ജോലി വാഗ്ദാനം ചെയ്ത് ദലിത് യുവതിയെ ലൈംഗികമായി പീഡിപ്പിച്ച കേസില് പാലക്കാട് നഗരസഭാ കൗണ്സിലര് പ്രശോഭിന് കനത്ത തിരിച്ചടി.പ്രശോഭ് സമര്പ്പിച്ച ജാമ്യാപേക്ഷ കേരള ഹൈക്കോടതി നിഷേധിച്ചു. നിലവില് ജുഡീഷ്യല് റിമാന്ഡില് കഴിയുന്ന പ്രതിക്ക് ജാമ്യം അനുവദിക്കരുതെന്ന പ്രോസിക്യൂഷന് വാദം പൂര്ണ്ണമായും അംഗീകരിച്ചുകൊണ്ടാണ് കോടതി നടപടി.
ഹൈക്കോടതിയില് ഇരുഭാഗത്തിന്റെയും വിശദമായ വാദപ്രതിവാദങ്ങള്ക്ക് ശേഷമാണ് ജാമ്യാപേക്ഷ തള്ളിക്കൊണ്ടുള്ള ഉത്തരവുണ്ടായത്. രാഷ്ട്രീയവും സാമൂഹികവുമായ സ്വാധീനമുള്ള പ്രതിക്ക് ജാമ്യം അനുവദിച്ചാല് അത് സാക്ഷികളെ സ്വാധീനിക്കാനും കേസിലെ നിര്ണായക തെളിവുകള് നശിപ്പിക്കാനും കാരണമായേക്കാമെന്ന് കോടതി നിരീക്ഷിച്ചു. നേരത്തെ കേസില് അറസ്റ്റ് ഭയന്ന് പ്രശോഭ് സമര്പ്പിച്ച മുന്കൂര് ജാമ്യാപേക്ഷ മണ്ണാര്ക്കാട് പ്രത്യേക കോടതിയും തള്ളിയിരുന്നു. ഇതിനെ തുടര്ന്നാണ് പ്രതി ജാമ്യത്തിനായി ഹൈക്കോടതിയെ സമീപിച്ചത്.
സമൂഹത്തില് ദുര്ബലരും പാര്ശ്വവത്കരിക്കപ്പെട്ടവരുമായ വിഭാഗത്തില് നിന്നുള്ള യുവതിയെ, തന്റെ ജനപ്രതിനിധി എന്ന പദവിയും അധികാരവും ദുരുപയോഗം ചെയ്ത് ജോലി നല്കാമെന്ന് പ്രലോഭിപ്പിച്ച് പീഡനത്തിന് ഇരയാക്കിയെന്നാണ് പ്രശോഭിനെതിരെയുള്ള കേസ്. സമൂഹത്തില് ഉയര്ന്ന പദവിയിലിരിക്കുന്ന ഒരാളില് നിന്ന് ഉണ്ടായ ഈ അതിക്രമം അതീവ ഗുരുതരമായാണ് നിയമസംവിധാനം കാണുന്നത്. പട്ടികജാതി-പട്ടികവര്ഗ പീഡന നിരോധന നിയമത്തിലെ (SC/ST Act) കടുത്ത വകുപ്പുകളും ലൈംഗിക പീഡനവുമായി ബന്ധപ്പെട്ട മറ്റ് ഇന്ത്യന് ന്യായ സംഹിതയിലെ പ്രധാന വകുപ്പുകളും ചുമത്തിയാണ് പാലക്കാട് പോലീസ് ഇയാള്ക്കെതിരെ കേസ് രജിസ്റ്റര് ചെയ്തിരിക്കുന്നത്. കേസില് നിലവില് റിമാന്ഡില് കഴിയുന്ന പ്രതിക്കെതിരെ കൂടുതല് അന്വേഷണവുമായി മുന്നോട്ട് പോകാനാണ് പോലീസ് തീരുമാനം.
