പാലക്കാട് പല്ലൻചാത്തൂരില് 14 കാരൻ അർജുൻ ആത്മഹത്യ ചെയ്ത സംഭവത്തില് ക്ലാസ് അധ്യാപികക്കെതിരെ ആരോപണവുമായി കുടുംബം. കണ്ണാടി ഹയര്സെക്കണ്ടറി സ്കൂളിലെ അധ്യാപിക അര്ജുനെ നിരന്തരം മാനസികമായി പീഡിപ്പിക്കാറുണ്ടെന്നാണ് കുടുംബത്തിന്റെ ആരോപണം. ഇന്സ്റ്റഗ്രാമില് കുട്ടികള് തമ്മില് മെസ്സേജ് അയച്ചതിന് അര്ജുനെ ഭീഷണിപ്പെടുത്തിയെന്നും കുടുംബം പരാതിപ്പെടുന്നു.
കുഴല്മന്ദം പൊലീസില് പരാതി നല്കാനുള്ള തീരുമാനത്തിലാണ് കുടുംബം. കണ്ണാടി ഹയര്സെക്കണ്ടറി സ്കൂളിലെ ഒന്പതാം ക്ലാസ് വിദ്യാര്ത്ഥിയായിരുന്നു അര്ജുൻ. കഴിഞ്ഞ ദിവസം രാത്രി വീടിനകത്ത് തൂങ്ങിമരിച്ച നിലയില് അര്ജുനെ കണ്ടെത്തുകയായിരുന്നു. സ്കൂള് യൂണിഫോം പോലും മാറ്റാതെയാണ് മരിച്ച നിലയില് കണ്ടെത്തിയത്. ഇൻസ്റ്റഗ്രാമില് കുട്ടികള് മെസേജ് അയച്ചതിന് ഭീഷണിപ്പെടുത്തി. കൂടാതെ ജയിലിലിടുമെന്നും അധ്യാപിക കുട്ടിയെ ഭീഷണിപ്പെടുത്തിയെന്ന് കുടുംബം ആരോപിക്കുന്നു.
