകളാക്കി മാറ്റുന്നു. പട്രോളിംഗ് വാഹനങ്ങള് പലപ്പോഴും കുടുങ്ങിപ്പോകുന്നു, കുതിരകള്ക്ക് വഴുക്കലുള്ള കണ്ടല്ക്കാടുകളില് സഞ്ചരിക്കാൻ പ്രയാസമാണ്. എന്നാല് പോത്തുകള് ഈ പരിസ്ഥിതിക്ക് വേണ്ടി സൃഷ്ടിക്കപ്പെട്ടവയാണ്. കാരണം അവയുടെ വീതിയേറിയ കുളമ്ബുകള് ചതുപ്പില് താഴുന്നത് തടയുന്നു. മാത്രമല്ല വെള്ളത്തിലൂടെയും ചെളിയിലൂടെയും അവ അതിവേഗം സഞ്ചരിക്കുന്നു. മഴക്കാലത്ത് എത്തിച്ചേരാൻ കഴിയാത്ത വിദൂര പ്രദേശങ്ങളിലെ ജനവാസ കേന്ദ്രങ്ങളില് പോലീസിന് ഇവ വഴി എത്താൻ സാധിക്കുന്നു.
പ്രത്യേക പോലീസ് യൂണിറ്റ്: “ബഫലോ സോള്ജിയേഴ്സ്”ഏകദേശം മൂന്ന് പതിറ്റാണ്ട് മുമ്ബ്, ദ്വീപിലെ മിലിട്ടറി പോലീസ് “ബഫലോ സോള്ജിയേഴ്സ്” എന്ന പേരില് ഒരു പ്രത്യേക സേനയ്ക്ക് രൂപം നല്കി. ഈ ശക്തരായ മൃഗങ്ങളുടെ പുറത്ത് സുരക്ഷിതമായി സഞ്ചരിക്കുന്നതിനുള്ള പരിശീലനം ഉദ്യോഗസ്ഥർക്ക് നല്കുന്നു. അവയ്ക്ക് വേണ്ടി പ്രത്യേകമായി നിർമ്മിച്ച ജീനികളും മറ്റ് ഉപകരണങ്ങളുമാണ് ഉപയോഗിക്കുന്നത്. പോത്തിന്റെ പുറത്ത് സഞ്ചരിക്കുന്ന യൂണിഫോം ധരിച്ച ഉദ്യോഗസ്ഥരുടെ കാഴ്ച മറാജോയുടെ ഒരു പ്രതീകമായി മാറിയിരിക്കുന്നു, അതോടൊപ്പം ഇതൊരു ജനപ്രിയ വിനോദസഞ്ചാര ആകർഷണവുമാണ്.
