ആന്ധ്രയില്‍ വഖഫ് ബോര്‍ഡ് പിരിച്ചുവിട്ട് ചന്ദ്രബാബു നായിഡു; വിശദാംശങ്ങൾ വായിക്കാം

2023 ഒക്ടോബറില്‍ ജഗൻമോഹൻ സർക്കാർ പുറത്തിറക്കിയ ഉത്തരവാണ് ആന്ധ്ര ന്യൂനപക്ഷ ക്ഷേമ മന്ത്രാലയം റദ്ദാക്കിയത്. 11 അംഗ ബോർഡിനെയാണ് മുൻ സർക്കാർ നിയമിച്ചിരുന്നത്. ഇതില്‍ മൂന്നുപേർ തെരഞ്ഞെടുക്കപ്പെട്ടവരും ബാക്കിയുള്ളവർ നാമനിർദേശം ചെയ്യപ്പെട്ടവരുമായിരുന്നു. എന്നാല്‍, വഖഫ് ബോർഡ് നിയമനം ചോദ്യംചെയ്തുകൊണ്ടുള്ള ഹർജി പരിഗണിച്ച്‌ 2023 നവംബർ ഒന്നിന് ആന്ധ്ര ഹൈക്കോടതി ചെയർമാന്റെ നിയമനം സ്‌റ്റേ ചെയ്തു.

ഇതിനു പിന്നാലെ കാലങ്ങളായി വഖഫ് ബോർഡ് പ്രവർത്തനരഹിതമായി തുടരുകയാണെന്ന് ചീഫ് എക്‌സിക്യൂട്ടീവ് ഓഫീസറാണു സർക്കാരിന്റെ ശ്രദ്ധയില്‍പെടുത്തിയതെന്ന് ന്യൂനപക്ഷ മന്ത്രാലയം കഴിഞ്ഞ ദിവസം പുറത്തിറക്കിയ ഉത്തരവില്‍ ചൂണ്ടിക്കാട്ടി. ഹൈക്കോടതി നടത്തിയ നിരീക്ഷണങ്ങള്‍ സൂക്ഷ്മമായി പരിശോധിച്ചും വഖഫ് സ്വത്തുക്കളുടെ സംരക്ഷണവും ബോർഡിന്റെ കാര്യക്ഷമമായ പ്രവർത്തനവും ലക്ഷ്യമിട്ടാണ് 2023 ഒക്ടോബർ 21ലെ സർക്കാർ ഉത്തരവ് പിൻവലിക്കുന്നതെന്നും ന്യൂനപക്ഷക്ഷേമ മന്ത്രാലയം സെക്രട്ടറി കാത്തി ഹർഷ്‌വർധൻ വ്യക്തമാക്കി.

അംഗങ്ങളുടെ നിയമനം ചോദ്യംചെയ്തുള്ള ഹർജികളിലുള്ള ഹൈക്കോടതിയുടെ സ്‌റ്റേ നടപടി നിലനില്‍ക്കുന്നതിനാല്‍ വഖഫ് ബോർഡ് നിർജീവമായിക്കിടക്കുകയാണെന്ന് ന്യൂനപക്ഷക്ഷേമ മന്ത്രി എൻ. മുഹമ്മദ് ഫാറൂഖ് പ്രതികരിച്ചു. ഈ സാഹചര്യം മറികടക്കാൻ വേണ്ടിയാണ് പഴയ ഉത്തരവ് റദ്ദാക്കാൻ തീരുമാനിച്ചതെന്നും ചന്ദ്രബാബു നായിഡുവിന്റെ നേതൃത്വത്തിലുള്ള സർക്കാർ വഖഫ് സ്വത്തുക്കളുടെ സംരക്ഷണത്തിലും ന്യൂനപക്ഷക്ഷേമത്തിലും പ്രതിജ്ഞാബദ്ധമാണെന്നും അദ്ദേഹം ചൂണ്ടിക്കാട്ടി.

നടപടിയെ ബിജെപി നേതാവും ഐടി സെല്‍ തലവനുമായ അമിത് മാളവ്യ സ്വാഗതം ചെയ്തിട്ടുണ്ട്. ഒരു മതേതര രാജ്യത്തില്‍ വഖഫ് ബോർഡിനെ പിന്തുണയ്ക്കുന്ന ഒരു നിയമവും ഭരണഘടനയിലില്ലെന്നാണ് മാളവ്യ ചൂണ്ടിക്കാട്ടിയത്.

അതേസമയം, കേന്ദ്ര സർക്കാരിന്റെ വഖഫ് ഭേദഗതി നിയമത്തില്‍ ചന്ദ്രബാബു നായിഡുവിന്റെ ടിഡിപിയുടെ നിലപാട് നിർണായകമാണ്. ന്യൂനപക്ഷ സംരക്ഷണത്തിന്റെ കാര്യത്തില്‍ വിട്ടുവീഴ്ചയില്ലെന്ന് തെരഞ്ഞെടുപ്പിനുശേഷവും നായിഡുവും ടിഡിപിയും വ്യക്തമാക്കിയിരുന്നു. വഖഫ് ഭേദഗതി നിയമം അംഗീകരിക്കാനാകില്ലെന്നാണ് കോണ്‍ഗ്രസ് ഉള്‍പ്പെടെയുള്ള പ്രധാന പ്രതിപക്ഷ കക്ഷികളെല്ലാം വ്യക്തമാക്കിട്ടുള്ളത്.