വീട്ടിലെ സ്വര്‍ണ്ണത്തിന് സുരക്ഷയും വരുമാനവും; റിസർവ് ബാങ്ക് ഓഫ് ഇന്ത്യ അവതരിപ്പിച്ചിട്ടുള്ള ഗോള്‍ഡ് സ്കീം എങ്ങനെ ഉപയോഗിക്കാം ; വിശദാംശങ്ങൾ വായിക്കാം

നിങ്ങളുടെ കൈവശമുള്ള പഴയ ആഭരണങ്ങള്‍, സ്വർണ്ണ നാണയങ്ങള്‍ അല്ലെങ്കില്‍ സ്വർണ്ണക്കട്ടികള്‍ ബാങ്കില്‍ നിക്ഷേപിക്കാനും അതിലൂടെ വർഷാവർഷം പലിശ നേടാനും ഈ സ്കീം നിങ്ങളെ അനുവദിക്കുന്നു. സാധാരണയായി ബാങ്ക് ലോക്കറുകളില്‍ സ്വർണ്ണം സൂക്ഷിക്കുമ്പോള്‍ നാം ബാങ്കിന് ലോക്കർ വാടക നല്‍കേണ്ടി വരാറുണ്ട്. എന്നാല്‍ ഈ പദ്ധതിയില്‍ നിക്ഷേപിക്കുന്നതിലൂടെ ബാങ്ക് നിങ്ങള്‍ക്ക് പലിശ നല്‍കുന്നു എന്നതാണ് പ്രധാന ആകർഷണം. മാത്രമല്ല, സ്വർണ്ണം ബാങ്കിന്റെ പക്കല്‍ സുരക്ഷിതമായിരിക്കുകയും മോഷ്ടിക്കപ്പെടുമെന്ന ഭയം ഇല്ലാതാവുകയും ചെയ്യും. ഇന്ത്യയില്‍ താമസിക്കുന്ന ഏതൊരു വ്യക്തിക്കും ഈ പദ്ധതിയില്‍ ചേരാവുന്നതാണ്.

നിക്ഷേപ രീതിയും കാലാവധിയും

ഈ പദ്ധതി പ്രകാരം കുറഞ്ഞത് 10 ഗ്രാം സ്വർണ്ണമെങ്കിലും നിക്ഷേപിക്കേണ്ടതുണ്ട്. പരമാവധി നിക്ഷേപത്തിന് പരിധിയില്ല എന്നത് വലിയ നിക്ഷേപകർക്ക് ഗുണകരമാണ്. പ്രധാനമായും മൂന്ന് തരത്തിലുള്ള ഡെപ്പോസിറ്റുകളാണ് ഇതിലുള്ളത്.

ഹ്രസ്വകാല നിക്ഷേപം: 1 മുതല്‍ 3 വർഷം വരെ.

മധ്യകാല നിക്ഷേപം: 5 മുതല്‍ 7 വർഷം വരെ.

ദീർഘകാല നിക്ഷേപം: 12 മുതല്‍ 15 വർഷം വരെ.

പലിശ നിരക്കും നികുതി ആനുകൂല്യങ്ങളും

നിലവില്‍ മധ്യകാല നിക്ഷേപങ്ങള്‍ക്ക് പ്രതിവർഷം 2.25 ശതമാനവും ദീർഘകാല നിക്ഷേപങ്ങള്‍ക്ക് 2.50 ശതമാനവുമാണ് പലിശ ലഭിക്കുന്നത്. ബാങ്കുകള്‍ നല്‍കുന്ന ഹ്രസ്വകാല നിക്ഷേപങ്ങളുടെ പലിശ നിരക്ക് അതത് ബാങ്കുകള്‍ക്ക് തീരുമാനിക്കാം. ഈ പദ്ധതിയുടെ ഏറ്റവും വലിയ സവിശേഷത ഇതിലെ നികുതി ഇളവുകളാണ്. ഗോള്‍ഡ് മോണിറ്റൈസേഷൻ സ്കീമിലൂടെ ലഭിക്കുന്ന പലിശയ്ക്ക് ആദായനികുതി നല്‍കേണ്ടതില്ല. കൂടാതെ, സ്വർണ്ണവില വർദ്ധിക്കുമ്പോള്‍ ലഭിക്കുന്ന ലാഭത്തിന് ക്യാപിറ്റല്‍ ഗെയിൻസ് ടാക്സും ബാധകമല്ല. വെല്‍ത്ത് ടാക്സില്‍ നിന്നും ഇതിനെ ഒഴിവാക്കിയിട്ടുണ്ട്.

സ്വർണ്ണം എങ്ങനെ നിക്ഷേപിക്കാം?

ബാങ്കില്‍ സ്വർണ്ണം നിക്ഷേപിക്കുന്നതിന് മുൻപായി അത് ശുദ്ധി പരിശോധനയ്ക്ക് വിധേയമാക്കും. അംഗീകൃത കളക്ഷൻ ആന്റ് പ്യൂരിറ്റി ടെസ്റ്റിംഗ് സെന്ററുകള്‍ വഴിയാണ് ഇത് നടക്കുന്നത്. ആഭരണങ്ങളില്‍ കല്ലുകളോ മറ്റ് ലോഹങ്ങളോ ഉണ്ടെങ്കില്‍ അവ നീക്കം ചെയ്ത ശേഷമുള്ള സ്വർണ്ണത്തിന്റെ ശുദ്ധി കണക്കാക്കി സർട്ടിഫിക്കറ്റ് നല്‍കും. ഈ സർട്ടിഫിക്കറ്റ് ബാങ്കില്‍ ഹാജരാക്കിയാല്‍ ഗോള്‍ഡ് ഡെപ്പോസിറ്റ് അക്കൗണ്ട് ആരംഭിക്കാം.

നിക്ഷേപ കാലാവധി കഴിയുമ്പോള്‍ അന്നത്തെ സ്വർണ്ണവിലയ്ക്കനുസരിച്ചുള്ള പണമോ അല്ലെങ്കില്‍ സ്വർണ്ണമോ ആയി നിക്ഷേപം തിരികെ വാങ്ങാം. എന്നാല്‍ നിക്ഷേപം നടത്തുമ്പോള്‍ തന്നെ ഏത് രീതിയിലാണ് തിരികെ വേണ്ടതെന്ന് ബാങ്കിനെ അറിയിക്കണം. സ്വർണ്ണമായാണ് തിരികെ വാങ്ങുന്നതെങ്കില്‍ 995 ശുദ്ധിയുള്ള സ്വർണ്ണക്കട്ടികളോ നാണയങ്ങളോ ആയിരിക്കും ലഭിക്കുക.

ഇന്ത്യ ലോകത്തിലെ ഏറ്റവും വലിയ സ്വർണ്ണ ഉപഭോക്താക്കളില്‍ ഒന്നാണ്. വൻതോതില്‍ സ്വർണ്ണം ഇറക്കുമതി ചെയ്യുന്നത് രാജ്യത്തിന്റെ വ്യാപാരക്കമ്മി വർദ്ധിപ്പിക്കുന്നു. ജനങ്ങളുടെ കൈവശമുള്ള വെറുതെ ഇരിക്കുന്ന സ്വർണ്ണം ബാങ്കിംഗ് സംവിധാനത്തിലേക്ക് എത്തിക്കുന്നതിലൂടെ സ്വർണ്ണ ഇറക്കുമതി കുറയ്ക്കാനും വിദേശനാണ്യം ലാഭിക്കാനും സർക്കാരിന് സാധിക്കുന്നു.

വീട്ടിലെ സ്വർണ്ണം വെറുതെ സൂക്ഷിക്കുന്നതിന് പകരം അത് സുരക്ഷിതമായി ബാങ്കില്‍ നിക്ഷേപിക്കാനും അതിലൂടെ അധിക വരുമാനം നേടാനും ആഗ്രഹിക്കുന്ന ഏതൊരാള്‍ക്കും ഗോള്‍ഡ് മോണിറ്റൈസേഷൻ സ്കീം ഒരു മികച്ച സാമ്പത്തിക തീരുമാനമായിരിക്കും.