കാലിക്കറ്റ് സർവ്വകലാശാല മുൻ വൈസ് ചാൻസലറും പ്രമുഖ ഇടത് സഹയാത്രികനുമായിരുന്ന അഡ്വ. കെ കെ എൻ കുറുപ്പിനെ വള്ളിക്കുന്ന് മണ്ഡലത്തിലെ എസ്ഡിപിഐ സ്വതന്ത്ര സ്ഥാനാർത്ഥിയായി പ്രഖ്യാപിച്ചു.കോഴിക്കോട്ട് നടന്ന വാർത്താസമ്മേളനത്തില് എസ്ഡിപിഐ സംസ്ഥാന പ്രസിഡന്റ് സി.പി.എ. ലത്തീഫാണ് ആദ്യഘട്ട സ്ഥാനാർത്ഥി പട്ടിക പുറത്തുവിട്ടത്.
33 മണ്ഡലങ്ങളിലെ സ്ഥാനാർത്ഥികളെയാണ് ഇപ്പോള് പ്രഖ്യാപിച്ചിരിക്കുന്നത്. ബാക്കിയുള്ള മണ്ഡലങ്ങളിലെ പട്ടിക മറ്റന്നാള് പുറത്തുവിടുമെന്നും നേതൃത്വം അറിയിച്ചു.ഇത്തവണ കേരളത്തിലെ നൂറ് മണ്ഡലങ്ങളില് എസ്ഡിപിഐ ജനവിധി തേടും. ഒരു മുന്നണിയുമായോ രാഷ്ട്രീയ പാർട്ടികളുമായോ സഖ്യമോ ധാരണയോ ഇല്ലാതെയാകും പാർട്ടി മത്സരരംഗത്തിറങ്ങുകയെന്ന് സി.പി.എ. ലത്തീഫ് വ്യക്തമാക്കി. പറവൂർ, മലപ്പുറം, മഞ്ചേശ്വരം തുടങ്ങിയ നിർണ്ണായക മണ്ഡലങ്ങളും ആദ്യ പട്ടികയില് ഇടംപിടിച്ചിട്ടുണ്ട്. മഞ്ചേശ്വരത്ത് ഇത്തവണ ശക്തമായ പോരാട്ടം കാഴ്ചവെക്കാനാണ് പാർട്ടിയുടെ തീരുമാനം.
മുന്നണികളുടെ തിരഞ്ഞെടുപ്പ് ശൈലിയെ വിമർശിച്ച സി.പി.എ. ലത്തീഫ്, എല്ഡിഎഫ് ഒരു നേതാവിനെ ഉയർത്തിക്കാട്ടുന്നത് വോട്ടർമാർക്കിടയില് ആത്മവിശ്വാസം പകരുമെന്ന് നിരീക്ഷിച്ചു. എന്നാല് യുഡിഎഫ് നയിക്കാൻ കൃത്യമായൊരു നേതാവില്ലാതെയാണ് തിരഞ്ഞെടുപ്പിനെ നേരിടുന്നതെന്നും അദ്ദേഹം പരിഹസിച്ചു. വരുംദിവസങ്ങളില് കൂടുതല് പ്രമുഖരെ അണിനിരത്തിക്കൊണ്ട് പ്രചാരണം ശക്തമാക്കാനാണ് എസ്ഡിപിഐ ലക്ഷ്യമിടുന്നത്.
