മുംബൈ:കഴിഞ്ഞ ദിവസമാണ് മുംബൈയിലെ കുർള ഈസ്റ്റിൽ ഞെട്ടിക്കുന്ന ഈ കൊലപാതകം പുറത്തുവന്നത്, മകൾ തൻ്റെ വൃദ്ധയായ അമ്മയെ കത്തികൊണ്ട് ഒന്നിലധികം തവണ കുത്തി കൊലപ്പെടുത്തിയതാണ് കേസ്. കൊലപാതകത്തിന് ശേഷം പ്രതിയായ മകൾ നേരിട്ട് ചുനഭട്ടി പോലീസ് സ്റ്റേഷനിലെത്തി കുറ്റം സമ്മതിക്കുകയായിരുന്നു.ശേഷം ചുനഭട്ടി പൊലീസ് കൊലക്കുറ്റത്തിന് കേസെടുത്ത് അറസ്റ്റ് ചെയ്തു. രേഷ്മ കാസി (41)യാണ് അമ്മ സാബിറ ബാനോവിനെ (62) കൊല ചെയ്തതിൽ അറസ്സ്റ്റിൽ ആയത്.
മൂത്ത സഹോദരിയെ ആവർത്തിച്ച് പുകഴ്ത്തുകയും കൂടുതൽ വാത്സല്യം കാണിക്കുകയും ചെയ്തതിന് പ്രതിയായ മകൾ അമ്മയോട് പലപ്പോഴും ദേഷ്യപ്പെട്ടിരുന്നതായി പ്രാഥമിക അന്വേഷണത്തിൽ വ്യക്തമായതായി പോലീസ് ഉദ്യോഗസ്ഥൻ പറഞ്ഞു. ഇരുവരും ഇടക്ക് വഴക്ക് ഉണ്ടാകാറുണ്ടെന്നും ഈ ദേഷ്യമാണ് ദാരുണമായ കൊലപാതകത്തിലേക്ക് നയിച്ചതെന്നും പോലിസ് വ്യക്തമാക്കി.അമ്മയെ കൊലപ്പെടുത്തിയ ശേഷം രേഷ്മ തൻ്റെ സഹോദരനെ വിളിച്ച് വിവരം അറിയിക്കുകയും തുടർന്ന് ചുനഭട്ടി പോലീസ് സ്റ്റേഷനിലെത്തി കീഴടങ്ങുകയും ചെയ്തു.
യുവതിയുടെ മാനസിക നിലക്ക് കുഴപ്പമില്ലെന്നും എല്ലാ കോണുകളിൽ നിന്നും കേസ് അന്വേഷിക്കുന്നതായും പോലീസ് അറിയിച്ചു.സോൺ 6-ലെ ഡിസിപി നവ്നാഥ് ധവാലെ, രേഷ്മ കാസിയുടെ അറസ്റ്റ് സ്ഥിരീകരിച്ചു, രേഷ്മയുടെ മാനസികാരോഗ്യം സ്ഥിരീകരിച്ച മൂത്ത സഹോദരി ജൈനബ്ബി നൗഷാദ് ഖുറേഷിയിൽ നിന്ന് മൊഴിയെടുത്തതായി അറിയിച്ചു. കൊലപാതകത്തിന് പിന്നിലെ കൃത്യമായ കാരണം കണ്ടെത്താനുള്ള ശ്രമത്തിലാണ് പോലീസ്.
പ്രതി കുടുംബത്തോടൊപ്പം താമസിക്കുന്ന കുർളയിലെ ഖുറേഷി നഗറിൽ ജനുവരി 2 ന് വൈകുന്നേരം 6:30 നും 7:00 നും ഇടയിലാണ് സംഭവം നടന്നതെന്ന് പോലീസ് പറഞ്ഞു. മരിച്ച സാബിറ ബാനോ മുമ്പ്രയിൽ താമസിച്ചു, കുർളയിലെ ഖുറേഷി നഗറിലെ മകൾ രേഷ്മ കാസിയെ കാണാൻ വന്നതായിരുന്നു. പൂനെയിൽ താമസിക്കുന്ന മൂത്ത സഹോദരിയോട് അമ്മ കൂടുതൽ സ്നേഹവും പിന്തുണയും കാണിക്കുകയും അവൾ സന്ദർശിക്കുമ്പോൾ എപ്പോഴും അവളെ പ്രശംസിക്കുകയും ചെയ്തതിനാൽ രേഷ്മ അസ്വസ്ഥയായിരുന്നുവെന്നും റിപ്പോർട്ടുകൾ വരുന്നു.ഇതേച്ചൊല്ലി അന്നു വൈകുന്നേരം ഇരുവരും തമ്മിൽ വാക്കേറ്റമുണ്ടായി. രോഷാകുലയായ രേഷ്മ അമ്മയെ കത്തികൊണ്ട് നാല് തവണ കുത്തുകയും സംഭവസ്ഥലത്ത് വെച്ച് തന്നെ മരണം സംഭവിക്കുകയും ചെയ്തു. പിന്നീട് വീട് പൂട്ടി സഹോദരനെ വിളിച്ച് കൊലപാതക വിവരം അറിയിച്ചു. സംഭവത്തിൽ പോലീസ് അന്വേഷണം തുടരുകയാണ്.
