ഓരോ നിമിഷവും സമൂഹ മാധ്യമങ്ങളിലേക്ക് ലോകമെമ്ബാടുനിന്നും പങ്കുവയ്ക്കപ്പെടുന്നത് ലക്ഷക്കണക്കിന് കണ്ടന്റുകളാണ്. ഇവയില് പലതും സമൂഹ മാധ്യമങ്ങളിലൂടെ നമ്മുടെ മുന്നിലുമെത്തുന്നു. സമൂഹ മാധ്യമ ലൈക്കിനും ഷെയറിനും വേണ്ടി എന്തും ചെയ്യാന് മടിക്കാത്ത ഒരു തലമുറയാണ് സൃഷ്ടിക്കപ്പെടുന്നതെന്ന് ചിലരെങ്കിലും ഇതിനിടെ ആശങ്കപ്പെടുന്നു.
ഇതിനിടെയാണ് ഒരു അമേരിക്കന് യുവതി തന്റെ സമൂഹ മാധ്യമ പേജില് പങ്കുവച്ച വീഡിയോ കണ്ട് സമൂഹ മാധ്യമ ഉപയോക്താക്കള് അക്ഷരാര്ത്ഥത്തില് ഞെട്ടിയത്. സ്വന്തം കുഞ്ഞിന്റെ ശവസംസ്കാര ചടങ്ങുകള്ക്കായി പ്രത്യേകം ഡിസൈൻ ചെയ്ത വസ്ത്രം ധരിച്ച് അണിഞ്ഞൊരുങ്ങുന്നതിന്റെ വീഡിയോയാണ് ഇവർ സമൂഹ മാധ്യമ അക്കൗണ്ടിലൂടെ പങ്കുവെച്ചത്.
കരിസ്സ വിഡ്ഡർ എന്ന യുവതി, തന്റെ ഇൻസ്റ്റാഗ്രാം ഹാന്റിലിലൂടെ ‘ഗെറ്റിങ് റെഡി ഫോർ മൈ ബേബീസ് ഫ്യൂണറല്’ (എന്റെ കുഞ്ഞിന്റെ ശവസംസ്കാര ചടങ്ങുകള്ക്ക് തയ്യാറെടുക്കുന്നു) എന്ന കുറിപ്പോടെ വീഡിയോ പങ്കുവച്ചപ്പോള് ഒരു ലക്ഷത്തി ഇരുപത്തിയയ്യായിരത്തിലേറെ പേരാണ് വീഡിയോ ലൈക്ക് ചെയ്തത്. ‘ഞങ്ങള് വിവാഹിതരായ സ്ഥലത്ത് വച്ച് തന്നെ എന്റെ കുഞ്ഞിന്റെ ശവസംസ്കാര ചടങ്ങുകള്ക്കും ഞാൻ തയ്യാറാകുന്നു. ഞങ്ങളുടെ കുട്ടിയെ ആഘോഷിക്കാൻ ഇതിലും നല്ല സ്ഥലമില്ല. ഞങ്ങളുടെ ജീവിതത്തിലെ ഏറ്റവും വലിയ നിമിഷങ്ങള്ക്ക് മനോഹരമായ പശ്ചാത്തലമായതിന് വണ് ഇലവണ് ഈസ്റ്റിന് നന്ദി.’ കരിസ്സ വിഡ്ഡർ ഇന്സ്റ്റാഗ്രാമില് എഴുതി. അതേസമയം വീഡിയോയ്ക്ക് താഴെ കാഴ്ചക്കാര്ക്ക് അഭിപ്രായങ്ങള് എഴുതാനുള്ള ഓപ്ഷന് കരിസ്സ ലോക്ക് ചെയ്തിരുന്നു.
