പത്തനംതിട്ടയില് കഴിഞ്ഞ ദിവസം അറസ്റ്റിലായ ഹാക്കർ ജോയല് വി. ജോസിന്റെ സഹായിയും സുഹൃത്തുമായ യുവതി അറസ്റ്റില്. അഹമ്മദാബാദ് സ്വദേശിയായ ഹിരാല് ബെൻഅനൂജ് പട്ടേല് (37) ആണ് അറസ്റ്റിലായത്. വ്യക്തികളുടെ സ്വകാര്യ വിവരങ്ങളും മൊബൈല് നമ്ബരുകളുടെ ലൈവ് ലൊക്കേഷനുകളും കോള് ഡേറ്റ റിക്കാർഡുകളും ചോർത്തിയെടുത്ത് ലക്ഷങ്ങളുടെ തട്ടിപ്പ് ആണ് ഇവർ നടത്തിയത്.
കേസിലെ മുഖ്യ പ്രതി അടൂർ സ്വദേശി ജോയല് റിമാൻഡിലാണ്. കേസിലെ രണ്ടാം പ്രതിയാണ് അറസ്റ്റിലായ ഹിരാല് ബെൻഅനൂജ് പട്ടേല്. സ്വകാര്യ വ്യക്തികളുടെ ഡേറ്റാ വിവരങ്ങള് ചോർത്തിയെടുത്ത് ഓണ്ലൈൻ തട്ടിപ്പ് നടത്തിയതുമായി ബന്ധപ്പെട്ട് പത്തനംതിട്ട സൈബർ പൊലീസ് രജിസ്റ്റർ ചെയ്ത കേസില് ഒന്നാംപ്രതിയായ അടൂർ സ്വദേശി ജോയല് വി ജോസിനെ കഴിഞ്ഞമാസം അവസാനം പിടികൂടിയിരുന്നു.
സംഘത്തില് ഉള്പ്പെട്ട മറ്റു പ്രതികളെ കണ്ടെത്താൻ പ്രത്യേക അന്വേഷണസംഘം അന്വേഷണം നടത്തുന്നതിനിടെയാണ് ഹാക്കിങില് ജോയലിന്റെ സഹായിയായി പ്രവർത്തിച്ച രണ്ടാംപ്രതി അഹമ്മദാബാദില് ഉണ്ടെന്ന വിവരം ലഭിച്ചത്. തുടർന്ന് പത്തനംതിട്ട ജില്ലാ പൊലീസ് മേധാവിയുടെ നിർദ്ദേശാനുസരണം ജില്ലാ ക്രൈം റിപ്പോർട്ട്സ് ബ്യൂറോ ഡെപ്യൂട്ടി പൊലീസ് സൂപ്രണ്ട് ബിനു വർഗീസിന്റെ മേല്നോട്ടത്തില് സൈബർ പൊലീസ് സ്റ്റേഷൻ ഇൻസ്പെക്ടർ ബി സുനില് കൃഷ്ണന്റെ നേതൃത്വത്തിലുള്ള സംഘം അഹമ്മദാബാദില് നിന്നും അതിസാഹസികമായി പ്രതിയെ പിടികൂടുകയായിരുന്നു. സബ് ഇൻസ്പെക്ടർ ആശ വി ഐ, സീനിയർ സിവില് പൊലീസ് ഓഫീസർ പ്രസാദ് എം ആർ, സിവില് പൊലീസ് ഓഫീസർ സഫൂറ മോള് എന്നിവരും പ്രതിയെ പിടികൂടുന്ന സംഘത്തിലുണ്ടായിരുന്നു. അറസ്റ്റ് ചെയ്ത പ്രതിയെ പത്തനംതിട്ട ജുഡീഷ്യല് ഒന്നാം ക്ലാസ് മജിസ്ട്രേറ്റ് കോടതിയില് ഹാജരാക്കി റിമാൻഡ് ചെയ്തു.
