കേന്ദ്ര സർക്കാരിന്റെ അഭിമാനകരമായ ആരോഗ്യ ഇൻഷുറൻസ് പദ്ധതിയായ ആയുഷ്മാൻ ഭാരത് – പ്രധാൻ മന്ത്രി ജൻ ആരോഗ്യ യോജന (പിഎം-ജെഎവൈ)യെ പരസ്യമായി വിമർശിച്ച് മുംബൈയില് നിന്നുള്ള യുവതി. തന്റെ പിതാവിനെ ആശുപത്രിയില് പ്രവേശിപ്പിക്കാൻ ശ്രമിച്ചപ്പോള് ഉണ്ടായ വേദനാജനകമായ അനുഭവം പങ്കുവെച്ചാണ് യുവതിയുടെ വിമർശനം. ഈ പദ്ധതി വ്യാജമാണെന്നും അവർ പറഞ്ഞു. വീഡിയോ സോഷ്യല് മീഡിയയില് വൈറലാണ്.
67 വയസ്സുള്ള അവരുടെ പിതാവിന്റെ ചികിത്സയുമായി ബന്ധപ്പെട്ട് പദ്ധതിയുടെ ആനുകൂല്യം തേടി 24 ആശുപത്രികളിലേക്ക് വിളിച്ചെങ്കിലും പദ്ധതിയുടെ ഗുണം അവർക്ക് ലഭിച്ചില്ല. നാല് പതിറ്റാണ്ടുകളായി ബാങ്കില് സേവനമനുഷ്ഠിക്കുകയും കൃത്യമായി നികുതി അടയ്ക്കുകയും ചെയ്തിരുന്ന, മുൻ എസ്ബിഐ ഉദ്യോഗസ്ഥനായ അവരുടെ പിതാവിന് പുലർച്ചെ 5:30 ഓടെ ഗുരുതരമായ മെഡിക്കല് എമർജൻസി അനുഭവപ്പെട്ടു. ആയുഷ്മാൻ ഭാരതിന് കീഴില് 5 ലക്ഷം രൂപയുടെ ആരോഗ്യ പരിരക്ഷ ലഭിക്കുമെന്ന പ്രതീക്ഷയില്, മുംബൈ, താനെ, നവി മുംബൈ എന്നിവിടങ്ങളിലെ പദ്ധതിയില് ലിസ്റ്റുചെയ്തിരിക്കുന്ന ആശുപത്രികളിലേക്ക് അവർ വിളിച്ചെങ്കിലും നിരാശയായിരുന്നു ഫലം.”ആകെ 24 ആശുപത്രികളിലേക്ക് ഞാൻ വിളിച്ചു. ആയുഷ്മാൻ ഭാരതുമായി ബന്ധമില്ലെന്ന് പത്ത് ആശുപത്രികള് അറിയിച്ചു.
ഏകദേശം ആറ് ആശുപത്രികള് പൂർണ്ണമായും ബന്ധപ്പെടാൻ കഴിഞ്ഞില്ല, ബാക്കിയുള്ളവ പരിഹാസ്യമായ നിബന്ധനകള് ഏർപ്പെടുത്തി. ഒരാള് ഈ പദ്ധതി ഓങ്കോളജിക്ക് മാത്രമേ ബാധകമാകൂ എന്നും മറ്റൊരാള് ഇത് ഐസിയു പരിചരണത്തിന് മാത്രമേ സാധുതയുള്ളൂ എന്നും പറഞ്ഞു. ഒരു സാധാരണ രോഗി എവിടെ പോകും?” എക്സിൽ പങ്ക് വച്ച് ഒരു വീഡിയോയില് അവർ ചോദിച്ചു.
“വിദ്യാഭ്യാസമുള്ള, ഇന്റർനെറ്റ് സാക്ഷരതയുള്ള, കണക്റ്റിവിറ്റിയുള്ള ഞങ്ങളുടേതുപോലുള്ള ഒരു കുടുംബത്തിന് ഒരു പ്രതിസന്ധിയില് സഹായം ലഭിക്കുന്നില്ലെങ്കില്, ദിവസ വേതനക്കാരും ദരിദ്ര കുടുംബങ്ങളും ഈ സംവിധാനത്തെ എങ്ങനെ മറികടക്കും?” താരതമ്യേന നല്ല വിദ്യാഭ്യാസം ലഭിക്കുകയും നഗരപ്രദേശത്ത് ജീവിക്കുകയും ചെയ്യുന്ന യുവതിയുടെ ചോദ്യങ്ങള് വൈറലാണ്.
50 കോടിയിലധികം ഇന്ത്യക്കാരെ ഉള്പ്പെടുത്താൻ ലക്ഷ്യമിട്ട് , ഏറെ കൊട്ടിഘോഷിക്കപ്പെട്ട പദ്ധതിയുടെ സുതാര്യത, പ്രാപ്യത, യഥാർത്ഥ നടത്തിപ്പ് എന്നിവയെക്കുറിച്ച് യുവതിയുടെ അനുഭവങ്ങള് പുതിയ ആശങ്കകള്ക്ക് കാരണമായിട്ടുണ്ട്. ഒരു കുടുംബത്തിന് പ്രതിവർഷം 5 ലക്ഷം രൂപ വരെ സൗജന്യ പണരഹിത ചികിത്സ വാഗ്ദാനം ചെയ്യുമെന്ന് പദ്ധതി അവകാശപ്പെടുന്നുണ്ടെങ്കിലും, ഇതുപോലുള്ള അടിസ്ഥാനതല അനുഭവങ്ങള് നിർവ്വഹണത്തിലെ ഗുരുതരമായ വിടവുകള് ചൂണ്ടികാണിക്കുന്നു.
