ഇന്ന് നമ്മളില് ഭൂരിഭാഗം ആളുകളും പണമിടപാടുകള്ക്കായി സ്മാർട്ട്ഫോണുകളെയാണ് ആശ്രയിക്കുന്നത്. യുപിഐ ആപ്പുകളും മൊബൈല് ബാങ്കിംഗ് സംവിധാനങ്ങളും വന്നതോടെ നമ്മുടെ ഫോണുകള് വെറുമൊരു ആശയവിനിമയ ഉപാധി എന്നതിലുപരി ഒരു ഡിജിറ്റല് വാലറ്റായി മാറിക്കഴിഞ്ഞു.എന്നാല്, ഈ സൌകര്യം വർദ്ധിച്ചതോടെ സൈബർ കുറ്റവാളികളുടെ പ്രധാന ലക്ഷ്യവും നമ്മുടെ സ്മാർട്ട്ഫോണുകളായി മാറി.
പലരും ബാങ്ക് അക്കൗണ്ടുകള്ക്ക് ശക്തമായ പാസ്വേഡുകള് നല്കാറുണ്ടെങ്കിലും, ഫോണിലെ ചില സെറ്റിംഗ്സുകള് ശ്രദ്ധിക്കാൻ മറന്നുപോകാറുണ്ട്. സൈബർ തട്ടിപ്പുകാരില് നിന്നും നിങ്ങളുടെ അക്കൗണ്ടിലെ പണം സുരക്ഷിതമായി സൂക്ഷിക്കാൻ ഇന്ന് തന്നെ ഫോണില് പരിശോധിക്കേണ്ട 10 പ്രധാന സെറ്റിംഗ്സുകള് താഴെ പറയുന്നവയാണ്.
1. ആപ്പ് പെർമിഷനുകള് നിയന്ത്രിക്കുക
ഏതൊരു ബാങ്കിംഗ് അല്ലെങ്കില് പേയ്മെന്റ് ആപ്പ് ഉപയോഗിക്കുന്നതിന് മുൻപും അതിന് നല്കിയിരിക്കുന്ന പെർമിഷനുകള് പരിശോധിക്കുക. നിങ്ങളുടെ ഫോണിന്റെ സെറ്റിംഗ്സില് പോയി ബാങ്കിംഗ് ആപ്പുകള്ക്ക് നിങ്ങളുടെ കോണ്ടാക്റ്റുകള്, എസ്എംഎസ്, ക്യാമറ എന്നിവയിലേക്ക് ആവശ്യമില്ലാതെ ആക്സസ് നല്കിയിട്ടുണ്ടെങ്കില് അത് ഉടൻ തന്നെ ഒഴിവാക്കുക.
2. ബയോമെട്രിക് ഓതന്റിക്കേഷൻ
നിങ്ങളുടെ ഫോണ് അണ്ലോക്ക് ചെയ്യുന്നതിനും ബാങ്കിംഗ് ആപ്പുകള് തുറക്കുന്നതിനും ഫിംഗർപ്രിന്റ് (വിരലടയാളം) അല്ലെങ്കില് ഫേസ് ഐഡി (ഫേസ് അണ്ലോക്ക്) സംവിധാനം നിർബന്ധമാക്കുക. ഫോണ് മോഷ്ടിക്കപ്പെട്ടാല് പോലും മറ്റൊരാള്ക്ക് നിങ്ങളുടെ ബാങ്ക് ആപ്പുകള് തുറക്കാൻ ഇത് തടസ്സമാകും.
3. ഓട്ടോ-ലോക്ക് സ്ക്രീൻ സമയം കുറയ്ക്കുക
ഫോണ് ഉപയോഗിക്കാതെ ഇരിക്കുമ്പോള് സ്ക്രീൻ ലോക്കാകാനുള്ള സമയം എപ്പോഴും കുറച്ചു നിർത്തുക. ഉദാഹരണത്തിന്, ഇത് 1 മിനിറ്റില് നിന്നും 30 സെക്കൻഡ് ആയി കുറയ്ക്കുന്നത് വഴി ഫോണ് എവിടെയെങ്കിലും അശ്രദ്ധമായി വെച്ചാല് പോലും പെട്ടെന്ന് ലോക്കാവുകയും മറ്റുള്ളവർ ദുരുപയോഗം ചെയ്യുന്നത് തടയുകയും ചെയ്യാം.
4. ഇടപാട് അലേർട്ടുകള് സജീവമാക്കുക
ബാങ്കില് നിന്നുള്ള എല്ലാ പണം പിൻവലിക്കലുകള്ക്കും, പണം നിക്ഷേപിക്കലുകള്ക്കും, ഒപ്പം പരാജയപ്പെട്ട ലോഗിൻ ശ്രമങ്ങള്ക്കും എസ്എംഎസ്, ഇമെയില് അലേർട്ടുകള് കൃത്യമായി സെറ്റ് ചെയ്യുക. ഇത് വഴി നിങ്ങളുടെ അറിവില്ലാതെ എന്തെങ്കിലും ഇടപാട് നടന്നാല് ഉടൻ തന്നെ തിരിച്ചറിയാൻ സാധിക്കും.
5. പ്രതിദിന ഇടപാട് പരിധി നിശ്ചയിക്കുക
നിങ്ങളുടെ യുപിഐ, ഇന്റർനെറ്റ് ബാങ്കിംഗ്, എടിഎം പിൻവലിക്കലുകള് എന്നിവയ്ക്ക് ഒരു ദിവസത്തെ പരമാവധി പരിധി നിശ്ചയിക്കുക. അഥവാ അക്കൗണ്ട് ഹാക്ക് ചെയ്യപ്പെട്ടാല് പോലും വലിയ തുക നഷ്ടപ്പെടുന്നത് തടയാൻ ഈ നിയന്ത്രണം സഹായിക്കും.
6. എടിഎം/ക്രെഡിറ്റ് കാർഡ് ഉപയോഗം നിയന്ത്രിക്കുക
ബാങ്ക് ആപ്പുകള് വഴി നിങ്ങളുടെ ഡെബിറ്റ്/ക്രെഡിറ്റ് കാർഡുകളുടെ ഉപയോഗം നിയന്ത്രിക്കാം. നിങ്ങള് സ്ഥിരമായി ഉപയോഗിക്കാത്ത ഇന്റർനാഷണല് ട്രാൻസാക്ഷനുകള്, ഓണ്ലൈൻ ഇ-കോമേഴ്സ് പർച്ചേസുകള്, ടാപ്പ് ആൻഡ് പേ (NFC) സംവിധാനങ്ങള് എന്നിവ ഓഫാക്കി വെക്കുന്നത് കാർഡ് തട്ടിപ്പുകള് തടയും.
7. മള്ട്ടി-ഫാക്ടർ ഓതന്റിക്കേഷൻ
ബാങ്ക് ലോഗിനുകള്ക്കും വലിയ തുകകളുടെ ഇടപാടുകള്ക്കും വെറും പാസ്വേഡ് മാത്രം പോരാ. രണ്ട് ഘട്ടങ്ങളായുള്ള സുരക്ഷ ഉറപ്പാക്കാൻ ഒടിപി അല്ലെങ്കില് ഓതന്റിക്കേറ്റർ ആപ്പുകള് വഴിയുള്ള ടൂ-ഫാക്ടർ സുരക്ഷാ സംവിധാനം എപ്പോഴും ഓണ് ചെയ്തു വെക്കുക.
8. ലിങ്ക് ചെയ്തിരിക്കുന്ന ഡിവൈസുകള് പരിശോധിക്കുക
നിങ്ങളുടെ ബാങ്കിംഗ് ആപ്പുകളിലെ ‘Active Devices’ അല്ലെങ്കില് ‘Linked Devices’ സെക്ഷൻ കൃത്യമായ ഇടവേളകളില് പരിശോധിക്കുക. നിങ്ങളുടെ ഫോണ് അല്ലാതെ മറ്റേതെങ്കിലും കമ്പ്യൂട്ടറോ ഫോണോ നിങ്ങളുടെ അക്കൗണ്ടുമായി ലിങ്ക് ചെയ്തതായി കണ്ടാല് ഉടൻ തന്നെ അവിടെ നിന്നും ലോഗ് ഔട്ട് ചെയ്യുക.
9. സ്ക്രീൻ ഷെയറിംഗ് പെർമിഷനുകള് ഓഫാക്കുക
വ്യാജ ലിങ്കുകളില് നിന്നും ആപ്പുകള് ഡൌണ്ലോഡ് ചെയ്യുന്നത് വഴി നിങ്ങളുടെ സ്ക്രീൻ ഷെയറിംഗ് അല്ലെങ്കില് അക്സസിബിലിറ്റി പെർമിഷനുകള് തട്ടിപ്പുകാർ കൈക്കലാക്കിയേക്കാം. ഫോണ് സെറ്റിംഗ്സിലെ “Special App Access” പരിശോധിച്ചു അപരിചിതമായ ആപ്പുകള്ക്ക് ഇത്തരം അനുമതികള് നല്കിയിട്ടില്ല എന്ന് ഉറപ്പു വരുത്തുക.
10. പബ്ലിക് വൈ-ഫൈ ഉപയോഗം ഒഴിവാക്കുക
റെയില്വേ സ്റ്റേഷനുകളിലോ കഫേകളിലോ ഉള്ള സൌജന്യ വൈ-ഫൈ ഉപയോഗിച്ച് ഒരിക്കലും ബാങ്ക് ഇടപാടുകള് നടത്തരുത്. ഫോണ് സെറ്റിംഗ്സില് ‘Auto-Connect Wi-Fi’ ഓഫ് ചെയ്തു വെക്കുക. അത്യാവശ്യ ഘട്ടങ്ങളില് മൊബൈല് ഡാറ്റയോ വിശ്വസനീയമായ വിപിഎൻ സംവിധാനങ്ങളോ മാത്രം ഉപയോഗിക്കുക.
