പാൽഘർ: ജനുവരി 17 നാണ് അഞ്ച് മിനിറ്റ് വൈകി സ്കൂളിൽ എത്തിയതിന് പാൽഘറിലെ ഭഗിനി സമാജ് വിദ്യാലയത്തിലെ 13 വയസ്സുകാരി കഠിനമായ ശിക്ഷയ്ക്ക് വിധേയയായത്.പാൽഘറിലെ തെംഭോഡെ ഗ്രാമത്തിൽ നിന്നുള്ള പത്താം ക്ലാസ് വിദ്യാർത്ഥിനി അന്ന് രാവിലെ സ്കൂളിൽ അഞ്ച് മിനിറ്റ് വൈകിയതാണ് കാരണം.ശിക്ഷയായി 50 പുഷ്-അപ്പുകൾ നടത്താൻ സ്കൂൾ പ്രിൻസിപ്പൽ പെൺകുട്ടിയോട് നിർദ്ദേശിക്കുകയായിരുന്നു.
ശിക്ഷയെത്തുടർന്ന് വീട്ടിലെത്തിയ വിദ്യാർത്ഥിനിക്ക് വയറുവേദനയ്ക്കൊപ്പം കാലുകളിലും തുടകളിലും കഠിനമായ വേദന അനുഭവപ്പെടാൻ തുടങ്ങി.പിന്നീട് ഛർദ്ദിക്കാൻ തുടങ്ങിയതോടെ രക്ഷിതാക്കൾ പാൽഘറിലെ സ്വകാര്യ ആശുപത്രിയിൽ ചികിൽസ തേടി, കഴിഞ്ഞ മൂന്ന് ദിവസമായി ചികിത്സയിലായിരുന്നു പെൺകുട്ടി.
ജനുവരി 19 ന് മാതാപിതാക്കൾ പാൽഘർ പോലീസ് സ്റ്റേഷനിൽ ഔപചാരികമായി പരാതി നൽകി. പോലീസ് ഇൻസ്പെക്ടർ അനന്ത് പരാഡ് ഇരുവിഭാഗത്തെയും ചോദ്യം ചെയ്യാൻ വിളിച്ചുവരുത്തി. ഇതേ വിദ്യാർത്ഥിനിയെ സ്കൂളിൽ ചെരുപ്പ് ധരിക്കാത്തതിന് മുമ്പ് ശിക്ഷിച്ചിട്ടുണ്ടെന്നും, ആർത്തവ സമയത്ത് കളിസ്ഥലത്ത് ഓടാൻ നിർബന്ധിതയായത് കൂടുതൽ ദുരിതത്തിന് കാരണമായെന്നും ഇരയുടെ അമ്മ പറഞ്ഞു.
സംഭവം ആദ്യം ക്രിമിനൽ കുറ്റം ചുമത്താൻ തക്ക ഗൗരവമുള്ളതായിരുന്നുവെങ്കിലും പിന്നീട് വിദ്യാർത്ഥിനി ആശുപത്രിയിൽ നിന്ന് മാതാപിതാക്കളെ ബന്ധപ്പെടുകയും പരാതി തുടരരുതെന്ന് ആവശ്യപ്പെടുകയും ചെയ്തു. തൽഫലമായി, രക്ഷിതാക്കൾ പരാതി പിൻവലിച്ചു. ഔപചാരിക നടപടികളൊന്നും ഉണ്ടായില്ല.
വിദ്യാർത്ഥികളെ ശിക്ഷിക്കുന്നതിനായി പുരുഷ അധ്യാപകർ സ്റ്റീൽ വടി ഉപയോഗിച്ചതായി ആരോപണമുയർന്നതുൾപ്പെടെയുള്ള ശാരീരിക ശിക്ഷയുമായി ബന്ധപ്പെട്ട മുൻ പരാതികൾക്ക് ശേഷം, ഇത്തരം സംഭവങ്ങൾ ആവർത്തിക്കില്ലെന്ന് ഉറപ്പാക്കാൻ ഇൻസ്പെക്ടർ പാറാട് സ്കൂൾ മാനേജ്മെൻ്റിന് നിർദ്ദേശം നൽകി.ഈ ശിക്ഷ തങ്ങളുടെ മകളുടെ ആരോഗ്യത്തെ പ്രതികൂലമായി ബാധിക്കുമെന്ന് വിദ്യാർത്ഥിയുടെ മാതാപിതാക്കൾ ആശങ്ക പ്രകടിപ്പിച്ചു, പ്രത്യേകിച്ച് പരീക്ഷകൾ 20 ദിവസങ്ങൾ മാത്രം ശേഷിക്കെ. സംഭവം മകളുടെ ആരോഗ്യത്തെ കാര്യമായി ബാധിച്ചിട്ടുണ്ടെന്ന് അവർ പറഞ്ഞു.
