ഇന്ത്യയില് പെട്രോള്, ഡീസല് വിലയില് വൻ വർദ്ധനവുണ്ടാകുമെന്ന തരത്തില് പ്രചരിക്കുന്ന വാർത്തകള് കേന്ദ്ര സർക്കാർ നിഷേധിച്ചു.ഇന്ധനവില ലിറ്ററിന് 28 രൂപ വരെ വർദ്ധിപ്പിക്കാൻ നീക്കമുണ്ടെന്ന റിപ്പോർട്ടുകള് ദുരുദ്ദേശപരവും തെറ്റിദ്ധരിപ്പിക്കുന്നതുമാണെന്ന് പെട്രോളിയം, പ്രകൃതിവാതക മന്ത്രാലയം വ്യക്തമാക്കി. അത്തരമൊരു നിർദ്ദേശം നിലവില് സർക്കാരിന്റെ പരിഗണനയിലില്ല.
വിവാദത്തിന് പിന്നില് കൊട്ടക് റിപ്പോർട്ട്
ഏപ്രില് 29-ലെ നിയമസഭാ തിരഞ്ഞെടുപ്പ് കഴിഞ്ഞാല് ഇന്ധനവിലയില് കുത്തനെയുള്ള വർദ്ധനവുണ്ടാകുമെന്ന് കൊട്ടക് ഇൻസ്റ്റിറ്റ്യൂഷണല് ഇക്വിറ്റീസ് (Kotak Institutional Equities) റിപ്പോർട്ട് നല്കിയിരുന്നു. അന്താരാഷ്ട്ര വിപണിയില് ക്രൂഡ് ഓയില് വില ബാരലിന് 120 ഡോളറിന് അടുത്തായി തുടരുന്ന സാഹചര്യത്തില്, നഷ്ടം നികത്താൻ ലിറ്ററിന് 25–28 രൂപ വർദ്ധിപ്പിക്കേണ്ടി വരുമെന്നായിരുന്നു കൊട്ടക്കിന്റെ പ്രവചനം. ഇതാണ് പൊതുജനങ്ങള്ക്കിടയില് ആശങ്ക പടർത്തിയത്.
‘ഇന്ത്യ സവിശേഷമായ രാജ്യം’
കഴിഞ്ഞ നാല് വർഷമായി ഇന്ധനവില വർദ്ധിപ്പിക്കാത്ത ഏക രാജ്യം ഇന്ത്യയാണെന്ന് മന്ത്രാലയം അവകാശപ്പെട്ടു.മിഡില് ഈസ്റ്റിലെ യുദ്ധസമാനമായ സാഹചര്യങ്ങള് ക്രൂഡ് ഓയില് വില വർദ്ധിപ്പിച്ചെങ്കിലും പൗരന്മാരെ ബാധിക്കാത്ത വിധം കേന്ദ്രം എക്സൈസ് തീരുവയില് ലിറ്ററിന് 10 രൂപ വരെ കുറവ് വരുത്തിയിരുന്നു.അന്താരാഷ്ട്ര വിലയിലെ ചാഞ്ചാട്ടത്തില് നിന്ന് ജനങ്ങളെ സംരക്ഷിക്കാൻ എണ്ണ പൊതുമേഖലാ സ്ഥാപനങ്ങളുമായി ചേർന്ന് സർക്കാർ നിരന്തരമായ നടപടികള് സ്വീകരിക്കുന്നുണ്ടെന്നും മന്ത്രാലയം അറിയിച്ചു.
ആഗോള പ്രതിസന്ധിയും ഹോർമുസ് കടലിടുക്കും
അമേരിക്ക, ഇസ്റാഈല്, ഇറാൻ എന്നീ രാജ്യങ്ങള് തമ്മിലുള്ള സംഘർഷം ഇന്ധന വിപണിയെ ബാധിച്ചിട്ടുണ്ട്. ഊർജ്ജ കയറ്റുമതിയുടെ പ്രധാന പാതയായ ഹോർമുസ് കടലിടുക്കില് സൈനിക ഇടപെടലുകള് മൂലം തടസ്സങ്ങള് ഉണ്ടായതാണ് ആഗോള വിപണിയില് വില ഉയരാൻ കാരണം.
സ്റ്റോക്ക് ഉറപ്പാക്കി സർക്കാർ
രാജ്യത്ത് പെട്രോളിനും ഡീസലിനും ക്ഷാമമുണ്ടാകില്ലെന്ന് സർക്കാർ സ്ഥിരീകരിച്ചു. എല്ലാ എണ്ണ ശുദ്ധീകരണ കമ്പനികളും (Refineries) മതിയായ സ്റ്റോക്കോടെ പൂർണ്ണ ശേഷിയില് പ്രവർത്തിക്കുന്നുണ്ട്. കൂടാതെ, നിർണ്ണായക മേഖലകള്ക്കാവശ്യമായ C3, C4 സ്ട്രീമുകള് ലഭ്യമാക്കാൻ പെട്രോകെമിക്കല് കോംപ്ലക്സുകള്ക്ക് അനുമതി നല്കിയതായും സെന്റർ ഫോർ ഹൈ ടെക്നോളജി (CHT) വ്യക്തമാക്കി.
