കേന്ദ്രസർക്കാരിന്റെ തൊഴിലാളിനയങ്ങള്ക്കെതിരേ സംയുക്ത ട്രേഡ് യൂണിയന്റെ നേതൃത്വത്തില് ആഹ്വാനംചെയ്ത ദേശീയ പണിമുടക്ക് തുടരുകയാണ്. പണിമുടക്കിന് ഐക്യദാർഢ്യം പ്രഖ്യാപിച്ച് സംസ്ഥാനത്തെ കെഎസ്ആർടിസി അടക്കം സർവീസ് നിർത്തിവെച്ചതോടെ യാത്രക്കാർ വലയുകയാണ്.
ഇതിനിടെ ഹെല്മെറ്റ് ധരിച്ച് വാഹനമോടിച്ച കെഎസ്ആർടിസി ഡ്രൈവറുടെ ചിത്രം സമൂഹ മാധ്യമങ്ങളില് വൈറലാവുന്നു. പത്തനംതിട്ടയില് നിന്നും കൊല്ലത്തിനു സർവീസ് പോയ ബസിലെ ഡ്രൈവർ ഷിബു തോമസ് ആണ് ഹെല്മെറ്റ് ധരിച്ചു വണ്ടി ഓടിച്ചത്. സമരാനുകൂലികളുടെ ആക്രമണം ഭയന്നാണ് ഹെല്മറ്റ് ധരിച്ചുള്ള ഷിബുവിൻറെ ബസ് ഡ്രൈവിംഗ്. ഈ ബസ് അടൂരില് സമരാനുകൂലികള് തടഞ്ഞു.
ദേശീയ പണിമുടക്ക്: കല്ലേറ് ഭയന്ന് ഹെൽമെറ്റ് വെച്ച് ബസ്സ് ഓടിച്ച് കെഎസ്ആർടിസി ഡ്രൈവർ pic.twitter.com/GvUDYWTOhl
— Thomas R V Jose (@thomasrvjose) July 9, 2025
സർവീസ് നടത്താൻ തയ്യാറായ കെഎസ്ആർടിസി ബസുകള് തടഞ്ഞതോടെ പലയിടത്തും ജനം പെരുവഴിലായി.സംയുക്ത ട്രേഡ് യൂണിയന്റെ നേതൃത്വത്തില് ആഹ്വാനംചെയ്ത ദേശീയ പണിമുടക്ക് ചൊവ്വാഴ്ച അർധരാത്രി തുടങ്ങി. പശ്ചിമ ബംഗാളിലും പണി മുടക്ക് ശക്തമാണ്. പണിമുടക്ക് പൊതുഗതാഗത സംവിധാനങ്ങളെ ബാധിച്ചെങ്കിലും സ്വകാര്യ വാഹനങ്ങള് സർവീസ് നടത്തുന്നുണ്ട്.
