സംസ്ഥാനത്ത് അതിശക്തമായ മഴ തുടരുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ്. ന്യൂനമർദ്ദങ്ങളുടെയും ചക്രവാതച്ചുഴിയുടെയും സ്വാധീനഫലമായാണ് നിലവില് കേരളത്തില് മഴ കനക്കുന്നത്. ബംഗാള് ഉള്ക്കടലില് ന്യൂനമർദ്ദം നിലനില്ക്കുന്നുണ്ട്. വിദർഭയ്ക്ക് മുകളിലായാണ് മറ്റൊരു ന്യൂനമർദ്ദം രൂപപ്പെട്ടിരിക്കുന്നത്. കൊങ്കണ് മുതല് വടക്കൻ കേരള തീരം വരെ അറബിക്കടലില് ന്യൂനമർദ്ദപാത്തിയും സ്ഥിതിചെയ്യുന്നുണ്ട്. ചൊവ്വാഴ്ച വരെ നിലവിലെ സ്ഥിതി തുടരാനാണ് സാധ്യത.
അതിശക്തമായ മഴയ്ക്ക് സാധ്യതയുള്ളതിനാല് കണ്ണൂർ, കാസർകോട് ജില്ലകളില് ഇന്ന് ഓറഞ്ച് അലേർട്ട് പ്രഖ്യാപിച്ചിട്ടുണ്ട്. ഒറ്റപ്പെട്ടയിടങ്ങളില് അതിശക്തമായ മഴയ്ക്കുള്ള സാധ്യതയാണ് രണ്ടിടത്തും പ്രവചിച്ചിരിക്കുന്നത്. 24 മണിക്കൂറില് 115.6 mm മുതല് 204.4 mm വരെ മഴയാണ് ഇവിടെ പ്രതീക്ഷിക്കുന്നത്. കഴിഞ്ഞദിവസങ്ങളില് അതിശക്തമായ മഴ ലഭിച്ച പ്രദേശങ്ങളില് പ്രത്യേക ജാഗ്രത പാലിക്കണം.
മലപ്പുറം, കോഴിക്കോട്, വയനാട് ജില്ലകളില് ഇന്ന് യെല്ലോ അലേർട്ടും പ്രഖ്യാപിച്ചിട്ടുണ്ട്. നാളെ കോഴിക്കോട്, കണ്ണൂർ, കാസർകോട് ജില്ലകളിലും ബുധനാഴ്ച കണ്ണൂർ, കാസർകോട് ജില്ലകളിലും യെല്ലോ അലേർട്ടാണ്. ഈ ജില്ലകളിലും ജാഗ്രത പാലിക്കേണ്ടതുണ്ട്.
തൃശൂരില് വിദ്യാഭ്യാസ സ്ഥാപനങ്ങള്ക്ക് അവധി: തൃശൂരില് ശക്തമായ മഴയ തുടരുന്ന സാഹചര്യത്തില് മുൻകരുതല് നടപടിയുടെ ഭാഗമായി പ്രൊഫഷണല് കോളേജുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും ജില്ലാ കളക്ടർ അവധി പ്രഖ്യാപിച്ചിട്ടുണ്ട്. സ്കൂള്തലത്തിലുള്ള പരീക്ഷകള്ക്കും അവധി ബാധകമാണെന്നും കള്കടറുടെ അറിയിപ്പിലുണ്ട്.
മത്സ്യത്തൊഴിലാളി ജാഗ്രത നിർദേശം: കേരള – കർണാടക – തീരങ്ങളില് ചൊവ്വാഴ്ച വരെയും, ലക്ഷദ്വീപ് തീരത്ത് ബുധനാഴ്ച വരെയും മത്സ്യബന്ധനത്തിന് പോകാൻ പാടില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു. കേരള – കർണാടക – തീരങ്ങളില് മണിക്കൂറില് 40 – 50 കിലോമീറ്റർ വരെയും ചില അവസരങ്ങളില് 60 കിലോമീറ്റർ വരെയും വേഗതയില് കാറ്റിനും, ലക്ഷദ്വീപ് തീരത്ത് മണിക്കൂറില് 40 മുതല് 50 കിലോമീറ്റർ വരെയും ചില സമയങ്ങളില് 60 കിലോമീറ്റർ വരെയും വേഗതയില് ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ടെന്നാണ് അറിയിപ്പ്.
പ്രത്യേക ജാഗ്രത നിർദേശം: വ്യാഴാഴ്ചവരെ മധ്യ പടിഞ്ഞാറൻ അറബിക്കടല്, അതിനോട് ചേർന്ന പ്രദേശങ്ങള്, തെക്കു പടിഞ്ഞാറൻ അറബിക്കടല്, മധ്യ കിഴക്കൻ അറബിക്കടല് എന്നിവിടങ്ങളില് മണിക്കൂറില് 45 മുതല് 55 കിലോമീറ്റർ വരെയും ചില അവസരങ്ങളില് 65 കിലോമീറ്റർ വരെയും വേഗതയില് ശക്തമായ കാറ്റിന് സാധ്യത.
ഇന്ന് തെക്കു കിഴക്കൻ അറബിക്കടല്, ബംഗാള് ഉള്ക്കടല്, ആന്ധ്രാപ്രദേശ്, ഒഡിഷ തീരങ്ങള്, ആൻഡമാൻ കടല്, തമിഴ്നാട് തീരം, ഗള്ഫ് ഓഫ് മന്നാർ, കന്യാകുമാരി തീരം എന്നിവിടങ്ങളില് മണിക്കൂറില് 40 മുതല് 50 കിലോമീറ്റർ വരെയും ചില അവസരങ്ങളില് 60 കിലോമീറ്റർ വരെയും വേഗതയില് ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ട്. വടക്കു – കിഴക്കൻ അറബിക്കടല്, തെക്കൻ ഗുജറാത്ത് തീരം, കൊങ്കണ്, ഗോവ, തീരങ്ങള്, അതിനോട് ചേർന്ന മധ്യ കിഴക്കൻ അറബിക്കടല് , വടക്കു കിഴക്കൻ അറബിക്കടല്, തെക്കു കിഴക്കൻ അറബിക്കടല്, ആന്ധ്രാപ്രദേശ് തീരം, ഒഡിഷ തീരം, അതിനോട് ചേർന്ന മധ്യ പടിഞ്ഞാറൻ അറബിക്കടല് , വടക്കു പടിഞ്ഞാറൻ ബംഗാള് ഉള്ക്കടല് എന്നിവിടങ്ങളില് മണിക്കൂറില് 45 മുതല് 55 കിലോമീറ്റർ വരെയും ചില അവസരങ്ങളില് 65 കിലോമീറ്റർ വരെയും വേഗതയില് ശക്തമായ കാറ്റിനും മോശം കാലാവസ്ഥയ്ക്കും സാധ്യത.
നാളെ തെക്കു കിഴക്കൻ അറബിക്കടലിലും ബംഗാള് ഉള്ക്കടല്, ആന്ധ്രാപ്രദേശ് തീരം, ഒഡിഷ തീരം, തമിഴനാട് തീരം, ഗള്ഫ് ഓഫ് മന്നാർ, കന്യാകുമാരി തീരം എന്നിവിടങ്ങളില് മണിക്കൂറില് 40 മുതല് 50 കിലോമീറ്റർ വരെയും ചില അവസരങ്ങളില് 60 കിലോമീറ്റർ വരെയും വേഗതയില് കാറ്റിനും മോശം കാലാവസ്ഥയ്ക്കും സാധ്യതയുണ്ടെന്നും അറിയിപ്പുണ്ട്.
