കൊടും ക്രിമിനല് ഗോവിന്ദ ചാമി ജയില് ചാടുന്ന ദൃശ്യങ്ങള് പുറത്ത്. പുലര്ച്ചെ 1.15 നാണ് ജയില് ചാടിയത്. ആദ്യം ഒരു തുണി പുറത്തേക്കിട്ടു. പിന്നീട് സെല്ല് മുറിച്ച് മാറ്റിയ ഗ്യാപ്പിലൂടെ നിരങ്ങിയാണ് ഇയാള് സെല്ലിന് പുറത്തേക്കിറങ്ങിയത്.സെല്ലിന് പുറത്തേക്കിറങ്ങിയതിന് ശേഷം മൂന്നു തവണയായി തുണി ഉള്പ്പെടെയുള്ള ചില സാധനങ്ങള് എടുത്തു. 1.20 കഴിയുന്നതോടെയാണ് ഇയാള് പുറത്തേക്ക് ഇറങ്ങുന്നത്.
പിന്നീട് പത്താം ബ്ലോക്കിന്റെ മതില് ചാടിക്കടന്നു.ശേഷം വലിയ മതിലായ പുറം മതില് ചാടിക്കടന്നു. മതില് ചാടിക്കടക്കുമ്ബോഴേക്കും നാല്മണി കഴിഞ്ഞിരുന്നു. ഒന്നരമാസമെടുത്ത് കൃത്യമായി ആസൂത്രണം ചെയ്തായിരുന്നു ജയില്ച്ചാട്ടം. ജയില്ചാടാൻ ആരുടെയുo സഹായം ലഭിച്ചില്ലെന്നാണ് ഗോവിന്ദചാമി പൊലീസിന് നല്കിയ മൊഴി.
തളാപ്പിലെ ഒരു ഉപേക്ഷിക്കപ്പെട്ട കെട്ടിടത്തിന് സമീപത്തെ കിണറ്റില് നിന്നാണ് ഇയാളെ കഴിഞ്ഞ ദിവസം പിടികൂടിയത്. ഇയാള് ആദ്യം ഒളിച്ചിരുന്ന കെട്ടിടത്തില് പൊലീസ് വളഞ്ഞിരുന്നു. നാട്ടുകാർ തടിച്ചുകൂടാനുള്ള സാധ്യത കണക്കിലെടുത്ത് ഇയാളെ പിടിച്ചില്ലെന്നാണ് പിന്നീട് പൊലീസ് പറഞ്ഞത്. പക്ഷെ അപ്പോഴേക്കും സ്ഥലത്ത് ആള്ക്കാർ എത്തി. ഇതിനിടെ കെട്ടിടത്തില് നിന്ന് പുറത്തുചാടിയ ഗോവിന്ദചാമി അടുത്തുള്ള കിണറ്റിലേക്ക് ചാടി ഒളിച്ചിരുന്നു. എന്നാല് പൊലീസ് ഇയാളെ പിടികൂടുകയായിരുന്നു.മൂന്ന് മണിക്കൂർ നീണ്ട തിരച്ചിലിലാണ് ഗോവിന്ദച്ചാമിയെ കുറിച്ച് വിവരം ലഭിച്ചത്. കണ്ണൂർ നഗരത്തിന് പുറത്തേക്ക് കോഴിക്കോടും കാസർകോടുമടക്കം സംസ്ഥാനത്തെ പല ഭാഗത്തും ഗോവിന്ദച്ചാമിക്കായി തിരച്ചില് നടത്തിയിരുന്നു. ഇതിനിടയിലാണ് തളാപ്പിലെ വീട്ടില് നിന്ന് ഇയാള് പിടിയിലായത്. ഇതോടെ കണ്ണൂർ ജയിലിലുണ്ടായ ഗുരുതര സുരക്ഷാ വീഴ്ചയിലേക്കാണ് ചോദ്യങ്ങള് നീളുന്നത്. പക്ഷെ പ്രതിയെ വേഗത്തില് പിടികൂടാനായത് സർക്കാരിനും ആഭ്യന്തര വകുപ്പിനും വലിയ ആശ്വാസമാണ്.
