സംസ്ഥാനത്തെ സര്ക്കാര് ഓഫീസുകളുടെ പ്രവർത്തി ദിനം കുറയ്ക്കുന്നു. പ്രവർത്തി ദിനം അഞ്ചായി കുറയ്ക്കുന്നത് ചർച്ച ചെയ്യാനാണ് ചീഫ് സെക്രട്ടറി സർവീസ് സംഘടന നേതാക്കളുമായി യോഗം വിളിച്ചു. ഈമാസം 5ന് ചീഫ് സെക്രട്ടറി വിളിച്ച സർവീസ് സംഘടനകളുടെ യോഗം നടക്കും. ഭരണപരിഷ്കാര കമ്മീഷന് റിപ്പോര്ട്ടിന്റെയും ശമ്ബള പരിഷ്കരണ കമ്മീഷന് റിപ്പോര്ട്ടിന്റെയും അടിസ്ഥാനത്തിലാണ് ആഴ്ചയില് രണ്ട് ദിവസം ഓഫീസുകള്ക്ക് അവധി നല്കുന്നതുമായി ബന്ധപ്പെട്ട ആലോചന നടക്കുന്നത്.
സംസ്ഥാനത്ത് പ്രവൃത്തിദിനങ്ങള് കുറച്ച് സമയം കൂട്ടാനാണ് ആലോചന. ഞായറാഴ്ചയ്ക്ക് പുറമേ ശനിയാഴ്ചയും അവധി നല്കാനാണ് ആലോചിക്കുന്നത്. ഇതിന് പകരം നിലവിലെ പ്രവൃത്തി സമയം വര്ധിപ്പിക്കും. മുമ്ബ് മാസത്തിലെ രണ്ടാം ശനിക്കൊപ്പം നാലാം ശനി കൂടി അവധിയാക്കുന്ന ആലോചനയുണ്ടായിരുന്നു.
നിലവില് ഏഴ് മണിക്കൂറാണ് സര്ക്കാര് ഓഫീസുകളുടെ പ്രവര്ത്തന സമയം. നഗരങ്ങളില് 10.15 മുതല് വൈകീട്ട് 5.15 വരെയും മറ്റിടങ്ങളില് 10 മുതല് അഞ്ച് വരെയുമാണ് പ്രവൃത്തി സമയം. ഇത് മാറ്റുകയാണെങ്കില് 10.15ന് തുടങ്ങുന്ന ഓഫീസുകള് 9.15നോ 9.30നോ ആരംഭിക്കുകയും വൈകുന്നേരം 5.30 അല്ലെങ്കില് 5.45 വരെയാക്കുകയും ചെയ്യും.
അതേസമയം തെരഞ്ഞെടുപ്പ് മുന്നിൽകണ്ടാണ് സർക്കാർ നീക്കം എന്നും ആക്ഷേപം ഉയരുന്നുണ്ട്. തെരഞ്ഞെടുപ്പിന് തൊട്ടുമുമ്പായി സർക്കാർ ജീവനക്കാർക്ക് ആഴ്ചയിൽ രണ്ടുദിവസം അവധി ലഭിക്കുന്ന രീതിയിൽ തീരുമാനമെടുത്താൽ ഗുണം ചെയ്യുമെന്നാണ് സിപിഎം കണക്കുകൂട്ടൽ. ഇതുവഴി തെരഞ്ഞെടുപ്പിൽ ജീവനക്കാരുടെയും കുടുംബങ്ങളുടെയും പിന്തുണ ഉറപ്പിക്കാനുള്ള നീക്കത്തിന്റെ ഭാഗമാണ് ചീഫ് സെക്രട്ടറി വിളിച്ചു ചേർക്കുന്ന യോഗം എന്ന് വിലയിരുത്തപ്പെടുന്നു.
