ജൂണ് 19 വെള്ളിയാഴ്ച വരെ മുഖ്യമന്ത്രി വി ഡി സതീശനെ നേരില് കാണാൻ പൊതുജനങ്ങള്ക്ക് കഴിഞ്ഞേക്കില്ല.മുഖ്യമന്ത്രിയുടെ ഓഫീസാണ് ഇക്കാര്യം അറിയിച്ചുകൊണ്ടുള്ള അറിയിപ്പ് പുറത്തുവിട്ടത്. ധനമന്ത്രി കൂടിയായ മുഖ്യമന്ത്രി ബജറ്റ് തയ്യാറാക്കുന്നതിന്റെ തിരക്കിലാണ് അതുകൊണ്ടാണ് ഈ ദിവസങ്ങളില് സന്ദർശകരെ അനുവദിക്കാത്തതെന്ന് ഓഫീസ് അറിയിച്ചു. എല്ലാവരുടെയും സഹകരണം അഭ്യർത്ഥിക്കുന്നുവെന്നും നല്ലൊരു നാളെയ്ക്കായുള്ള ദൗത്യത്തില് എല്ലാവരുടെയും പിന്തുണ പ്രതീക്ഷിക്കുന്നുവെന്നും മുഖ്യമന്ത്രിയുടെ ഓഫീസ് അറിയിച്ചു.
അറിയിപ്പ് ഇങ്ങനെ…
“നമ്മുടെ സംസ്ഥാനത്തിന്റെ സമഗ്ര വികസനവും ജനക്ഷേമവും ലക്ഷ്യമിട്ടുള്ള ബജറ്റ് തയ്യാറാക്കുന്നതിന്റെ തിരക്കുകളിലാണ് ബഹു.മുഖ്യമന്ത്രി. ആയതിനാല് ജൂണ് 19 (വെള്ളിയാഴ്ച) വരെ അദ്ദേഹത്തിന് സന്ദര്ശകരെ നേരിട്ട് കാണാന് സാധിക്കാത്തതില് ഖേദിക്കുന്നു. ഈ താല്ക്കാലിക ബുദ്ധിമുട്ടില് നിങ്ങളുടെ സഹകരണം കൂടി അഭ്യര്ഥിക്കുന്നു. നാടിന്റെ മികച്ചൊരു നാളേയ്ക്കായുള്ള ഈ വലിയ ദൗത്യത്തില് എല്ലാവരുടെയും ആത്മാര്ത്ഥമായ പിന്തുണ പ്രതീക്ഷിക്കുന്നു”
വെള്ളിയാഴ്ചയാണ് സംസ്ഥാന സർക്കാരിന്റെ ബജറ്റ് അവതരണം നടക്കുക. വിഡി സതീശൻ സർക്കാരിന്റെ ആദ്യ ബജറ്റാണിത്. ബജറ്റിലെ വിവരങ്ങള് പുറത്തുവരുമ്പോള് ഇന്ദിരാ ഗാരന്റി നടപ്പാക്കാൻ എത്ര തുക വകയിരുത്തും എന്നാണ് അറിയാനുള്ളത്. ഇന്ന് തുടക്കം കുറിച്ച പ്രിയദർശിനി സൗജന്യ യാത്ര പദ്ധതിയ്ക്കുള്ള ഫണ്ട്, ഉമ്മൻചാണ്ടിയുടെ പേരിലുള്ള ഇൻഷുറൻസ് പരിരക്ഷാ പദ്ധതി, വയോജന വകുപ്പിനുള്ള ഫണ്ട് എന്നിവയെല്ലാം എത്രയെന്ന് ബജറ്റില് ഉണ്ടാകും.
