അംഗീകാരത്തിനും അവാർഡിനും അനുമോദനങ്ങള്ക്കും കാത്തു നില്ക്കാതെ ജെസ്ന യാത്രയായി. കൊടുങ്ങല്ലൂർ നഗരസഭയിലെ മികച്ച വനിത കർഷക അവാർഡ് ജേതാവായ ജസ്നക്ക് പക്ഷേ അവാർഡ് സ്വീകരിക്കാനുള്ള ഭാഗ്യമുണ്ടായില്ല.വിധി അണലിയുടെ രൂപത്തില് ജീവൻ കവരുകയായിരുന്നു. അവാർഡ് ദാനത്തിന് ദിവസങ്ങള് മാത്രം ബാക്കി നില്ക്കെയാണ് ജെസ്നയുടെ വിയോഗം.
അണലിയുടെ കടിയേറ്റാണ് ഇവർ മരിച്ചത്. ലോകമലേശ്വരം വെസ്റ്റ് കൊടുങ്ങല്ലൂർ പൊടിയൻ ബസാറില് കൊല്ലിയില് നിയാസിന്റെ ഭാര്യയും വട്ടപറമ്ബില് പരേതനായ അബുവിന്റെ മകളാണ് ജസ്ന.
വീടിന്റെ ചുറ്റുപാടും വിവിധ കൃഷികള് ചെയ്തിരുന്നു. കോഴികളെയും വളർത്തിയിരുന്നു. ഇത്തവണ മട്ടുപ്പാവില് ചെണ്ടുമല്ലിയും കൃഷി ചെയ്തിരുന്നു. ഏതാനും ദിവസം മുമ്ബാണ് ഫീല്ഡ് പരിശോധനകള്ക്ക് ശേഷം കൃഷിഭവൻ അധികൃതർ ജസ്നയെ മികച്ച വനിത കർഷകയായി തെരഞ്ഞെടുത്തത്. 17ന് അവാർഡ് സമ്മാനിക്കാനും തീരുമാനിച്ചു. വിവരം കൈമാറും മുമ്ബേ അവർ പാമ്ബുകടിയേറ്റ് ഗുരുതരാവസ്ഥയിലേക്ക് മാറിയിരുന്നു.
കഴിഞ്ഞ ഞായറാഴ്ച രാവിലെ കോഴികള്ക്ക് തീറ്റ നല്കാനെത്തിയപ്പോഴാണ് ജസ്നയെ പാമ്ബുകടിച്ചത്. എറണാകുളം ആസ്റ്റർ മെഡിസിറ്റിയില് ചികിത്സയിലിരിക്കെയായിരുന്നു മരണം. അമ്മയുടെ കാർഷികാഭിരുചിയില് ആകൃഷ്ടയായ മൂന്നു മക്കളില് ഒരാളായ ജന്നയെ മൂന്നു വർഷം മുമ്ബ് നഗരസഭയിലെ മികച്ച വിദ്യാർഥി കർഷകയായി തെരഞ്ഞെടുത്തിരുന്നു. കൃഷി പരിചരണത്തിനും വീട്ടുജോലിക്കും ഇടയില് കൊടുങ്ങല്ലൂരില് നാസ് കളക്ഷൻസ് എന്ന സ്ഥാപനം നടത്തുന്ന ഭർത്താവിനെ ബിസിനസില് സഹായിക്കാനും സമയം കണ്ടെത്തിയിരുന്നു .
