മുംബൈ: ബിജെപി ഏറെ പ്രതീക്ഷയോടെ കാത്തിരിക്കുന്ന ബിഎംസി തിരഞ്ഞെടുപ്പിന് മുന്നേ സംസ്ഥാനത്ത് ബിജെപി പുതിയ അധ്യക്ഷനെ നിയമിച്ചേക്കും. മാർച്ച് ആദ്യവാരം ഔദ്യോഗിക പ്രഖ്യാപനം ഉണ്ടാകുമെന്നും മുൻ മന്ത്രി രവീന്ദ്ര ചവാനാണ് അധ്യക്ഷൻ ആവുകയെന്നും വൃത്തങ്ങൾ സൂചിപ്പിക്കുന്നു.
നിലവിൽ റവന്യൂ മന്ത്രി ചന്ദ്രശേഖർ ബവൻകുലെയാണ് പദവി വഹിക്കുന്നത്. എന്നിരുന്നാലും, അദ്ദേഹത്തിൻ്റെ കാലാവധി ഓഗസ്റ്റ് വരെയാണ്, ഇപ്പോൾ അദ്ദേഹം മന്ത്രിസഭയിൽ ചേർന്നതിനാൽ, സംഘടനാ ചുമതലകൾ പുതിയ നേതാവിനെ ഏൽപ്പിക്കുമെന്ന് പ്രതീക്ഷിക്കുന്നു.
മുഖ്യമന്ത്രി ദേവേന്ദ്ര ഫഡ്നാവിസിൻ്റെ വിശ്വസ്ത നേതാവായിട്ടാണ് ചവാൻ അറിയപ്പെടുന്നത്. താനെ ജില്ലയിലെ ഡോംബിവ്ലി നിയമസഭാ മണ്ഡലത്തെയാണ് അദ്ദേഹം പ്രതിനിധീകരിക്കുന്നത്. ഷിൻഡെ സർക്കാരിൽ ചവാൻ പൊതുമരാമത്ത് വകുപ്പ് മന്ത്രിയായിരുന്നു.ബൂത്ത്, താലൂക്ക്, ജില്ലാ തല തെരഞ്ഞെടുപ്പിന് ശേഷം ബി.ജെ.പി സംസ്ഥാന അധ്യക്ഷനെ നിയമിക്കും. അടുത്തിടെ, പാർട്ടി അതിൻ്റെ ‘സംഘടൻ പർവ്വ’ കാമ്പെയ്ൻ ആരംഭിച്ചു, പ്രചാരണത്തിൻ്റെ മേൽനോട്ടം വഹിക്കാനും സംസ്ഥാന ഇൻചാർജ് ആയി പ്രവർത്തിക്കാനുമുള്ള ചുമതല ചവാനെ ഏൽപ്പിച്ചു.
