നമ്മളിൽ മിക്ക ആളുകള്ക്കും ഹൃദയാഘാതവും ഹൃദയസ്തംഭനവും തമ്മിലുള്ള വ്യത്യാസം കൃത്യമായി അറിയണമെന്നില്ല. ഇതിനിടെയാണ് ഹൃദയാഘാതവും (Heart Attack) ഹൃദയസ്തംഭനവും (Cardiac Arrest) തമ്മിലുള്ള വ്യത്യാസം വിശദീകരിച്ച് ഒരു കണ്ടന്റ് ക്രിയേറ്റർ രംഗത്തെത്തിയിരിക്കുന്നത്. ഈ രണ്ട് ഗുരുതരമായ ആരോഗ്യസ്ഥിതികളും തമ്മിലുള്ള അടിസ്ഥാനപരമായ വ്യത്യാസം വളരെ ലളിതമായി വിശദീകരിക്കുന്ന കണ്ടന്റ് ക്രിയേറ്ററുടെ വീഡിയോ ഇപ്പോള് ഓണ്ലൈനില് ശ്രദ്ധ നേടുകയാണ്.
ഹൃദയാഘാതം; അടുക്കള സിങ്ക് ഉപയോഗിച്ചുള്ള വിശദീകരണം: ആരോഗ്യപരമായ വിഷയങ്ങള് ലളിതമായ രീതിയില് അവതരിപ്പിക്കുന്നതില് പ്രശസ്തനായ പ്രതം സക്സേനയാണ് ഈ വീഡിയോ പങ്കുവെച്ചത്. അദ്ദേഹം ഒരു അടുക്കള സിങ്കും ഗ്ലാസും ഉപയോഗിച്ച് ഹൃദയാഘാതം എങ്ങനെ സംഭവിക്കുന്നു എന്ന് വിശദീകരിക്കുന്നു.അടുക്കളയിലെ സിങ്കിനെ ഹൃദയം എന്നും, സിങ്കിലേക്ക് വെള്ളം എത്തിക്കുന്ന പൈപ്പിനെ കൊറോണറി ആർട്ടറി (ഹൃദയത്തിലേക്കുള്ള രക്തധമനി) എന്നും അദ്ദേഹം ഉപമിക്കുന്നു.”ഈ ലൈൻ ബ്ലോക്ക് ആകുമ്ബോള്, ഹൃദയത്തിലേക്ക് കുറച്ച് രക്തം മാത്രമേ എത്തുന്നുള്ളൂ.”ധമനിയിലെ ഈ തടസ്സം കാരണം ഹൃദയത്തിന് ആവശ്യത്തിന് ഓക്സിജൻ ലഭിക്കാതെ വരുമ്ബോഴാണ് ഹൃദയാഘാതം ഉണ്ടാകുന്നത്. ഹൃദയാഘാതം സംഭവിക്കുമ്ബോള് ഹൃദയം മിടിക്കുന്നത് തുടരുമെങ്കിലും അതിന് ഓക്സിജൻ്റെ കുറവ് അനുഭവപ്പെടും. കഠിനമായ നെഞ്ചുവേദന, അമിത വിയർപ്പ് തുടങ്ങിയ ലക്ഷണങ്ങള് ഉള്ളപ്പോള് വ്യക്തി സാധാരണയായി ബോധാവസ്ഥയില് ആയിരിക്കും.
ചികിത്സാ മാർഗ്ഗം: ഹൃദയാഘാത ലക്ഷണങ്ങള് കണ്ടാല് രക്തം നേർപ്പിക്കാൻ സഹായിക്കുന്ന ഇക്കോസ്പ്രിൻ, കൊളസ്ട്രോള് നിയന്ത്രിക്കുന്ന റോസുവാസ്റ്റാറ്റിൻ, ധമനികളെ വികസിപ്പിക്കുന്ന സോർബിട്രേറ്റ് എന്നിവ ഡോക്ടറുടെ നിർദ്ദേശപ്രകാരം നല്കുന്നത് താത്കാലികമായി രക്തയോട്ടത്തെ പിന്തുണയ്ക്കാൻ സഹായിക്കും.
ഹൃദയസ്തംഭനം-വൈദ്യുത സംവിധാനത്തിലെ തകരാറ്: ഹൃദയസ്തംഭനത്തെ വിവരിക്കാൻ അദ്ദേഹം ആദ്യ ഗ്ലാസിനടുത്ത് മറ്റ് മൂന്ന് ചെറിയ ഗ്ലാസുകള് കൂടി വെക്കുന്നു, ഇവ ശരീരത്തിലെ മറ്റ് അവയവങ്ങളെ പ്രതിനിധീകരിക്കുന്നു. ഹൃദയാഘാതത്തില് നിന്ന് വ്യത്യസ്തമായി, ഹൃദയസ്തംഭനത്തിന്റെ പ്രശ്നം രക്തധമനിയിലെ തടസ്സമല്ല, മറിച്ച് ഹൃദയത്തിന്റെ വൈദ്യുത സംവിധാനത്തിന്റെ പരാജയമാണ്. “ഹൃദയസ്തംഭനത്തില്, ഹൃദയത്തിന്റെ വൈദ്യുത സംവിധാനം ഒരു സ്വിച്ച് ഓഫ് ആയതുപോലെ പരാജയപ്പെടും.”ഈ പരാജയം കാരണം ഹൃദയം പൂർണ്ണമായും സ്പന്ദിക്കുന്നത് നിർത്തുകയും ശരീരത്തിന്റെ മറ്റ് അവയവങ്ങളിലേക്കുള്ള രക്തയോട്ടം ഉടൻ നിലയ്ക്കുകയും ചെയ്യുന്നു. ഇത് വ്യക്തി തളർന്നുപോകാൻ (collapse) കാരണമാകുന്നു.
അടിയന്തര നടപടി: ഹൃദയസ്തംഭനം സംഭവിച്ചാല് ഉടൻ സിപിആർ (Cardiopulmonary Resuscitation) ആരംഭിക്കണം. മിനിറ്റില് 100 മുതല് 120 വരെ എന്ന കണക്കില് ചെസ്റ്റ് കംപ്രഷനുകള് നല്കണം. എത്രയും പെട്ടെന്ന് ആംബുലൻസിനെ വിളിച്ച് ഡിഫിബ്രിലേറ്റർ ഉപയോഗിച്ച് ഷോക്ക് നല്കേണ്ടതിന്റെ പ്രാധാന്യവും അദ്ദേഹം ഊന്നിപ്പറയുന്നു.
