മുംബൈ:മഹാരാഷ്ട്ര നിയമസഭാ തെരഞ്ഞെടുപ്പിൽ മഹാ വികാസ് അഘാദി (എംവിഎ) യുടെ വൻ തോൽവിയെ തുടർന്ന് മഹാരാഷ്ട്ര കോൺഗ്രസ് അധ്യക്ഷൻ നാനാ പടോലെ രാജി സമർപ്പിച്ചതായി റിപ്പോർട്ട്.ഭരണകക്ഷിയായ മഹായുതി സഖ്യം 49.6% വോട്ട് വിഹിതത്തോടെ 235 സീറ്റുകൾ നേടിയപ്പോൾ, വെറും 49 സീറ്റുകളും 35.3% വോട്ടുകളും നേടി എം വി എ വളരെ പിന്നിലായി.തിങ്കളാഴ്ച കോൺഗ്രസ് അധ്യക്ഷൻ മല്ലികാർജുൻ ഖാർഗെയെയും രാഹുൽ ഗാന്ധിയെയും കാണാൻ നാനാ പട്ടോലെ ശ്രമിച്ചെങ്കിലും സാധിച്ചില്ലെന്നാണ് റിപ്പോർട്ടുകൾ സൂചിപ്പിക്കുന്നത്. അദ്ദേഹത്തിൻ്റെ രാജി പാർട്ടി ഹൈക്കമാൻഡ് ഇതുവരെ അംഗീകരിച്ചിട്ടില്ല. എന്നിരുന്നാലും, സ്ഥാനമൊഴിയാനുള്ള തീരുമാനം പടോലെ എടുത്തിട്ടില്ലെന്നും ചില റിപ്പോർട്ടുകൾ അവകാശപ്പെടുന്നു. ഈ രണ്ട് അവകാശവാദങ്ങളും സ്ഥിരീകരിക്കാൻ മഹാരാഷ്ട്ര കോൺഗ്രസ് അധ്യക്ഷനിൽ നിന്നോ പാർട്ടിയിൽ നിന്നോ സ്ഥിരീകരിച്ച പ്രസ്താവനകളൊന്നുമില്ല.
