കൊക്കെയ്ന് കേസില് നടന് ഷൈന് ടോം ചാക്കോ ഉള്പ്പെടെയുള്ള പ്രതികളെ വെറുതെവിട്ടു. എറണാകുളം സെഷൻസ് കോടതിയാണ് ഇവരെ വെറുതെവിട്ടത്.2015 ജനുവരി 30നായിരുന്നു ഷൈന് ടോം ചാക്കോയേയും നാല് യുവതികളേയും കൊച്ചി കടവന്ത്രയിലെ ഫ്ലാറ്റില് വച്ച് കൊക്കെയ്ന് ഉപയോഗിച്ചതിന് പോലീസ് പിടികൂടിയത്.
കേരളത്തിലെ ആദ്യത്തെ കൊക്കെയ്ന് കേസായിരുന്നു ഇത്. രഹസ്യവിവരത്തിന്റെ അടിസ്ഥാനത്തില് രാത്രി പന്ത്രണ്ടിന് നടത്തിയ റെയ്ഡില് ഷൈന് ടോം ചാക്കോയും മോഡലുകളായ രേഷ്മ രംഗസ്വാമി, ബ്ലെസി സില്വസ്റ്റര്, ടിന്സ് ബാബു, സ്നേഹ ബാബു എന്നിവരും പിടിയിലായിരുന്നു.
അറസ്റ്റിലാകുമ്ബോള് ഇവര് മയക്ക് മരുന്ന് ഉപയോഗിച്ച നിലയിലായിരുന്നു. കേസില് എട്ടുപ്രതികളാണ് ഉണ്ടായിരുന്നത്. പ്രതികള്ക്ക് വേണ്ടി അഡ്വ. രാമന് പിള്ളയാണ് ഹാജരായത്.കാക്കനാട്ടെ ഫോറന്സിക് ലാബില് ആയിരുന്നു ഇവരുടെ രക്ത സാമ്ബിളുകള് ആദ്യം പരിശോധനയ്ക്കായി അയച്ചിരുന്നത്. എന്നാല് ഈ പരിശോധനയില് കൊക്കെയ്ന്റെ സാന്നിധ്യം കണ്ടെത്താനായിരുന്നില്ല.
2018 ഒക്ടോബറിലായിരുന്നു അഡീഷണല് സെഷന്സ് കോടതിയില് വിചാരണ ആരംഭിച്ചത്. അറസ്റ്റിലായതിന് പിന്നാലെ താന് കൊക്കെയ്ന് കൈവശം വച്ചിട്ടില്ലെന്നായിരുന്നു ഷൈന് ടോം ചാക്കോ പറഞ്ഞത്.
