ചൈനയുടെ തലസ്ഥാനമായ ബെയ്ജിങ്ങില് നിന്നും ഞെട്ടിക്കുന്ന ഒരു വാർത്തയാണ് പുറത്തുവരുന്നത്. നഗരത്തിലെ ഏറ്റവും ഉയരമുള്ള ആകാശചുംബിയായ ‘ചൈന സൂണ് ടവറിലേക്ക്’ ഒരു ചെറിയ വിമാനം നിയന്ത്രണം വിട്ട് ഇടിച്ചുകയറി.വെള്ളിയാഴ്ച പ്രാദേശിക സമയം വൈകുന്നേരം 6:00 മണിയോടെയാണ് ചൈനയെ ആശങ്കയിലാഴ്ത്തിയ ഈ സംഭവം നടന്നത്.
ബെയ്ജിങ്ങിലെ പ്രധാന ബിസിനസ് മേഖലയായ സെൻട്രല് ബിസിനസ് ഡിസ്ട്രിക്റ്റിലാണ് ഈ കെട്ടിടം സ്ഥിതി ചെയ്യുന്നത്. വിമാനം കെട്ടിടത്തിലേക്ക് ഇടിച്ചുകയറിയതോടെ അമേരിക്കയിലെ ലോകവ്യാപാര കേന്ദ്രത്തിന് നേരെ നടന്ന 9/11 ഭീകരാക്രമണത്തിന്റെ ഭീതിദമായ ഓർമ്മകളാണ് പലരിലും ഉണ്ടായത്. ആകാശചുംബിയായ ഒരു വലിയ കെട്ടിടത്തിലേക്ക് വിമാനം ഇടിച്ചുകയറുന്ന ദൃശ്യങ്ങള് സോഷ്യല് മീഡിയയില് പ്രചരിച്ചതോടെ വലിയ രീതിയിലുള്ള പരിഭ്രാന്തി പടർന്നു.
കെട്ടിടത്തിന് കേടുപാടുകള്; ജനങ്ങളെ ഒഴിപ്പിച്ചു
ഏകദേശം 1,700 അടി ഉയരമുള്ള 109 നിലകളുള്ള കെട്ടിടമാണ് സിഐടിഐസി ടവർ എന്ന് അറിയപ്പെടുന്ന ഈ ചൈന സൂണ് ടവർ. വിമാനം വന്നിടിച്ചതിന്റെ ആഘാതത്തില് കെട്ടിടത്തിന്റെ രണ്ട് വലിയ ജനല്ച്ചില്ലുകള് തകരുകയും വിമാനത്തിന്റെ അവശിഷ്ടങ്ങള് താഴെയുള്ള റോഡിലേക്ക് തെറിച്ചുവീഴുകയും ചെയ്തു. മുൻകരുതല് നടപടിയെന്ന നിലയില് അധികൃതർ ഉടൻ തന്നെ ടവറിലുള്ള ആളുകളെയെല്ലാം സുരക്ഷിതമായി പുറത്തെത്തിച്ചു. പ്രദേശവാസികള് സോഷ്യല് മീഡിയയില് പങ്കുവെച്ച വീഡിയോകളില്, കെട്ടിടത്തിന്റെ താഴത്തെ ഭാഗത്ത് നിന്നും പുക ഉയർന്നുവരുന്നതായും വിമാനത്തിന്റെ തകർന്ന ഭാഗങ്ങള് റോഡില് വീണുകിടക്കുന്നതായും കാണാം. അപകടത്തില് വിമാനം പൂർണ്ണമായും തകർന്നു.
റഡാർ ബന്ധം നഷ്ടമായ വിമാനം
‘B-12PP’ മോഡലില്പ്പെട്ട ഒരു ചെറിയ വിമാനമാണ് അപകടത്തില്പ്പെട്ടത് എന്നാണ് തിരിച്ചറിഞ്ഞിട്ടുള്ളത്. ഷിഫോസി വിമാനത്താവളത്തില് നിന്നും പറന്നുയർന്ന ഈ വിമാനത്തിന്, യാത്ര തുടങ്ങി ഏകദേശം 30 മിനിറ്റ് കഴിഞ്ഞപ്പോള് തന്നെ റഡാറുമായുള്ള ബന്ധം നഷ്ടപ്പെട്ടിരുന്നു. ബെയ്ജിങ്ങിന്റെ ഈസ്റ്റ് ഫിഫ്ത് റിംഗ് റോഡിന് സമീപം വെച്ചാണ് റഡാർ സിഗ്നലുകള് കാണാതായത്. ഇതിന് തൊട്ടുപിന്നാലെയാണ് വിമാനം ടവറിലേക്ക് ഇടിച്ചുകയറിയെന്ന വാർത്തകള് വരുന്നത്.
അപകടം നടന്നയുടൻ തന്നെ ഫയർഫോഴ്സും വലിയ രക്ഷാപ്രവർത്തക സംഘവും സ്ഥലത്തെത്തി പ്രദേശം പൂർണ്ണമായും പോലീസിന്റെ സുരക്ഷാ വലയത്തിലാക്കി. അപകടത്തില് എത്രപേർക്ക് പരിക്കേറ്റു എന്നതിനെക്കുറിച്ചോ ആളപായത്തെക്കുറിച്ചോ ചൈനീസ് അധികൃതർ ഇതുവരെ ഔദ്യോഗികമായി വിവരങ്ങള് പുറത്തുവിട്ടിട്ടില്ല. വിമാനത്തിനുണ്ടായ സാങ്കേതിക തകരാറാണോ അതോ മറ്റെന്തെങ്കിലും കാരണങ്ങളാണോ അപകടത്തിന് പിന്നിലെന്ന് കണ്ടെത്താൻ അന്വേഷണസംഘം പരിശോധനകള് ആരംഭിച്ചിട്ടുണ്ട്. ഇത്തരം വലിയ കെട്ടിടങ്ങളില് വിമാനം ഇടിക്കുന്നത് അതീവ അപൂർവ്വമായ കാര്യമാണെന്ന് വിദഗ്ദ്ധർ ചൂണ്ടിക്കാണിക്കുന്നു.
