ശബരിമല സ്വര്ണക്കൊളള കേസിൽ അന്വേഷണത്തിന്റെ ഭാഗമായുണ്ടായിരുന്ന മുൻ ആഭ്യന്തര മന്ത്രിയും കോൺഗ്രസ് നേതാവുമായ രമേശ് ചെന്നിത്തലയുടെ മൊഴിയെടുക്കൽ എസ്ഐടി താത്കാലികമായി മാറ്റിവെച്ചു. കേസിന്റെ ക്രിമിനൽ ശൃംഖലയും ഇതുവരെ ലഭ്യമായ വിവരങ്ങളും പുനഃപരിശോധിക്കേണ്ടതിന്റെ ആവശ്യകത ചൂണ്ടിക്കാട്ടിയാണ് നടപടി. നിലവിലുള്ള തെളിവുകൾ വിലയിരുത്തുന്നതിനോടൊപ്പം, അന്വേഷണത്തിന് നിർണ്ണായകമായ ചില സാങ്കേതിക വിവരങ്ങൾ കൂടി ശേഖരിക്കേണ്ടതുണ്ടെന്ന് അന്വേഷണ സംഘം വ്യക്തമാക്കുന്നു.
മൊഴിയെടുക്കലുമായി ബന്ധപ്പെട്ട പുതിയ തീയതി പിന്നീട് അറിയിക്കുമെന്ന് എസ്ഐടി അറിയിച്ചു. സ്വർണം കൈവശപ്പെടുത്തൽ, കൈമാറ്റം, അതുമായി ബന്ധപ്പെട്ട ലജിസ്റ്റിക്സ് ഉൾപ്പെടെ പല തലങ്ങളിൽ വ്യാപിച്ചിരിക്കുന്ന ഈ കേസ്, സംസ്ഥാന രാഷ്ട്രീയത്തിലും നിയമ വ്യവസ്ഥയിലുമെല്ലാം വലിയ ചര്ച്ചകൾക്ക് ഇടയാക്കിയിരുന്നു. അന്വേഷണത്തിൽ വ്യക്തതയും സുതാര്യതയും ഉറപ്പ് വരുത്തുന്നതിനായുള്ള എല്ലാ നടപടികളും സ്വീകരിക്കുമെന്നും, ആവശ്യമായ പക്ഷം കൂടുതൽ പേരുടെ മൊഴിയും രേഖകളും പരിശോധിക്കുമെന്നും എസ്ഐടി കൂട്ടിച്ചേർത്തു. ഇതിനിടെ, വിഷയത്തിൽ രാഷ്ട്രീയ ആരോപണ-പ്രതിയോഗങ്ങൾ ശക്തമാകുന്നത് കേസിനെ വീണ്ടും പൊതുചർച്ചയുടെ മുൻനിരയിലേക്ക് കൊണ്ടുവന്നിരിക്കുകയാണ്.
സ്വർണ്ണ കടത്തുമായി ബന്ധപ്പെട്ട രാജ്യാന്തര ശൃംഖലകളുടെ ഇടപെടലിനെ കുറിച്ച് ലഭ്യമായ വിവരങ്ങൾ എസ്ഐടിക്ക് കൈമാറുവാൻ ആണ് രമേശ് ചെന്നിത്തല മൊഴി കൊടുക്കാൻ സന്നദ്ധനായത്. ഹൈക്കോടതിയുടെ നേരിട്ടുള്ള മേൽനോട്ടത്തിൽ നടക്കുന്ന അന്വേഷണം ആയതിനാൽ തന്നെ ഇന്ന് അദ്ദേഹത്തിൻറെ മൊഴിയെടുക്കും എന്നാണ് വിലയിരുത്തപ്പെട്ടത്. രണ്ടാംഘട്ട തദ്ദേശ തെരഞ്ഞെടുപ്പ് പോളിംഗ് നാളെ നടക്കാനിരിക്കെ രമേശിന്റെ മൊഴിയെടുത്താൽ അത് സിപിഎമ്മിനും സർക്കാരിനും തിരിച്ചടിയാകുമോ എന്ന ആശങ്ക ഇടതു കേന്ദ്രങ്ങളിൽ ശക്തമായിരുന്നു. ഇതിൻറെ പേരിൽ ഉണ്ടായ രാഷ്ട്രീയ സമ്മർദ്ദം ആയിരിക്കാം ഒരുപക്ഷേ മൊഴിയെടുപ്പ് മാറ്റിവയ്ക്കുവാനുള്ള കാരണമെന്നും സംശയം ഉയരുന്നുണ്ട്.
